باعىنىشتى قىزمەتكەردىڭ كەسىرى...

ساياسات • 11 تامىز، 2020

باعىنىشتى قىزمەتكەردىڭ كەسىرى...

21 رەت كورسەتىلدى

پرەزيدەنت قاسىم-جومارت توقاەۆ ءوز جولداۋىندا: «سىبايلاس جەمقورلىققا قاتىستى قىلمىس جاسالعان مەكەمەنىڭ ءبىرىنشى باسشىسىنىڭ جاۋاپكەرشىلىگىن زاڭنامالىق جانە نورماتيۆتىك تۇرعىدان ناقتى بەلگىلەۋ كەرەك»، دەگەن بولاتىن. وسى ورايدا قول استىنداعى قىزمەتكەرلەرىنىڭ سىبايلاس جەمقورلىعى ءۇشىن باسشىلاردىڭ جۇمىستان بوساتىلۋى، سونداي-اق تارتىپتىك جازاعا تارتىلۋى جونىندە سوڭعى كەزدەرى زاڭنامالىق نورمانىڭ ورىندالۋى بارىسىنا از-كەم توقتالعاندى ءجون كوردىك.

جولدىباي بازار

بيىلعى جىلدىڭ 7 ايىندا سىبايلاس جەمقورلىققا قارسى قىزمەت تاراپىنان مەملەكەتتىك ورگاندارعا قىلمىستىق قۇقىقبۇزۋشىلىقتى جانە باسقا دا زاڭ بۇزۋشىلىقتاردى جاساۋعا ىقپال ەتەتىن ءمان-جايلاردى جويۋ تۋرالى 1118 ۇسىنىس جولدانعان. وسى ۇسىنىستاردى قاراستىرۋ ناتيجەلەرى بويىنشا 575 تۇلعا ءارتۇرلى تارتىپتىك جاۋاپكەرشىلىككە تارتىلسا، ونىڭ ىشىندە 72-ءسى جۇمىستان، 81-ءى لاۋازىمىنان بوساتىلعان. ا 68-ىنە لاۋازىمعا تولىق سايكەس كەلمەۋ تۋرالى ەسكەرتۋ بەرىلسە، 10 تۇلعانىڭ لاۋازىمى تومەندەتىلگەن، 145-ىنە قاتاڭ سوگىس جاريالانعان.

باقىلاۋدىڭ بولماۋى مەن باعىنىشتىلارىمەن زاڭ بۇزۋشىلىقتارعا جول بەرگەنى ءۇشىن ءار ءتۇرلى دەڭگەيدەگى 250 باسشى تارتىپتىك جاۋاپكەرشىلىككە تارتىلعان. ونىڭ 46-سى لاۋازىمىنان، جەتەۋى جۇمىستان بوساتىلعان.

وسى ارادا سىبايلاس جەمقورلىققا قارسى ءىس قيمىل اگەنتتىگى تاراتقان بىرقاتار دەرەكتەرگە توقتالا كەتەيىك. 25 شىلدەدە يندۋستريا جانە ينفراقۇرىلىمدىق دامۋ مينيسترلىگى يندۋستريالىق دامۋ جانە ونەركاسىپتىك قاۋىپسىزدىك كوميتەتى اقمولا وبلىسى بويىنشا دەپارتامەنتىنىڭ باسشىسى مولداعۇلوۆقا قاتىستى سوت ۇكىمى زاڭدى كۇشىنە ەندى. وسى جىلدىڭ مامىر ايىندا ول تۇلعالار توبىمەن الدىن الا ءسوز بايلاسۋ ارقىلى كاسىپكەردەن 700 مىڭ تەڭگە سوماسىندا سىياقى الىپ، ونەركاسىپتىك قاۋىپسىزدىك سالاسىندا اتتەستات الۋعا قاتىستى وڭ شەشىم قابىلداۋعا ۋادە بەرگەن.

شەنەۋنىك قىلمىس جاساعانى ءۇشىن قر قك 190-بابىنىڭ 3-بولىگى 2-تارماعى بويىنشا كىنالى دەپ تانىلدى. سونىڭ سالدارىنان وعان ون ەسە كوپ 7 ملن تەڭگە مولشەرىندەگى ايىپپۇل تولەۋ مەن مەملەكەتتىك قىزمەتتە لاۋازىم اتقارۋ قۇقىعىنان ءومىر بويىنا ايىرۋ جازاسى تاعايىندالدى.

يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ توراعاسى بايتوۆقا تىكەلەي باعىنىستى قىزمەتكەردىڭ تاراپىنان جاسالعان سىبايلاس جەمقورلىعى ءۇشىن كوميتەت باسشىسىن تارتىپتىك جاۋاپكەرشىلىككە تارتۋ ماسەلەسى قارالۋى ءتيىس ەدى. الايدا كوميتەت توراعاسى بايتوۆ جاۋاپكەرشىلىككە تارتىلعان مولداعۇلوۆقا قاتىستى سوت ۇكىمىنىڭ زاڭدى كۇشىنە ەنۋىنە دەيىن ءوز ەركىمەن قىزمەتىنەن بوساتىلدى.

قوستاناي وبلىسى بويىنشا سىبايلاس جەمقورلىققا قارسى قىزمەت اكىمدىكتىڭ بىرقاتار لاۋازىمدى تۇلعالارىنا قاتىستى سوتقا دەيىنگى تەرگەۋ جۇرگىزۋدە. ولار دۇكەن قۇرىلىسىنا ارنالعان جەر ۋچاسكەسىنىڭ نىسانالى ماقساتىن زاڭسىز وزگەرتۋمەن جانە ساۋلەت-جوسپارلاۋ تاپسىرماسىن بەرۋمەن ايقىندالعان لاۋازىمدىق وكىلەتتىكتەرىن اسىرا پايدالاندى دەگەن كۇدىككە ىلىنگەن.

23 شىلدەدە قوستاناي قالاسى اكىمىنىڭ وكىمىمەن تەرىس سەبەپتەر بويىنشا تەرگەۋدەگى قوستاناي قالاسى اكىمىنىڭ ورىنباسارى فينك اتقارىپ وتىرعان مەملەكەتتىك لاۋازىمىنان بوساتىلدى. ەگەر ونىڭ كىناسى سوتتا دالەلدەنسە، وندا 10 كۇنتىزبەلىك كۇن ىشىندە قالا اكىمى وتستاۆكاعا كەتۋى مۇمكىن.

سونداي-اق قوستاناي وبلىسى اكىمىنىڭ وكىمىمەن ءبىلىم باسقارماسىنىڭ باسشىسى تسىمباليۋك ءوز ەركىمەن جۇمىستان بوساتىلدى. 29 شىلدەدە وعان باعىنىشتى ءبىلىم باسقارماسى جانىنداعى «اقپاراتتاندىرۋ جانە ءبىلىم ساپاسىن باعالاۋ ورتالىعى» كمم-ءنىڭ باسشىسى پاۆليچەنكو قىزمەتتەردى مەملەكەتتىك ساتىپ الۋ تۋرالى شارت بويىنشا كەزەكتى تولەمدى جەدەل اۋدارۋعا پارا العانى ءۇشىن قر قك 367-بابىنىڭ 1-بولىگى بويىنشا سوت ۇكىمىمەن كىنالى دەپ تانىلدى (ۇكىم زاڭدى كۇشىنە ەنبەگەن).

3 تامىزدا اكىمشىلىك قۇقىق بۇزۋشىلىق بويىنشا ەكى سوت شەشىمى قابىلداندى.

جۇرگىزىلگەن ءتيىستى جۇمىستاردىڭ ناتيجەسىندە مەملەكەت قازىناسى 2،2 ملن تەڭگەگە جۋىق ەسەلەنگەن ايىپپۇل ەسەبىنەن تولىقتىرىلماق.