كەشە استانادا مادەنيەت جانە اقپارات مينيسترلىگىنىڭ ۇيىمداستىرۋىمەن ءشامشى قالداياقوۆ اتىنداعى حالىقارالىق «مەنىڭ قازاقستانىم» اتتى ءان فەستيۆالىنىڭ اشىلۋ ءراسىمى ءوتتى.
كەشە استانادا مادەنيەت جانە اقپارات مينيسترلىگىنىڭ ۇيىمداستىرۋىمەن ءشامشى قالداياقوۆ اتىنداعى حالىقارالىق «مەنىڭ قازاقستانىم» اتتى ءان فەستيۆالىنىڭ اشىلۋ ءراسىمى ءوتتى.
قازاقستاننىڭ ءار وڭىرىنەن, سونداي-اق, قىتاي, رەسەي, موڭعوليا, وزبەكستان, قىرعىزستان رەسپۋبليكالارىنان وسىمەن 4-ءشى مارتە ءوتىپ وتىرعان ءشامشىنىڭ ءان بايقاۋىنا قاتىسۋشى ونەرلى ورەندەرگە مادەنيەت جانە اقپارات مينيسترلىگى مادەنيەت كوميتەتىنىڭ توراعاسى تىلەۋعالي قىشقاشباەۆ ساتتىلىك تىلەپ, انىمەن قانشاما ۇرپاق سۋسىنداعان كومپوزيتوردىڭ شىعارمالارىن ۇلىقتاۋ ءىسى مۇنان دا ۇلعايا تۇسەتىنىن تىلگە تيەك ەتتى
قازاقستاننىڭ حالىق ءارتىسى التىنبەك قورازباەۆ: «ءشامشى اعامىز وتكەن عاسىردىڭ ەلۋىنشى جىلدارى قازاق حالقىنىڭ ماڭدايىنا بىتكەن جارىق جۇلدىزى, جاراتقاننىڭ ەرەكشە سىيى دەپ بىلەمىن. باياعى ءبىرجان, اقان, كەنەندەردىڭ جالعاسى – ءشامشى اعامىزدىڭ ءانى بۇكىل قازاق دالاسىنا كەڭىنەن جايىلىپ كەتكەنى راس. بۇل بايقاۋ 90-جىلدارى باستالعان بولاتىن. شاكەڭە ارنالعان العاشقى شارا ءوزى تۋىپ-وسكەن وڭتۇستىگىندە باستالسا, ەكى جىلدان كەيىن جامبىلدا, ودان كەيىن قازاقستاننىڭ تۇكپىر-تۇكپىرىن ارالاپ كەتە باردى. بيىلعى فەستيۆالعا 4-5 مەملەكەتتەن ورىنداۋشىلار كەلىپ قاتىسۋدا. سوندىقتان قازىلار القاسىنىڭ توراعاسى رەتىندە ايتارىم, مۇندا وڭ كوز, سول كوز دەگەن نارسەگە جول بەرىلمەيدى جانە دە ونداي بارماق باستى, كوز قىسۋشىلىق ونەردە ەشقاشان بولماۋعا ءتيىس دەي كەلىپ, ۇسىنىس ايتتى. «جەر-جەردە ءشامشىنىڭ اتىن ۇلىقتاۋدا قىرۋار ءىس-شارالار اتقارىلۋدا. وعان راحمەت. بىراق كەيىنگى ءوسىپ كەلە جاتقان جاس ونەرپازدارعا ءبىر نارسە جەتپەيتىن سياقتى بولىپ كورىنىپ تۇرادى. بۇل – ءشامشى قالداياقوۆ اتىنداعى مەملەكەتتىك سىيلىق» دەدى.
راسىمەن كومپوزيتورعا كورسەتىلىپ جاتقان قۇرمەتتە شەك جوقتاي. شىمكەنت قالاسىنداعى فيلارمونياعا ەسىمى بەرىلگەن, شىرايلى شىم قالادا كوشەسى جاتىر كوسىلىپ, ساياباقتا قالداياقوۆ ەسكەرتكىشى مەنمۇندالايدى, اسەم الماتىدا كوشەسى تاعى بار دەگەندەي, تۋعان ولكەسى – ءشاۋىلدىر اۋىلىنداعى كومپوزيتور ەسىمىنە يە مۋزىكا مەكتەبىندە سانداعان شاكىرت ءبىلىم نارىمەن سۋسىنداپ وسۋدە. «شامشىعۇمىر» اتتى ەستەلىكتەر مەن ماقالالار جيناعى جارىق كوردى. بەلگىلى كومپوزيتور قالدىبەك قۇرمانالىنىڭ شامشىتانۋعا ءسىڭىرىپ جۇرگەن ەڭبەگى ءوز الدىنا. ەلوردا تورىندە بايتاق جۇرت كوز تىككەن بايگەنىڭ تالاي تالانتقا ارقا ءبىتىرىپ, دەلەبەسىن قوزدىرا تۇسكەن ءتۇرى بولسا مىناۋ. تاعى سونداي ءبىرازىن ايتۋدى ۇمىتىپ وتىرعان شىعارمىز. تاۋبە دەيىك. بىراق «ۆالس كورولى» اتانعان تۇلعانىڭ اندەرى ءالى دە تالاي تاڭداردى اتىرىپ, كۇندى ۇياسىنا قوندىرا بەرەرىن ەسكەرسەك, ىستەلگەن شارۋالار تەڭىزدىڭ تامشىسىنداي عانا بولىپ كورىنىپ تۇرادى.
حالىقارالىق «مەنىڭ قازاقستانىم» ءان فەستيۆالىنىڭ ماقساتى جاستاردىڭ شىعارماشىلىعىنا جان-جاقتى قولداۋ كورسەتۋ, قازاق ەستراداسى شەبەرلەرىنىڭ ونەرىن ناسيحاتتاۋ, دارىندى جاس كومپوزيتورلاردىڭ شىعارماشىلىعىن ۇشتاۋعا بارىنشا مۇمكىندىك تۋعىزۋ دەسەك, قازاق ەستراداسىنىڭ كەلەشەگى وسىنداي ۇلتتىق جوبالارمەن كەمەلدەنۋى كەرەك دەپ ەسەپتەيمىز. التىنبەك قورازباەۆ, التىناي جوراباەۆا, تولقىن زابيروۆا سىندى بەلگىلى انشىلەردىڭ ورىنداۋىندا كومپوزيتوردىڭ «تامدى ارۋى», «ءومىر-وزەن», «ارىس جاعاسىندا» اندەرى شاعالاداي سامعادى. ونەر سايىسى 25 قازاندا «قازاقستان» ورتالىق كونتسەرت زالىندا وتەتىن گالا-كونتسەرتپەن تۇيىندەلەدى دەپ كۇتىلۋدە. ەسكىرمەيتىن, ۋاقىتقا دەس بەرمەيتىن ءشامشى اندەرى عاجابى كوپ, ءبىر سيقىر!
قاراشاش توقسانباي,
«ەگەمەن قازاقستان».
–––––––––––––––––––––––––
سۋرەتتى تۇسىرگەن
ەرلان وماروۆ.
