ايماقتار • 01 تامىز، 2020

سولتۇستىكتە "ۇزدىك اۋىل اكىمى" انىقتالدى

68 رەت كورسەتىلدى

"رۋحاني جاڭعىرۋ" باعدارلاماسى اياسىندا مەملەكەتتىك قىزمەت ىستەرى اگەنتتىگىنىڭ باستاماسىمەن قولعا الىنعان "ۇزدىك اۋىل اكىمى" رەسپۋبليكالىق بايقاۋىنىڭ I كەزەڭى سولتۇستىك قازاقستاندا دا اياقتالدى، - دەپ جازادى Egemen.kz

كونكۋرستىڭ ماقساتى - اۋىلدىق ەلدى مەكەندەردى دامىتۋعا ەلەۋلى ۇلەس قوساتىن، جۇمىستا جوعارى تاجىريبەلىك ناتيجەلەرگە قول جەتكىزگەن ۇزدىك اۋىل اكىمدەرىن انىقتاۋ جانە ولاردى كوتەرمەلەۋ بولىپ تابىلادى. كونكۋرسقا قاتىسۋعا 30 اۋىل اكىمى نيەت بىلدىرگەن ەدى، سونىڭ 23-ءى شارتتارعا سايكەس كەلدى.

مەملەكەتتىك قىزمەت ىستەرى وبلىستىق دەپارتامەنتى وبلىستىڭ ادەپ جونىندەگى ۋاكىلىمەن بىرلەسىپ ساۋالناما ازىرلەپ، ۇمىتكەرلەردىڭ مەملەكەتتىك قىزمەتشىلەردىڭ ادەبىن ساقتاۋى بويىنشا قورىتىندى بەرىلدى. سونداي-اق  اكىمدەردىڭ حالىقپەن كەرى بايلانىس ورناتۋ جونىندەگى قىزمەتى باعالاندى، وسى باعىتتا قول جەتكىزىلگەن ناتيجەلەر زەردەلەندى. "حالىق ۇنىنە قۇلاق اساتىن مەملەكەت" تۇجىرىمداماسى شەڭبەرىندە باعالاۋ راسىمدەرىنىڭ مىندەتتى تالاپتارىنىڭ ءبىرى وبلىس اكىمدىگىنىڭ سايتىندا ورنالاستىرىلعان 16 كريتەري بويىنشا ونلاين-داۋىس بەرۋ تۇرىندە ءوتىپ، حالىقتىڭ اكىمدەردىڭ جۇمىسىنا قاناعاتتانۋى ولشەم بولدى.

سونىمەن قاتار ۇمىتكەرلەر "ۇزدىك اۋىل اكىمى" اتاعىنا نەگە مەن لايىقپىن" تاقىرىبىندا ەسسە جازىپ، اۋىلدىق وكرۋگتى دامىتۋعا، اۋىلدىق جەردىڭ الەۋمەتتىك-ەكونوميكالىق ماسەلەلەرىن شەشۋگە باعىتتالعان جوبالىق جۇمىس دايىندادى.

2020 جىلعى 29 شىلدەدە ەڭ جوعارى ۇپاي جيناعان اكىمدەر ءۇشىن وڭىرلىك كونكۋرستىق كوميسسيامەن جەكە ونلاين اڭگىمەلەسۋ وتكىزىلدى، ونىڭ قۇرامىنا باق، قوعامدىق بىرلەستىكتەر وكىلدەرى، مەملەكەتتىك ورگانداردىڭ باسشىلارى كىردى. تايىنشا اۋدانىنىڭ "زەلەنوگاي"، اققايىڭ اۋدانىنىڭ "ۆلاسوۆكا"، قىزىلجار اۋدانىنىڭ "روششينسك"، ع. مۇسىرەپوۆ اتىنداعى اۋداننىڭ "ۆوزۆىشەن" جانە "سالقىنكول" سەلولىق وكرۋگتەرىنىڭ اكىمدەرى ءوز ىستەرىنىڭ ۇزدىگى اتاعى ءۇشىن جارىستى. سونىڭ ىشىندە "زەلەنوگاي" اۋىلدىق وكرۋگىنىڭ اكىمى گۇلبارشىن باتەنوۆانىڭ كانديداتۋراسى جەڭىمپاز بولىپ تانىلدى. ەندى ول رەسپۋبليكالىق كونكۋرسقا قاتىسادى. كوميسسيا مۇشەلەرى ونىڭ ەسسەسىن، جازۋداعى كرەاتيۆتى ءتاسىلىن، سونداي-اق جوبالىق جۇمىسىن باسقا قاتىسۋشىلاردىڭ جۇمىستارىمەن سالىستىرعاندا ۇزدىك دەپ باعالادى. سونىمەن قاتار، ول حالىقتىڭ ونلاين-داۋىس بەرۋ ناتيجەلەرى بويىنشا دا كوشباسشى بولىپ شىعىپ، مۇمكىن بولاتىن 10 بالدىڭ 9،88-ءىن يەلەندى.

 

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار