قوعام • 04 تامىز، 2020

ماقتاارالدا ەۆاكۋاتسيالىق بەكەتتەر ەداۋىر ازايدى

25 رەت كورسەتىلدى

1 مامىر كۇنى وزبەكستان رەسپۋبليكاسىنداعى "ساردوبا" سۋ قويماسى اپاتقا ۇشىراعاننان سوڭ ماقتاارال اۋدانىندا سۋ باسۋ قاۋپى تۋىنداعان 13 ەلدى مەكەننىڭ تۇرعىندارىن ەۆاكۋاتسيالاۋ تۋرالى اۋدان اكىمى باقىت اسانوۆ شەشىم قابىلداپ، جالپى سانى 30 مىڭنان اساتىن حالىق ءبىر ءتۇننىڭ ىشىندە كوشىرىلدى. ونىڭ ىشىندە تۇرعىن سانى 15 مىڭعا جەتەتىن اۋدان ورتالىعى مىرزاكەنت كەنتى دە بار.

وسىلايشا مىرزاكەنتتەن اتاكەنتكە قاراي ۇدەرە كوشكەن تۇرعىنداردى جايعاستىرۋ ءۇشىن اتاكەنت كەنتى، ماقتاارال جانە جامبىل اۋىلدىق وكرۋگتەرىندە جالپى سانى 10 مىڭ ادامدى قابىلداي الاتىن 24 ەۆاكۋاتسيالىق بەكەتتەر دەر كەزىندە ۇيىمداستىرىلدى. سونداي-اق قوسىمشا جەتىساي قالاسىنان 3 ەۆاكۋاتسيالىق بەكەت اشىلىپ، تۇرعىندار جاپپاي ورنالاستىرىلدى.

ەۆاكۋاتسيالىق بەكەتتەردى پانالاۋشىلار توسەك ورىندارمەن جانە 3 مەزگىل ىستىق تاماقپەن قامتاماسىز ەتىلدى. ولارعا قازاقستاننىڭ ءتۇرلى وبلىستارىنان كەلگەن جانە جەرگىلىكتى جەردىڭ كاسىپكەرلەرى تاراپىنان ءتۇرلى كومەكتەر بەرىلدى. مەكتەپ جاسىنداعى وقۋشىلاردىڭ ساباعى دا ۇيىمداستىرىلدى. سونداي-اق، سۋدان جاپا شەككە تۇرعىنداردىڭ كوڭىلدەرىن اۋلاۋ ماقساتىندا ءتۇرلى مادەني كوپشىلىك ءىس-شارالار وتكىزىلىپ، پسيحولوگتەر تىنباي جۇمىس ىستەدى. ەڭ باستىسى، بەكەتتەردە كارانتين رەجىمى تولىقتاي ساقتالدى.

1

كەيىننەن سۋ باسپاعان ەلدى مەكەندەردىڭ تۇرعىندارى ءوز ۇيلەرىنە قايتارىلدى. ال، سۋ باسقان ەلدى مەكەندەردىڭ تۇرعىندارى توتەنشە جاعدايدىڭ جويىلۋىنا بايلانىستى ۇيلەرىن قايتا تۇرعىزۋ ءۇشىن اۋلاسىنداعى تاپچان نەمەسە ۋاقىتشا باسپانالاردى پانالاۋدا. سونداي-اق، كورشى ەلدى مەكەندەردەن پاتەر جالعا الىپ، تۋىسقاندارىنىڭ ءۇيىن پانالاپ جاتقان وتباسىلار دا بار.

وسىنىڭ اسەرىنەن بۇگىندە اۋداندا 24 ەۆاكۋاتسيالىق بەكەتتىڭ 5-ەۋى عانا قالىپ وتىر. مۇندا جالپى سانى 341 ازامات كۇن كەشۋدە. ولار نەگىزىنەن جاڭاتۇرمىس، جەڭىس، فيردوۋسي، ورگەباس ەلدى مەكەندەرىنىڭ تۇرعىندارى.

سوڭعى جاڭالىقتار

ۇقساس جاڭالىقتار