ۆيكتوريا پرەمەر-ءمينيسترى دەنيەل ەندريۋس: «قاتاڭ ءتارتىپ اۋرۋدى كۇندەلىكتى مىڭداعان ادامنىڭ جۇقتىرۋىن شەكتەيدى دەپ ويلايمىز. وسىعان دەيىنگى شارالاردىڭ تيىمدىلىگى از بولۋىنا بايلانىستى ازاماتتاردىڭ ەندى ۇيلەرىنەن تەك جۇمىسقا بارۋ ءۇشىن جانە كومەك الۋعا عانا شىعۋىنا رۇقسات», دەدى.
بۇعان قوسا مەلبۋرن تۇرعىندارىنىڭ دالاعا, تازا اۋاعا شىعۋىنا دا بەلگىلى ءبىر ءتارتىپ ەنگىزىلدى. سۋپەرماركەتتەر جۇمىسى توقتاماعانىمەن, مەيرامحانا مەن ءدامحانالار ەسىگى كەلۋشىلەرگە جابىق, تەك تاپسىرىس قابىلداپ, ۇيگە جەتكىزىپ بەرەدى.
* * *
Worldometer دەرەگىنە قاراعاندا امەريكا قۇراما شتاتتارىندا كۆي جۇقتىرعاندار 49 038 ادامعا ۇلعايعان.
پاندەميا باستالعالى اقش-تا 4,81 ملن تۇرعىن SARS-CoV-2 تىرناعىنا ءىلىنىپ, ۆيرۋس سالماعىن الەۋمەت تۇتاس سەزىنىپ جاتىر. وتكەن تاۋلىكتە 467 ادام ومىرمەن قوشتاسسا, دۇيسەنبى, 3 تامىزدىڭ تاڭىنا دەيىن ەلدە بارلىعى 158 365 امەريكالىق كوز جۇمعان دەگەن مالىمەت كەلتىرىلدى.
* * *
يتاليا عالىمدارى ادامدار ءۇي حايۋاناتتارىنا ۆيرۋس جۇقتىرادى دەگەن بولجامدى راستادى.
يتاليانىڭ سولتۇستىگىندەگى لومبارديادا 540 يت پەن 277 مىسىقتى تەكسەرىپ, قوجايىندارى اۋىرعان كەزدە نەمەسە ولار ىندەت ءزىلى جوعارى جەرلەردە جۇرسە SARS-CoV-2 جۇقتىراتىنىن انىقتاعان. زەرتتەلگەن يتتەردىڭ 3,4, ال مىسىقتاردىڭ 3,9 پايىزىندا انتيدەنەلەر پايدا بولعان. ال گەرمانياداعى فريدريح لەففلەر اتىنداعى ينستيتۋتتىڭ باسشىسى توماس مەتتەنليايتەر يت پەن مىسىق ادامدار اراسىندا ۆيرۋس تاراتادى دەگەن قاۋىپ نەگىزسىز, COVID-19 تەك ادامنان ادامعا جۇعادى دەپ تۇجىرىمداعان بولاتىن.
* * *
COVID-19 ىندەتىنە قاتىستى جاسالعان شەكتەۋلەر يسپانيا ءتۋريزمىنىڭ تىنىسىن تارىلتتى.
پاندەميا كەسىرىنەن ەلدە 750 مىڭ ادام جۇمىسسىز قالىپ, جىلدىق تابىس 83 ملرد ەۋروعا دەيىن ازايادى. بۇل قاۋىپتى «El País» ايتادى.
وتكەن ايدىڭ سوڭعى كۇندەرىندە گەرمانيا ۇكىمەتى ازاماتتارىنا يسپانيانىڭ بىرقاتار ايماقتارىنا بارماۋ جونىندە كەڭەس بەرگەن-ءدى. ەندى بەلگيا كورولدىگى دە اسا ءبىر قاجەتتىلىك تۋماسا اراگون مەن ناۆاررا, كاتالونياعا ساپارعا شىقپاي, تۋريستىك قىدىرىستى قويا تۇرۋعا ۇندەدى. بەلگيالىقتارعا بوي تارتا تۇرىڭىزدار دەگەن جەرلەردىڭ قاتارىنا بريتاندىق لەستەر قالاسى, ششۆەيتساريانىڭ ۆالە, ۆو جانە جەنەۆا كانتوندارى دا كىرگەن ەكەن.
* * *
گەرمانيادا كۆي-ءدىڭ جاڭادان تىركەلۋى گەسسەن ايماعىندا كوبىرەك بولىپ تۇر.
گەسسەن ايماعى الەۋمەتتىك زەرتتەۋ مينيسترلىگى ءبىر تاۋلىك ىشىندە تەست تاپسىرعان ادامداردىڭ 88-ىندە ۆيرۋس انىقتالعانى جونىندە حابارلادى. ال ەپيدەميا ورشىگەننەن بەرى گەسسەندە 12 117 ادام اۋىرىپ, 520 پاتسيەنتتى قۇتقارۋ مۇمكىن بولماپتى. وتكەن تاۋلىك ىشىندە جالپى گەرمانيا كولەمىندە جاڭادان 240 ادام ۆيرۋس جۇقتىرعان.
* * *
مەكسيكادا ءبىر تاۋلىكتە 4,8 مىڭ ادام ۆيرۋس جۇقتىرعان. بۇل تۋرالى REGNUM جازادى.
مەكسيكا دەنساۋلىق ساقتاۋ مينيسترلىگىنىڭ باس ەپيدەميولوگى حوسە لۋيس الوميا سوڭعى 24 ساعات ىشىندە 4853 ادام SARS-CoV-2 جۇقتىرعانىن, وسىلايشا جالپى ەسەپتە 439 046 مەكسيكالىقتىڭ اۋىرعانىن ايتتى. باس ەپيدەميولوگ 289 394 جان جازىلىپ شىققانىمەن, پاندەميا باستالعاننان بەرى ەل كولەمىندە 47 746 پاتسيەنتتىڭ دەمى ۇزىلگەنىن جەتكىزدى.
* * *
يراندا سوڭعى ءۇش اپتا ىشىندە اۋرۋ ءورشىپ تۇر. دەنساۋلىق ساقتاۋ مينيسترلىگى وكىلىنىڭ حابالاۋىنشا, ءبىر تاۋلىكتە 2685 ادامنىڭ ۆيرۋس جۇقتىرعانى انىقتالعان.
ەلدەگى 31 ايماقتىڭ 25-ءى بويىنشا «جاعداي الاڭداتارلىق» دەپ باعالاعان مينيسترلىك ءبىر كۇندە 208 ادامنىڭ تىرىشىلىك تىنىسىنىڭ توقتاعانىن, وسىلايشا پاندەميا قۇرباندارىنىڭ سانى 17 190 بولعانىن ايتتى.
يراندا بارلىعى 310 مىڭ پاتسيەنت ىندەت جۇقتىرعان.
توپتامانى دايىنداعان
انار تولەۋحانقىزى,
«Egemen Qazaqstan»
