پرەزيدەنتتىڭ ءباسپاسوز قىزمەتى تۋيتتەردەگى @AkordaPress رەسمي پاراقشاسىندا مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا سويلەگەن سوزدەرىن دە جاريالاعان ەدى. «داعدارىس كەزىندە تسيفرلاندىرۋ قىزمەتىنىڭ دە ءرولى مۇلدە بايقالعان جوق. تسيفرلى كوميسسارلار قانداي جۇمىس ءبىتىرىپ جاتىر؟» دەدى ق.توقاەۆ. ارادا ون كۇن كۇن وتكەن سوڭ 20 شىلدەدە تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ قىزمەتىنەن بوساتىلدى.
ەرتەسىنە, 21 شىلدەدە سىبايلاس جەمقورلىققا قارسى ءىس-قيمىل اگەنتتىگىنىڭ 2020 جىلدىڭ ءبىرىنشى جارتىجىلدىعىنىڭ قورىتىندىلارى بويىنشا القا وتىرىسى ءوتتى. وندا وسى ۆەدومستۆونىڭ توراعاسى اليك شپەكباەۆ ەلىمىزدەگى ەكى بىردەي مينيسترلىكتىڭ قىزمەتكەرلەرىنە قاتىستى تەرگەۋ امالدارى باستالعانىن جەتكىزدى. ء«بىز بيۋدجەت قاراجاتىن جىمقىرۋعا جول بەرمەي, «تسيفرلى قازاقستان» مەملەكەتتىك باعدارلاماسىن ىسكە اسىرۋعا بارىنشا دەن قويۋىمىز قاجەت. وسى تۇرعىدا قازىر تسيفرلىق دامۋ مەن ءبىلىم جانە عىلىم مينيسترلىكتەرىنىڭ جوعارى لاۋازىمدى تۇلعالارىنا قاتىستى تسيفرلاندىرۋ بويىنشا 2 قىلمىستىق ءىس تەرگەلىپ جاتقانىن ايتقىم كەلەدى», دەدى ۆەدومستۆو باسشىسى.
كەيىن قارجى مينيسترلىگىنىڭ قارجى مونيتورينگى كوميتەتى دەنساۋلىق ساقتاۋ ۆيتسە-ءمينيسترى ولجاس ابىشەۆتىڭ قاماۋعا الىنعانىن جەتكىزدى. بۇل لاۋازىمدى تۇلعا بيۋدجەت قاراجاتىن جىمقىردى دەگەن كۇدىك بار. «بيۋدجەت قاراجاتىن جىمقىردى دەگەن كۇدىكپەن دەنساۋلىق ساقتاۋ ۆيتسە-ءمينيسترى ولجاس ابىشەۆتى ەكونوميكالىق تەرگەۋ قىزمەتى قاماۋعا الدى», دەلىنەدى قارجى مونيتورينگى كوميتەتىنىڭ رەسمي اقپاراتىندا. ەلوردا سوتىنىڭ ءباسپاسوز قىزمەتى تاراتقان مالىمەتكە سەنسەك, ۆيتسە-مينيستر ەكى اي مەرزىمگە قاماۋدا ۇستالادى.
