ۇكىمەت • 07 تامىز، 2020

ۇلتتىق سەرتيفيكاتتاۋ جۇيەسى قالاي دامۋدا؟

33 رەت كورسەتىلدى

2020 جىلدىڭ قاڭتار ايىندا ۇكىمەتتىڭ كەڭەيتىلگەن وتىرىسىندا مەملەكەت باسشىسى ق.توقاەۆ ۇلتتىق سەرتيفيكاتتاۋ جۇيەسىن دامىتۋدى، ەلدىڭ ىشكى نارىعىنىڭ قاۋىپسىزدىگىن قامتاماسىز ەتۋ ءۇشىن ۇلتتىق ستاندارتتارعا بەدەل مەن سەنىمدى قايتارۋدى تاپسىردى. قازاقستان ۇكىمەتىنە "تەحنيكالىق رەتتەۋ تۋرالى" زاڭدى جاڭا رەداكتسيادا دايىنداۋ جانە ونى 2020 جىلدىڭ سوڭىنا دەيىن قابىلداۋدى قامتاماسىز ەتۋ تاپسىرىلدى. بۇل تۋرالى پرەمەر-ءمينيستردىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

ەل پرەزيدەنتى اتاپ وتكەندەي، تەحنيكالىق رەتتەۋ جانە اككرەديتتەۋ تۋرالى زاڭناما 10 جىلدان استام ۋاقىت بۇرىن قابىلدانعان جانە قازىرگى تالاپتارعا ساي كەلمەيدى. 

ۇلتتىق سەرتيفيكاتتاۋ جۇيەسى — مەملەكەتتىك تەحنيكالىق رەتتەۋ جۇيەسىنىڭ ءبىر بولىگى جانە ءونىمدى ءوندىرۋ مەن اينالىمعا شىعارۋ سالالارىن قامتيدى. قازاقستاندا ەكى تەحنيكالىق رەتتەۋ جۇيەسى — ۇلتتىق جانە ۇلتتىقتان جوعارى (ەاەو تەحنيكالىق رەتتەۋ جۇيەسى) جۇيەلەر بار. ۇلتتىق جۇيەدە سەرتيفيكاتتاۋ ەرىكتى جانە مىندەتتى تۇردە، ۇلتتىقتان جوعارىدا – تەك مىندەتتى تۇردە جۇرگىزىلەدى.

ءونىمنىڭ، قىزمەتتەردىڭ جانە تاۋارلاردىڭ ساپاسى مەن قاۋىپسىزدىگى بويىنشا تالاپتارعا سايكەستىگىن راستاۋ بۇل، ەڭ الدىمەن، تاۋاردى ءوندىرۋشىنىڭ نەمەسە قىزمەتتى جەتكىزۋشىنىڭ نورماتيۆتىك قۇجاتتاردا بەلگىلەنگەن ساپا پارامەترلەرىنە سايكەس كەلۋىنىڭ كەپىلدىگى. سونىمەن قاتار بۇل قۇجات ءونىمنىڭ نەمەسە قىزمەتتىڭ ونىڭ الەۋەتتى تۇتىنۋشى ءۇشىن قاۋىپسىزدىگىن كۋالاندىرادى. 

ءونىمنىڭ بەلگىلەنگەن تالاپتارعا سايكەستىگىن راستايتىن ساپا مەن قاۋىپسىزدىكتىڭ ەڭ ۇزدىك كەپىلى — سەرتيفيكاتتاۋ. سونىمەن قاتار سايكەستىك تۋرالى دەكلاراتسيا ونى رەسىمدەۋدىڭ وڭايلاتىلعان شارتتارىنا قاراماستان، ەلدە وندىرىلەتىن نەمەسە اكەلىنەتىن تاۋارلاردى وتكىزۋگە قۇقىق بەرەتىن قۇجات بولىپ سانالادى. ەلىمىزدە سەرتيفيكاتتاۋ بولماسا، نارىق ادام دەنساۋلىعى مەن جالپى ەلدەگى ەكولوگيالىق احۋال ءۇشىن قاۋىپتى ساپاسىز تاۋارلارعا تولىپ كەتەر ەدى. ستاندارتتار ءونىم دايىنداۋشىلارعا بەرىلگەن ساپا مەن قاۋىپسىزدىك سيپاتتامالارى بار ءونىم شىعارۋعا كومەكتەسەدى.

سەرتيفيكاتتاۋ وندىرىلەتىن ءونىمنىڭ، ۇسىنىلاتىن قىزمەتتەردىڭ، ۇيىمدى باسقارۋ جۇيەسىنىڭ ساپاسىن ارتتىرۋى ءتيىس جانە قازاقستاندىق تاۋارلار مەن قىزمەتتەردىڭ باسەكەگە قابىلەتتىگىن ارتتىرۋى ءتيىس.

 

ۇلتتىق سەرتيفيكاتتاۋ جۇيەسىن نە ءۇشىن دامىتۋ قاجەت؟

2019 جىلى پرەزيدەنتتىڭ تاپسىرماسىنا سايكەس پروكۋراتۋرا ورگاندارى تەحنيكالىق رەتتەۋ جانە مەترولوگيا كوميتەتىمەن بىرلەسىپ، اككرەديتتەۋ سۋبەكتىلەرىنە كەشەندى تەكسەرىس جۇرگىزدى. باس پروكۋراتۋرانىڭ ۇسىنىسىنا بەرىلگەن انىقتامادا ءونىمدى سەرتيفيكاتتاۋداعى جانە تاۋاردىڭ شىعارىلعان ەلىن انىقتاۋداعى بۇزۋشىلىقتار مەن سايكەسسىزدىكتەردىڭ 18-گە جۋىق ءتۇرى جازىلعان. اتاپ ايتساق:

  • جالعان سەرتيفيكاتتار بەرۋ;

  • اككرەديتتەۋ توقتاتىلعاننان كەيىن سەرتيفيكاتتار بەرۋ;

  • قۇرىلعىلاردى تەكسەرۋسىز پايدالانۋ;

  • سەرتيفيكاتتاۋ جانە سىناۋ راسىمدەرىن بۇزا وتىرىپ سەرتيفيكاتتار بەرۋ (وندىرىسكە شىقپاي، سىناق جۇرگىزبەي بەرۋ);

  • قۇجاتتارى تولىق ەمەس دەكلاراتسيانى تىركەۋ;

  • اتتەستاتتالماعان تۇلعانىڭ تەكسەرۋى;

  • بەيتاراپتىق ءپرينتسيپىن بۇزۋ;

  • اككرەديتاتسيادان تىس سەرتيفيكاتتاۋ;

  • سالىق مىندەتتەمەلەرىن ورىنداماۋ;

  • ەكونوميكالىق كونتراباندا. 

"سەرتيفيكاتتاۋ جۇيەسىن" قۇرۋ جونىندەگى تاپسىرمانى "سايكەستىكتى باعالاۋ" دەگەن ورتاۇ جالپى تەرمين ارقىلى قاراۋ قاجەت. قازىرگى تاڭدا سايكەستىكتى باعالاۋ جۇيەسى جانە ونىڭ قۇرامداس بولىگى سەرتيفيكاتتاۋ جۇيەسى "تەحنيكالىق رەتتەۋ تۋرالى"، "سايكەستىكتى باعالاۋ سالاسىنداعى اككرەديتتەۋ تۋرالى" جانە "ستاندارتتاۋ تۋرالى" زاڭدارمەن، سونداي-اق بىرقاتار زاڭعا تاۋەلدى اكتىلەرمەن قۇرىلدى جانە رەتتەلەدى.

 

"ە-سەرتيفيكاتتاۋ" جۇيەسىن ىسكە اسىرۋ

وسى جىلدىڭ شىلدە ايىندا "ە-اككرەديتتەۋ" اقپاراتتىق جۇيەسى ىسكە قوسىلدى، ول سايكەستىكتى باعالاۋ جۇيەسىن تسيفرلاندىرۋ ۇدەرىسىندەگى ءبىرىنشى كەزەڭ بولىپ تابىلادى. "ە-اككرەديتتەۋ" اج اككرەديتتەۋدىڭ بارلىق پروتسەستەرىن تسيفرلاندىرۋعا جانە اككرەديتتەۋ ماتەريالدارىنىڭ قاداعالانۋىن قامتاماسىز ەتۋگە، الدىن الا باعالاۋ بويىنشا اككرەديتتەۋدى جۇرگىزۋ مەرزىمدەرىن ءۇش ەسە قىسقارتۋعا، سەرتيفيكاتتاۋ جۇيەسىن دامىتۋدىڭ بولجامدىلىعىن ارتتىرۋعا مۇمكىندىك بەرەدى. 

ەكىنشى كەزەڭدە 2021 جىلدىڭ ءبىرىنشى جارتىجىلدىعىندا "ە-سەرتيفيكاتتاۋ" جۇيەسىن ىسكە اسىرۋ جوسپارلانعان، ول سەرتيفيكاتتاۋ پروتسەسىنىڭ رەسمي جاعىن ايتارلىقتاي كۇشەيتەدى، سەرتيفيكاتتاۋ جونىندەگى قىزمەتكە مونيتورينگ جۇرگىزۋدى ءتيىمدى جۇزەگە اسىرۋعا مۇمكىندىك بەرەدى، سەبەبى جۇيە بارلىق مىندەتتى جولداردى مىندەتتى تۇردە تولتىرۋ قاجەتتىگىن كوزدەيدى. دەگەنمەن، كورىنەۋ جالعان اقپارات بەرۋ قاۋپى بولۋى مۇمكىن، ونى تۇراقتى مونيتورينگ جۇرگىزۋ ارقىلى ازايتۋعا بولادى. "ە-اككرەديتتەۋ" اقپاراتتىق جۇيەسى اياسىندا ءونىمنىڭ قاداعالانۋىن قامتاماسىز ەتۋ وسىنداي بۇزۋشىلىقتاردى انىقتاۋ دەڭگەيىن ارتتىرۋعا ىقپال ەتە الادى. 

"ە-اككرەديتتەۋ" اقپاراتتىق جۇيەسىن ەنگىزۋ سەرتيفيكاتتاۋ جونىندەگى قىزمەتتىڭ مونيتورينگىن ءتيىمدى جۇزەگە اسىرۋ مۇمكىندىگىن ەداۋىر جاقسارتادى. 

مىسالى: اككرەديتتەۋ نەمەسە اككرەديتتەۋدەن كەيىنگى باعالاۋ كەزىندە اككرەديتتەۋ سۋبەكتىلەرى، ادەتتە، ماماندار مەن جابدىقتاردىڭ بولۋى تۋرالى بارلىق قاجەتتى قۇجاتتار مەن كۋالىكتەردى ۇسىنادى. الايدا، باسقا سۋبەكتىدە تىركەلگەن جابدىقتار نەمەسە قىزمەتكەرلەر تۋرالى اقپارات بەرۋ جانە مانيپۋلياتسيالار ارقىلى اككرەديتتەۋ جونىندەگى ورگاننىڭ ماماندارىن جاڭىلىستىرۋدىڭ جوعارى قاۋپى بار. قازىرگى ۋاقىتتا مۇنداي مانيپۋلياتسيالاردى باقىلاۋ مۇمكىن ەمەس دەۋگە بولادى. وسىلايشا، جابدىقتار مەن قىزمەتكەرلەردى باقىلاۋ جۇيەسىنىڭ بولماۋىنا بايلانىستى بۇل سىن-تەگەۋرىن جوعارى دەڭگەيدە قالادى. بىراق بۇل ماسەلەنىڭ شەشىمى اقپاراتتىق جۇيەنى ەنگىزۋدەن جانە تسيفرلاندىرۋدان كورىنەدى.

 

قر جانە ەاەو تەحنيكالىق رەگلامەنتتەرىن بەلگىلەۋ 

سەرتيفيكاتتاۋدىڭ مىندەتتىلىگى قر جانە ەاەو تەحنيكالىق رەگلامەنتتەرىمەن بەلگىلەنەدى. تەحنيكالىق رەگلامەنتتەردىڭ كۇشى قولدانىلاتىن تاۋارلار سايكەستىكتى مىندەتتى تۇردە باعالاۋعا جاتادى.

وداق اۋماعىندا اينالىمعا شىعارىلاتىن ءونىم قاۋىپسىز بولۋى ءتيىس. تالاپتارى وداقتىڭ تەحنيكالىق رەگلامەنتتەرىمەن بەلگىلەنبەگەن ونىمدەردىڭ قاۋىپسىزدىگى مەن اينالىمىن قامتاماسىز ەتۋ ەرەجەلەرى مەن ءتارتىبى وداق اياسىنداعى حالىقارالىق كەلىسىممەن انىقتالادى.

سونىمەن قاتار ەۋرازيالىق ەكونوميكالىق وداق اياسىنداعى تەحنيكالىق رەتتەۋ تۋرالى حاتتاماعا سايكەس، ەاەو تەحنيكالىق رەگلامەنتتەرىندە تەحنيكالىق رەتتەۋ وبەكتىلەرىنە قويىلاتىن مىندەتتى تالاپتار، سونداي-اق ءونىمدى سايكەستەندىرۋ ەرەجەلەرى، سايكەستىكتى باعالاۋ فورمالارى، سحەمالارى مەن راسىمدەرى بەلگىلەنەدى. وداقتىڭ تەحنيكالىق رەگلامەنتتەرىندە تەرمينولوگياعا، قاپتاۋعا، تاڭبالاۋعا، زاتتاڭبالارعا جانە ولاردى جابىستىرۋ (سالۋ) تارتىبىنە قويىلاتىن تالاپتار، سانيتاريالىق تالاپتار مەن راسىمدەر، سونداي-اق جالپى سيپاتى بار ۆەتەرينارلىق-سانيتارلىق جانە كارانتيندىك فيتوسانيتارلىق تالاپتار بولۋى مۇمكىن. 

وداقتىڭ تەحنيكالىق رەگلامەنتتەرىندە مۇشە مەملەكەتتەرگە ءتان كليماتتىق جانە گەوگرافيالىق فاكتورلارعا نەمەسە تەحنولوگيالىق ەرەكشەلىكتەرگە بايلانىستى ەرەكشەلىكتەردى كورسەتەتىن جانە ءتيىستى مۇشە مەملەكەتتەردىڭ اۋماقتارىندا عانا قولدانىلاتىن ەرەكشە تالاپتار بولۋى مۇمكىن. 

سونداي-اق ونىمگە جانە ونىمگە قويىلاتىن تالاپتارعا بايلانىستى جوبالاۋ (ىزدەستىرۋدى قوسا العاندا)، ءوندىرۋ، قۇرىلىس، مونتاجداۋ، باپتاۋ، پايدالانۋ، ساقتاۋ، تاسىمالداۋ، وتكىزۋ جانە كادەگە جاراتۋ پروتسەستەرىنە قويىلاتىن ارنايى تالاپتار، تەرمينولوگياعا، قاپتاۋعا، تاڭبالاۋعا، زاتتاڭبالارعا جانە ولاردى سالۋ ەرەجەلەرىنە قويىلاتىن تالاپتار، ازاماتتاردىڭ جەكەلەگەن ساناتتارىن (كامەلەتكە تولماعاندار، جۇكتى ايەلدەر، بالا ەمىزەتىن انالار، مۇمكىندىگى شەكتەۋلى جاندار جانە ت. ب.) قورعاۋدى قامتاماسىز ەتەتىن تالاپتار بولۋى مۇمكىن. 

كوپتەگەن ەلدەردە سەرتيفيكاتتاۋ جۇيەلەرى ءوزارا ۇقساس. حالىقارالىق تالاپتارعا سايكەس ازىرلەنگەن نورماتيۆتىك قۇجاتتاردا ورىندالۋى بىرىڭعاي تالاپتاردىڭ ورىندالۋىن قامتاماسىز ەتەتىن، سونداي-اق تەحنيكالىق كەدەرگىلەردى بارىنشا شەكتەيتىن سەرتيفيكاتتاۋ جۇرگىزەتىن ورگاندارعا قويىلاتىن جالپى تالاپتار بەلگىلەنگەن. 

بۇگىنگى تاڭدا ءونىمدى سەرتيفيكاتتاۋ جونىندەگى اككرەديتتەلگەن ورگاندار ءونىمدى سەرتيفيكاتتايدى.

 

قىزمەت كورسەتۋ بويىنشا "جوسىقسىز" كومپانيالاردى انىقتاۋ 

ەلىمىزدە سەرتيفيكاتتاۋ جانە سىناۋ قىزمەتتەرىن كورسەتۋ بويىنشا «جوسىقسىز» كومپانيالاردى انىقتاۋ ماقساتىندا ءونىمدى سەرتيفيكاتتاۋ سالاسىندا ءتارتىپ ورناتۋ بويىنشا كەشەندى جۇمىس جۇرگىزىلىپ جاتىر. 

سونىڭ ناتيجەسىندە، بۇگىنگى تاڭدا ەاەو ەلدەرىنىڭ ونىمدەرىن سەرتيفيكاتتاۋ جونىندەگى ورگاندارى بەرگەن سايكەستىكتى راستاۋ جونىندەگى 1009 قۇجاتتىڭ كۇشى جويىلدى، وسىلايشا 1 ملرد-تان استام تەڭگە سوماسىنا قاۋىپتى ءونىمدى اكەلۋگە تىيىم سالىندى.

بۇدان وزگە 2020 جىلدىڭ ءبىرىنشى جارتىجىلدىعىندا 62 باقىلاۋ سۋبەكتىسى تەكسەرىلدى، ولاردىڭ 35-ءى تەرىس ناتيجەمەن اياقتالدى. سونىمەن قاتار باسقا مەملەكەتتىك ورگاندارمەن بىرلەسىپ جۇرگىزىلگەن تەكسەرۋلەردىڭ ناتيجەلەرى بويىنشا 94 باقىلاۋ سۋبەكتىسى تەكسەرىلدى، ولاردىڭ 43-ءى تەرىس ناتيجەمەن اياقتالدى. سونىڭ ناتيجەسىندە 37 ملن-نان استام تەڭگە سوماسىنا ايىپپۇل سالىندى. 

سونداي-اق اككرەديتتەۋ سۋبەكتىلەرىنىڭ قىزمەتىنە مونيتورينگ جۇرگىزۋ اياسىندا 2019 جىلعى ماۋسىمنان باستاپ 2020 جىلعى ماۋسىمعا دەيىن 97 ورگاننىڭ (اككرەديتتەۋ سۋبەكتىلەرىنىڭ) اككرەديتتەۋ اتتەستاتتارى كەرى قايتارىپ الىندى. 

اككرەديتتەۋ سۋبەكتىلەرىنىڭ قىزمەتىنە مونيتورينگ جۇرگىزۋ اياسىندا 2020 جىلدىڭ 6 ايىندا سايكەستىكتى راستاۋدىڭ 428 قۇجاتى بويىنشا بۇزۋشىلىقتار انىقتالدى، ونىڭ ىشىندە: 

  • 85 سەريالىق وندىرىسكە كز ۇلگىسىنىڭ سايكەستىك سەرتيفيكاتى، ءونىم پارتياسىنا 59 كز ۇلگىسىنىڭ سايكەستىك سەرتيفيكاتى;

  • 67 سەريالىق وندىرىسكە ەاەو سايكەستىك سەرتيفيكاتى، 28 ءونىم پارتياسىنا ەاەو سايكەستىك سەرتيفيكاتى;

  • 89 سەريالىق وندىرىسكە EAەو سايكەستىگى تۋرالى دەكلاراتسيا، ءونىم پارتياسىنا EAەو سايكەستىگى تۋرالى 100 دەكلاراتسيا. 

بۇزۋشىلىقتار نەگىزىنەن جەڭىل ونەركاسىپ، تومەن ۆولتتى جابدىقتار، ازىق-ت ۇلىك ونەركاسىبى جانە قۇرىلىس سالالارى بويىنشا انىقتالعان. بۇل جۇمىستى مينيسترلىك تۇراقتى نەگىزدە جۇرگىزەدى. 

سايكەستىكتى باعالاۋ سالاسىنداعى پروبلەمالاردىڭ تۋىنداۋىنىڭ نەگىزگى سەبەپتەرى — سايكەستىكتى باعالاۋ زاڭناماسى مەن بيزنەس-پروتسەستەرىنىڭ ەسكىرۋى، سايكەستىكتى باعالاۋ پروتسەستەرىنىڭ تومەن تەحنولوگيالىعى، باقىلاۋدىڭ، رەتتەۋدىڭ بالاما تەتىكتەرىنىڭ بولماۋى.

 

مەنەدجمەنت جۇيەسىن دامىتۋ

مەنەدجمەنت جۇيەسى — بۇل كۇردەلى باسقارۋ مەحانيزمى. ماسەلەن، ءونىم – ناقتى فيزيكالىق-حيميالىق قاسيەتتەرى بار، وبەكتيۆتى قاسيەتتەرىن زەرتحانادا ەكسپەريمەنتالدى جولمەن ورناتۋعا بولاتىن ماتەريالدىق وبەكت. سونىمەن قاتار ساپا مەنەدجمەنتى جۇيەسىنىڭ وبەكتيۆتى قاسيەتتەرىن دە انىقتاۋعا بولادى، بىراق بۇل باسقا ادىستەرمەن — قۇجاتتامانى تالداۋ، بيزنەس-پروتسەستەردىڭ ناقتى جاعدايى تۋرالى اقپارات جيناۋ، وسى پروتسەستەردى ورىنداۋشىلارمەن سۇحبات جۇرگىزۋ ارقىلى جانە ت. ب. جاسالادى.

بۇگىنگى تاڭدا، قازاقستاندا ۇيىمداردا مەنەدجمەنت جۇيەسىن ەنگىزۋ جۇمىستارى سەرتيفيكاتتاۋ جونىندەگى اككرەديتتەلگەن ورگاندا سەرتيفيكاتتاۋدان ءوتۋ جانە مەنەدجمەنت جۇيەسىنىڭ سەرتيفيكاتىن الۋ ماقساتىندا نەگىزىنەن تەندەرلەرگە، مەملەكەتتىك ساتىپ الۋعا قاتىسۋ ءۇشىن جۇرگىزىلەدى، ويتكەنى مەنەدجمەنت جۇيەلەرىنىڭ سايكەستىك سەرتيفيكاتتارىنىڭ بولۋى شارتتى جەڭىلدىكتەردى الۋعا بايلانىستى كونكۋرستار كەزىندە ارتىقشىلىق بەرەدى. 

الايدا، قازاقستاندا مەنەدجمەنت جۇيەسىن ەنگىزۋدىڭ پايداسىن كوبىسى تۇسىنە بەرمەيدى. بۇعان سەبەپ — بىلىكتى كونسالتينگتىك ۇيىمداردىڭ، مامانداردىڭ جانە ت. ب. بولماۋى. 

ءونىمدى سەرتيفيكاتتاۋ مەن مەنەدجمەنت جۇيەلەرىن سەرتيفيكاتتاۋ اراسىنداعى ايىرماشىلىق سايكەستىكتى باعالاۋدىڭ مىندەتتىلىگى ماسەلەسىندە دە بار. مەنەدجمەنت جۇيەسى — بۇل تۇراقتى جاقسارتۋ جۇيەسى. ءونىم ساپالى ءارى ساپاسىز بولۋى مۇمكىن، الايدا وسى مەنەدجمەنت جۇيەلەرىنسىز دە قاۋىپسىز بولۋى مۇمكىن، وسى سەبەپتى مەنەدجمەنت جۇيەلەرىنىڭ سايكەستىگىن زاڭدى تۇردە راستاۋ ەشقاشان مىندەتتى سەرتيفيكاتتاۋ سالاسىنا ەنگىزىلمەيدى.

 

قازاقستانداعى ۇلتتىق سەرتيفيكاتتاۋ جۇيەسىنىڭ قالىپتاسۋى

قازاقستاندا ۇلتتىق سەرتيفيكاتتاۋ جۇيەسىن دامىتۋ 1991 جىلعى 5 ماۋسىمدا "تۇتىنۋشىلاردىڭ قۇقىقتارىن قورعاۋ تۋرالى" قازاق كسر زاڭى كۇشىنە ەنگەن ساتتەن باستالدى. وسىلايشا، اتالعان زاڭنىڭ 13-بابىنا سايكەس تۇتىنۋشىنىڭ ءونىمنىڭ، جۇمىستاردىڭ جانە قىزمەتتەردىڭ ءتيىستى ساپاسىنا قۇقىعىن جانە ولار تۋرالى اقپاراتتىڭ دۇرىستىعىن قامتاماسىز ەتۋ ءۇشىن ساپانى باقىلاۋدى ارنايى ۋاكىلەتتى مەملەكەتتىك ورگاندار (قازباسستاندارتتىڭ اۋماقتىق ورگاندارى جانە ت. ب.) جۇزەگە اسىرادى. 

كەلەسى جىلدارى ءارتۇرلى ونىمدەردىڭ سايكەستىگىن راستاۋدىڭ زاڭنامالىق نەگىزى قالىپتاستى. تەكسەرۋ وبەكتىلەرى كاسىپورىن مەنەدجمەنتى جۇيەسىنىڭ ساپاسى مەن ءونىمنىڭ ساپاسى بولدى. قر سەرتيفيكاتتاۋ جۇيەسى 2004 جىلعى 9 قاراشادا "تەحنيكالىق رەتتەۋ تۋرالى" قر زاڭى قولدانىسقا ەنگىزىلگەننەن كەيىن ودان ءارى دامي ءتۇستى.

سونىمەن قاتار قر-نىڭ كەدەن وداعىنا قوسىلۋىنا جانە ونىڭ بىرىڭعاي ەكونوميكالىق كەڭىستىكپەن، ال كەيىننەن ەۋرازيالىق ەكونوميكالىق وداقپەن دامۋىنا بايلانىستى مەملەكەتارالىق ەكونوميكالىق بىرلەستىك شەڭبەرىندە تەحنيكالىق رەتتەۋدى ۇيىمداستىرۋ جونىندەگى بارلىق نەگىزگى فۋنكتسيالار ۇلتتىق دەڭگەيدەن مەملەكەتتەن جوعارى دەڭگەيگە – ەۋرازيالىق ەكونوميكالىق كوميسسياعا بەرىلدى.

تيىسىنشە تەحنيكالىق رەتتەۋ سالاسىنداعى زاڭنامانىڭ بارلىق نورمالارى 2010 جىلدان باستاپ كەدەن وداعىنىڭ زاڭناماسىمەن انىقتالىپ، ال 2014 جىلدان باستاپ ەۋرازيالىق ەكونوميكالىق وداقتىڭ زاڭناماسىمەن رەتتەلەدى.

العاشقى رەت مىندەتتى سەرتيفيكاتتاۋ قر-دا 1995 جىلى "ستاندارتتاۋ جانە سەرتيفيكاتتاۋ تۋرالى" قر زاڭىنا سايكەس ەنگىزىلدى، ال 1999 جىلى "سەرتيفيكاتتاۋ تۋرالى" قر جاڭا زاڭى قابىلداندى، وندا العاش رەت سەرتيفيكاتتاۋ سالاسىنداعى قوعامدىق قاتىناستار كەشەندى تۇردە رەتتەلدى، مەملەكەتتىك سەرتيفيكاتتاۋ جۇيەسىنىڭ قۇقىقتىق نەگىزدەرى جانە ءونىم، پروتسەستەر، جۇمىستار مەن قىزمەت كورسەتۋ ساپاسى ماسەلەلەرىندە مەملەكەت پەن تۇتىنۋشىلاردىڭ مۇددەلەرىن قورعاۋ شارالارى انىقتالدى. بۇرىنعى زاڭدى قايتا قاراۋ ونىمگە قويىلاتىن قولدانىستاعى تالاپتاردى حالىقارالىق ەرەجەلەرمەن ۇيلەستىرۋ جانە سەرتيفيكاتتاۋ سالاسىنداعى قۇقىقتىق، ەكونوميكالىق جانە الەۋمەتتىك نەگىزدەردى ناقتىلاۋ قاجەتتىلىگىنەن تۋىندادى.

سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار