كەزىندە دۇنيەجۇزىلىك بوكس سەرياسىندا (WSB) جاسىنداي جارقىراعان مەيىرىم نۇرسۇلتانوۆ كاسىپقوي رينگتە دە ءوزىن جاقسى قىرىنان كورسەتۋدە. ورتا سالماقتا جۇدىرىقتاساتىن 27 جاستاعى سەمەي ءوڭىرىنىڭ تۋماسى ءتورت جىلعا جۋىق ۋاقىت ارالىعىندا 13 كەزدەسۋ وتكىزىپ, بارلىعىندا جەڭىسكە جەتتى. سەگىز قارسىلاسىن ەسىنەن تاندىردى. قازىر ول سەگىزىنشى ورىندى يەلەنۋدە.
ەكىنشى ورتا سالماقتاعى ايدوس ەربوسىن ۇلى بىردەن ءتورت ساتىعا جوعارىلاپ, بۇل كۇندەرى توعىزىنشى ورىنعا تۇراقتادى. 28 جاستاعى قانداسىمىز 14 باسەكەنىڭ بارلىعىندا باسىمدىق تانىتىپ, توعىز جەكپە-جەكتى مەرزىمىنەن بۇرىن اياقتادى. سوڭعى رەت ول 26 شىلدەدە مينسكىدە گەرمانيالىق نۋحۋ ءلاۆالدى ەكى رەت نوكداۋنعا جىبەرىپ, ناتيجەسىندە ۇپاي سانىمەن بولاتىن.
IBF رەيتينگىندە "توپ-10" بوكسشىنىڭ ساناتىنا قوسىلۋعا جانىبەك ءالىمحان ۇلى جاقىن تۇر. ازىرگە ول 11 ورىندى يەلەنۋدە. ورتا سالماقتا كۇش سىناسىپ جۇرگەن 27 جاستاعى جەتىسۋ ءوڭىرىنىڭ تۇلەگى كاسىپقويلار اراسىندا سەگىز جەكپە-جەك وتكىزىپ, بارلىعىن ءوز پايداسىنا شەشتى. قازاق جىگىتى سول باسەكەلەردىڭ تەڭ جارتىسىن نوكاۋتپەن اياقتادى.
