ايماقتار • 06 تامىز، 2020

"مانياك شىقتى" دەپ ەلدى دۇرلىكتىرگەن تۇرعىن ەش جازاسىز كەتتى

69 رەت كورسەتىلدى

قازىر كوپتەگەن ادامداردىڭ قوعام الدىنداعى جاۋاپسىزدىعىنىڭ شەكتەن شىققان كەزەڭى بولىپ تۇر. سونىڭ ىشىندە بىرەۋگە دەگەن وكپەسىن ونىڭ سۋرەتىن الەۋمەتتىك جەلىدە "بۇل مانياك" دەپ فەيك جاريالاۋ ارقىلى كەك العاندار دا شىعىپ جاتىر.  سونداي ابەس قىلىقتى جۋىردا سولتۇستىك قازاقستان وبلىسىنداعى مامليۋت اۋدانى ورتالىعىنىڭ ءبىر تۇرعىنى جاساعان.

حالىقتىڭ دۇرلىگىپ، شوشىناتىنىن، سونىڭ ىشىندە جۇرەگىنە توسىن سالماق تۇسسە اۋىرىپ نەمەسە ءتىپتى تالىپ قالاتىن جاعدايعا ۇشىراپ قالاتىنى بارلارىن ويلاماعان اقىلسىز ايەل ءوزىنىڭ تانىسىنىڭ سۋرەتىن WhatsApp جەلىسىنە سالىپ، استىنا: "ساق بولىڭىزدار! مامليۋتكا قالاسىندا، جۇمىسشى كەنتىندە مانياك پايدا بولىپتى، كەشكىلىكتە ول ءوز قۇربانىن اڭديدى. 2020 ج. 30.07. جاس بويجەتكەننىڭ سوڭىنان قۋعان، ابىروي بولعاندا، قاشىپ قۇتىلعان. بۇرىن قىلمىستىق جاۋاپكەرشىلىككە تارتىلعان" ء(ماتىن وزگەرىسسىز كەلتىرىلگەن) دەگەن سوزدەر جازعان.

بۇل سۋىق حابار اۋداندىق پوليتسيا قىزمەتكەرلەرىنە جەتكەن سوڭ شۇعىل قيمىلداعان ساقشىلار حابارلامانىڭ اۆتورىن تەز ارادا تابادى. ول اۋدان ورتالىعىنىڭ 27 جاسار ايەل تۇرعىنى ەكەن. وزگەنى دە، قوعام الدىنداعى جاۋاپكەرشىلىكتى دە ويلاماي، تەك ءوزىن عانا ويلاعان ول 1982 جىلى تۋعان تانىسىنىڭ سۋرەتىن سالىپ، جوعارىدا ايتىلعان ءماتىندى ۆاتساپپەن تاراتقان...

ونىڭ ءىسى اكىمشىلىك قۇقىق بۇزۋشىلىق تۋرالى كودەكستىڭ 73-ءشى بابىنداعى "جالا جابۋ" بابى بويىنشا ايىپتالىپ، اكىمشىلىك سوت وتىرىسى بولعان. ناتيجەسىندە جابىرلەنۋشى تالاپ-ارىزىنان باس تارتىپ، ايەلمەن تاتۋلاسۋعا كەلىسىپتى. ال اقپاراتتىڭ جالعان ەكەندىگى پوليتسيا ءبولىمىنىڭ 20 قىزمەتكەرىنىڭ كۇشىمەن 2-3 ساعات بويى WhatsApp مەسسەندجەرىندە تىركەلگەن اۋدان ورتالىعىنىڭ بارلىق توپتارىنا جەتكىزىلگەن.

ءسويتىپ جالعان حابار تاراتۋشى ەشقانداي جازاسىز كەتتى. جابىرلەنۋشى تالاپ-ارىزىنان باس تارتقان سوڭ سولاي بولادى. ال "مانياك ءجۇر" دەگەن دابىلدان شوشىپ، قانشاما ادامنىڭ قورقىپ-ۇرىككەنى، سونىڭ كەسىرىنەن دەنساۋلىقتارىنا زالال كەلگەنى ءۇشىن ەشقانداي جازا بەرىلمەيدى. وندايدى ءبىزدىڭ سولقىلداق زاڭدارىمىز ەسكەرمەگەن.

سولتۇستىك قازاقستان وبلىسى

سوڭعى جاڭالىقتار

اقسۋدا قارتتار ءۇيى ورتەندى

ايماقتار • بۇگىن، 09:57

ۇقساس جاڭالىقتار