دەپۋتاتتاردىڭ ايماقتارداعى ساپارى جالعاسۋدا

پارلامەنت • 10 تامىز، 2020

دەپۋتاتتاردىڭ ايماقتارداعى ساپارى جالعاسۋدا

29 رەت كورسەتىلدى

سەنات دەپۋتاتى ر.ابدىكەروۆ جۇمىس ساپارىمەن قاراعاندى وبلىسىندا بولدى. ول وڭىردەگى بىرنەشە اۋداننىڭ تۇرعىندارىمەن كەزدەسىپ، قۇرىلىس نىساندارىنا، مەكتەپتەر مەن مەديتسينالىق مەكەمەلەرگە باردى.

Egemen Qazaqstan

سەناتور مەكتەپ، كوللەدج عيماراتى مەن دارىگەرلەرگە ارنالعان جاتاقحانا قۇرىلىسىمەن تانىستى. ر.ابدىكەروۆ سوت جۇيەسىنىڭ وكىلدەرىمەن دە كەزدەستى. ول بىرقاتار زاڭدارعا وزگەرىستەر مەن تولىقتىرۋلار ەنگىزىلگەنىنە توقتالىپ، ولار حالىقتىڭ ءال-اۋقاتىن جاقسارتۋعا باعىتتالعانىن ايرىقشا اتاپ ءوتتى. سەناتور اۋىلدارعا ساپارىندا اۋىل شارۋاشىلىعىنىڭ دامۋىنا ەرەكشە نازار اۋداردى. فەرمەرلەر ەگىن ەگۋ اۋماعىن، مال باسىن ارتتىرۋ ماقساتىندا قوسىمشا سۋبسيدياعا مۇقتاج ەكەنىن جەتكىزدى.

* * *

سەناتور ب.شەلپەكوۆ ماڭعىستاۋ وبلىسىندا جۇمىس ساپارىمەن بولدى. ساپار اياسىندا ءوڭىر باسشىلارىمەن جانە ءماسليحات دەپۋتاتتارىمەن، كاسىپكەرلەرمەن، قوعام بەلسەندىلەرىمەن جانە ءبىلىم سالاسىنىڭ قىزمەتكەرلەرىمەن كەزدەستى. سەناتور جاڭا وقۋ جىلىندا پاندەمياعا بايلانىستى قاشىقتان وقىتۋ ءۇشىن مۇعالىمدەر مەن وقۋشىلاردى كومپيۋتەرلەرمەن قامتاماسىز ەتىپ، ينتەرنەتكە قولجەتىمدىلىكتى ارتتىرۋدىڭ ماڭىزىن جەتكىزدى. كەزدەسۋدە مەكتەپتەردى قارجىلاندىرۋ، پەداگوگتاردىڭ مارتەبەسىن كوتەرۋ، مەكتەپ ديرەكتورلارىن تاعايىنداۋدىڭ جاڭا ءتارتىبى ماسەلەلەرى ءسوز بولدى. ول بالالارعا قاتىستى قىلمىستىڭ الدىن الۋ ماسەلەسىنىڭ ماڭىزىنا پەداگوگتەردىڭ نازارىن اۋدارتتى. سونىمەن قاتار سەناتور وڭىرلىك ەنەرگەتيكا سالاسىنىڭ ماماندارىمەن كەزدەسىپ، وسى سالانىڭ ماسەلەلەرى مەن بولاشاعىن تالقىلادى.

* * *

سەنات دەپۋتاتى س.ەڭسەگەنوۆ اتىراۋ وبلىسىنىڭ تۇرعىندارىمەن كەزدەسۋى بارىسىندا رەسەي جالعا العان تايسويعان پوليگونىنىڭ اۋماعىنان قىزىلقوعا اۋدانىنىڭ 750 گەكتار جەرى قايتارىلعانىن ءسوز ەتتى. كوپ جىلدار بويى رەسەي تاراپىمەن جۇرگىزىلگەن كەلىسسوزدەردەن كەيىن جالعا بەرۋ جونىندەگى كەلىسىمشارتقا وزگەرىستەر ەنگىزىلىپ، ۇلكەن اۋماقتى الىپ جاتقان جايىلىم جەرى زاڭدى تۇردە ءوڭىر تۇرعىندارىنىڭ يگىلىگىنە قايتارىلعان ەدى. سونىڭ ارقاسىندا جەرگىلىكتى شارۋالار مال ءوسىرۋدى قولعا السا، مۇناي-گاز كومپانيالارى ەكى بىردەي جاڭا كەن ورنىن يگەرە باستادى. سونىمەن قاتار سەناتور تايسويعانداعى شارۋا قوجالىقتارىنا ارنايى بارىپ، شارۋالارمەن كەزدەستى. تۇرعىندار پوليگوندى رەسەيگە جالعا بەرۋگە قاتىستى كەيبىر ماسەلەلەردىڭ وڭ شەشىلۋىنە بايلانىستى جەر الىپ، ءوز كاسىبىن باستاۋعا مۇمكىندىك تۋعانىن ايتتى. قازىرگى تاڭدا بۇرىنعى پوليگون اۋماعىندا 33 شارۋا قوجالىعى جۇمىس ىستەپ جاتىر.

* * *

سەناتور ە.سۇلتانوۆ سولتۇستىك قازاقستان وبلىسىنا ساپارى بارىسىندا قىزىلجار، اققايىڭ، ايىرتاۋ جانە ەسىل اۋداندارىندا بولدى. وڭىردە دەپۋتات مەملەكەتتىك باعدارلامالاردىڭ، ونىڭ ىشىندە «اۋىل – ەل بەسىگى» باعدارلاماسىنىڭ قالاي ورىندالىپ جاتقانىن ءبىلۋ ءۇشىن ءتۇرلى نىسانداردى ارالادى. ە.سۇلتانوۆ استراحانكا، سميرنوۆو جانە انتونوۆكا اۋىلدارىنىڭ تۇرعىندارىمەن كەزدەسىپ، اتالعان ەلدى مەكەندەردى سۋمەن جابدىقتاۋ جانە اباتتاندىرۋ ماسەلەلەرىن تالقىلادى. دەپۋتات جوندەلگەن بالاباقشالار مەن مەكتەپتەرگە، سونداي-اق جاڭا اۋداندىق فەلدشەرلىك پۋنكتكە باردى. سەناتور ءوز ساپارىندا اۋىل شارۋاشىلىعىن دامىتۋ تاقىرىبىنا ءجىتى نازار اۋداردى.

* * *

سەنات دەپۋتاتى ب.جۇماعۇلوۆ ءا.بوكەيحان اتىنداعى قازاق ورمان شارۋاشىلىعى جانە اگروورمانمەليوراتسيا عىلىمي-زەرتتەۋ ينستيتۋتىنىڭ دەندرولوگيالىق ساياباعىندا بولدى. ششۋچە قالاسىنداعى بۇل عىلىمي ورتالىقتىڭ قىزمەتىمەن تانىسۋ بارىسىندا سەناتور وسىمدىكتەردىڭ 600-دەن استام ءتۇرى ۇسىنىلعان ينترودۋتسەنتتەر توپتامالارىنىڭ ارالۋاندىعىنا نازار اۋداردى. ينستيتۋت ورمان فلوراسىن ساقتاۋمەن جانە كوبەيتۋمەن، ورمان ەكپەلەرىن ادام ومىرىندە پايدالانۋدىڭ جاڭا مۇمكىندىكتەرىن قامتاماسىز ەتۋمەن اينالىسادى. سەناتور ەلوردا اينالاسىن جانە ەلىمىزدىڭ ءىرى قالالارىن كوگالداندىرۋ، ورمان عىلىمىن دامىتۋ، عزي نىساندارىنىڭ ينفراقۇرىلىمىن جاڭعىرتۋ، قازاقستاندا تۋىندايتىن ەكولوگيالىق پروبلەمالاردى شەشۋدەگى عالىمداردىڭ ءرولى ماسەلەلەرىن كوتەردى.