ساياسات • 03 تامىز، 2020

قوعامدىق كەڭەستەر الەۋەتىن ءتيىمدى پايدالانۋ كەرەك

7 رەت كورسەتىلدى

اقپارات جانە قوعامدىق دامۋ ءمينيسترى ايدا بالاەۆا وب­لىس­تاردىڭ، نۇر-سۇلتان، الماتى جانە شىمكەنت قالالارىنىڭ قو­عام­دىق كەڭەستەرىنىڭ (قك) تورا­عا­لارىمەن ونلاين-كەزدەسۋ وتكىزدى.

كەزدەسۋ بارىسىندا قوعامدىق كەڭەس­تەرگە قاتىستى الەۋمەتتىك نورمالار مەن ەرەجەلەردى ءبىر جۇيەگە كەلتىرۋدىڭ وزەكتى ماسەلەلەرى قوزعالدى.

«قوعامدىق كەڭەستەر مەملەكەتتىك ور­­گان­داردىڭ اشىقتىعى مەن ەسەپ بەرۋ­شىلىگىن قامتاماسىز ەتە وتىرىپ، ينس­تي­تۋ­تسيونالدىق رەفورمانى قوزعاۋشى كۇشكە اينالا الماي وتىرعانى جاسىرىن ەمەس. وكىنىشكە قاراي كوپتەگەن جاع­داي­لاردا قوعامدىق كەڭەستەردىڭ ۇسى­نىم­دارى مەملەكەتتىك ورگاندار تاراپى­نان قاراۋسىز قالادى. بۇل تۇرعىدا مەم­لەكەتتىك شارالاردى قوعامدىق باقىلاۋ ار­قاشان دا پارمەندى تەتىك بولىپ قالا بەرمەك. پاندەميا بۇل جۇمىستىڭ قانشا­لىق­تى ماڭىزدى ەكەنىن كورسەتتى»، دەدى ا.بالاەۆا.

سونداي-اق كەزدەسۋدە قوعامدىق كەڭەس­تەردىڭ قىزمەتىن جەتىلدىرۋ جانە ولار­دىڭ قوعامدىق ومىرگە بەلسەندى قاتىسۋى بويىنشا ناقتى ۇسىنىستار ايتىل­دى. مينيسترلىك جاقىن ارادا قوعام­دىق كەڭەستەردىڭ ىسكە اسىرىلىپ جات­قان بارلىق جوبالارىمەن تانىسىپ قانا قويماي، ولارعا ودان ءارى قوعام­دىق باقىلاۋ باستاماسىمەن تالداۋ جا­ساۋدى كوزدەيتىن مەملەكەتتىك باعدار­لا­ما­لاردىڭ بىرىڭعاي پورتالىن ىسكە قوسۋدى جوسپارلاپ وتىر.

كەزدەسۋدە حالىقتىڭ الەۋمەتتىك وسال توپتارى ءۇشىن جاعداي جاساۋعا باقى­لاۋ جۇرگىزۋ جونىندەگى ماسەلەلەر دە قا­رالدى. بۇل باعىتتا بۇگىنگى تاڭدا مي­نيس­ترلىك جانىنان ارنايى كوميسسيا قۇ­رىلعان. قوعامدىق كەڭەستەرگە ماسەلەلەر كوتەرۋمەن عانا شەكتەلمەي، تاجىريبە الماسۋدا دا بەلسەندى بولۋ ۇسىنىلدى.

– قوعامدىق كەڭەستەردىڭ الەۋەتى وتە جو­عارى. تەك ونى بارىنشا پايدالانۋ كەرەك جانە ينستيتۋتتىق ەركىندىكتى كو­بى­رەك كورسەتۋ كەرەك. ادامدار بىزدەن وسى­نى كۇتىپ وتىر، – دەپ اتاپ ءوتتى مينيستر.

الماتى قالاسىنىڭ، اتىراۋ، قارا­عان­دى، سولتۇستىك قازاقستان وبلىستا­رى­نىڭ قوعامدىق كەڭەس توراعالارى جۇ­مىس تاجىريبەلەرىمەن ءبولىسىپ قانا قوي­ماي، پاندەميا كەزەڭىندە قوعامدىق كە­ڭەستەردىڭ قوعام ومىرىنە بەلسەندى قاتىسۋىن جانداندىرۋ بويىنشا بىرقاتار ۇسى­نىستار ەنگىزدى.

وسىلايشا، اتىراۋ وبلىسى قوعامدىق كەڭەسىنىڭ توراعاسى م.وتەشوۆ قك-كە ادىس­تەمەلىك قولداۋ كورسەتەتىن رەسپۋبليكالىق ادىستەمەلىك ورتالىق قۇرۋدى ۇسىندى. بۇدان باسقا، ول قك تۋرالى زاڭ جوباسىنا ونەركاسىپتىك وڭىرلەردەگى شەتەلدىك كومپانيالارمەن ءوزارا ءىس-قيمىلعا قاتىستى تۇزەتۋلەر ەنگىزۋدى ۇسىندى. الماتى قالاسى قوعامدىق كەڭەسىنىڭ توراعاسى ر.الشانوۆ الداعى سايلاۋدا ءماسليحات دەپۋتاتتىعىنا سايلاۋ ءۇشىن قوعامدىق كەڭەستەردىڭ لايىقتى مۇشەلەرىن ۇسىنۋ تۋرالى پىكىرىن ايتتى.

قاراعاندى وبلىسى قوعامدىق كەڭە­سى­نىڭ توراعاسى ە.ايماعامبەتوۆ وڭىرلەردىڭ ەكولوگيالىق ءال-اۋقاتىن جاقسارتۋ بو­يىنشا شارالار قابىلداۋ قاجەتتىلىگى تۋرالى ايتتى. سولتۇستىك قازاقستان وبلىسى قوعامدىق كەڭەسىنىڭ توراعاسى ق.ەدىرەسوۆ ءوز سوزىندە اۋىل جاستارىن قولداۋ، ولاردى جۇمىسقا ورنالاستىرۋ جانە جۇمىسپەن قامتۋ بويىنشا شارالار قابىلداۋ قا­جەت­تىگى تۋرالى مالىمدەدى.

بۇدان باسقا، قوعامدىق كەڭەستەر مەم­لە­كەت باسشىسىنىڭ كارانتيندى ەكى اپتاعا ۇزارتۋ تۋرالى شەشىمىن ءبىراۋىزدان قول­دادى، بۇل رەتتە مۇنداي شارالار حالىق­تىڭ دەنساۋلىعى مەن ءال-اۋقاتىنا وڭ ىقپال ەتەتىنىن اتاپ ءوتتى.

جالپى، كەزدەسۋ اياسىندا قوعامدىق كەڭەستەر قىزمەتىن جەتىلدىرۋگە جانە ولار­دىڭ ءرولىن ارتتىرۋعا ىقپال ەتە­تىن بىرقاتار پەرسپەكتيۆالىق تەتىك­تەر ۇسىنىلدى. ولاردىڭ ىشىندە قك-ءنىڭ ۇي­لەستىرۋ ورتالىعىن قۇرۋ، ور­تا­­لىق دەڭ­گەيدە ۇسىنىمدار مەن شەشىم­دەردى ودان ءارى ازىرلەۋ ءۇشىن وزەكتى ما­سە­لە­لەر­­دىڭ بىرىڭعاي بازاسىن قۇرۋ، قك وكىل­دەرىنىڭ، ونىڭ ىشىندە ساراپتا­ما­لىق ور­تالىقتاردىڭ الەۋەتىن ارتتىرۋ، وڭىر­لەردەگى قوعامدىق كەڭەستەر مۇشە­لەرى­نىڭ باستامالارىن قولداۋ بويىنشا شا­عىن گرانتتار باعدارلاماسىن ىسكە اسىرۋ ءىسى بار.

كەڭەستەردىڭ مينيسترلىكپەن ودان ءارى ءوزارا ءىس-قيمىلىن جاقسارتۋ ماقساتىندا ازاماتتىق قوعام ىستەرى كوميتەتىمەن 10 كۇندە ءبىر رەت، مينيستر ا.بالاەۆامەن ايى­نا ءبىر رەت، ۇكىمەت دەڭگەيىندە  ءاربىر جار­تى جىلدىقتا قوعامدىق كەڭەستەرمەن تۇراق­تى كەزدەسۋلەر ۇيىمداستىرۋ ۇسى­نىلدى. سونداي-اق مينيسترلىك مۇنداي كەز­دەسۋلەردى جارتى جىلدا ءبىر رەت ۇكىمەت دەڭگەيىندە وتكىزىپ وتىرۋ تۋرالى ۇسىنىس ەنگىزەتىن بولادى.

مينيستر ۇكىمەت جانىنان قك ۇي­لەس­تىرۋ ورتالىعىن قۇرۋ، وزەكتى ماسەلەلەردىڭ بىرىڭعاي بازاسىن اشۋ، ساراپشىلار بازاسىن قالىپتاستىرۋ ارقىلى قوعامدىق كەڭەس ساراپتامالىق الەۋەتىن كۇشەيتۋ قاجەتتىگىن اتاپ ءوتتى.

ا.بالاەۆا، كەزدەسۋدى قورىتىندىلاي كەلە، مينيسترلىكتىڭ قاي كەزدە دە ىنتى­ماق­تاستىققا اشىق جانە بارلىق ماسە­لەلەر بويىنشا ءوزارا ديالوگقا دايىن ەكەنىن اتاپ ءوتتى. بۇل تۇرعىدا قوعامدىق كەڭەستەر «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋدىڭ نەگىزگى قۇرالى رەتىندە قاراستىرىلادى.

ايتا كەتەيىك، قوعامدىق كەڭەستەر مەملەكەت پەن ازاماتتىق قوعام اراسىنداعى ديالوگ نىسانى رەتىندە 2016 جىلى «100 ناقتى قادام» ۇلت جوسپارىن ىسكە اسىرۋ شەڭبەرىندە قۇرىلدى. بۇل مەملەكەتتىك ەمەس ينستيتۋتتار مەملەكەتتىك شەشىمدەر قابىلداۋدىڭ اشىقتىعىن ارتتىرۋعا ار­نالعان كونسۋلتاتيۆتىك-كەڭەسشى، باقى­لاۋشى ورگاندار بولىپ تابىلادى.

بۇگىندە قازاقستاندا رەسپۋبليكالىق جانە جەرگىلىكتى دەڭگەيلەردە 234 قو­عام­دىق كەڭەس جۇمىس ىستەيدى (رەسپۋبليكالىق دەڭگەيدە – 18، وڭىرلىك دەڭگەيدە – 216). قو­عامدىق كەڭەستەردىڭ جۇمىسىنا 3500-دەن استام ادام قاتىسادى.

سوڭعى جاڭالىقتار

شىعىسقا قار ءتۇستى

ايماقتار • كەشە

ۇقساس جاڭالىقتار