باس دارىگەردىڭ ايتۋىنشا, قازىر اۋرۋحانادا ينفەكتسيالىق ورىندار سانى ازايتىلىپ, جوسپارلى ەمدەۋ شارالارىن جۇرگىزۋگە دايىندالۋدا. مۇندا "تازا ايماق" جاساقتالىپ جاتىر.
"جاقىندا حيرۋرگيالىق, نەۆرولوگيالىق, سونداي-اق وڭالتۋدى قاجەت ەتەتىن بەيىندى ناۋقاستاردى ەمدەۋدى باستايمىز. تامىز ايىنىڭ ورتاسىندا كۇردەلى وتالاردى جاساۋدى جوسپارلاپ وتىرمىز", دەيدى وبلىستىق اۋرۋحانانىڭ باس دارىگەرى ەربول يمانعاليەۆ.
بۇل اۋرۋحانا شىلدەدەن بەرى 400 ورىندىق ينفەكتسيالىق ستاتسيونارعا بەيىمدەلگەن بولاتىن. قازىر اۋرۋحانادا قاۋىپتى ىندەت جۇقتىرىپ تۇسكەن ناۋقاستاردىڭ سانى ازايىپتى.
"بۇرىن قابىلداۋ بولىمشەسىنە تاۋلىگىنە ينفەكتسيالىق اۋرۋمەن 60-قا جۋىق ناۋقاس تۇسەتىن. سوڭعى كەزدە تاۋلىگىنە 15-كە جۋىق ناۋقاستى قابىلداۋدامىز. بۇگىنگى كۇنى ينفەكتسيالىق ستاتسيوناردا ەم قابىلداپ جاتقان 137 ناۋقاس بار. ەندى تامىز ايىنان باستاپ 200 كەرۋەتكە جوسپارلى تۇردە ەمدەلەتىن ناۋقاستاردى قابىلداۋعا دايىندالۋدامىز", دەدى ەربول يمانعاليەۆ.
