اۋىل شارۋاشىلىعى ءمينيسترى ساپارحان وماروۆتىڭ 17 شىلدەدەگى بۇيرىعىمەن بەكىتىلگەن مال شارۋاشىلىعىن دامىتۋ ەرەجەلەرىنە وزگەرتۋلەر مەن تولىقتىرۋلار ەنگىزىلدى.
اتاپ ايتقاندا, نەگىزگى وزگەرىستەر قوي شارۋاشىلىعىنىڭ سۋبسيدياسىنا ەنگىزىلدى: اسىل تۇقىمدى تولدەيتىن قويلارمەن سەلەكتسيالىق جانە اسىلداندىرۋ جۇمىستارىنىڭ نورمالارى 2500-دەن 4000 تەڭگەگە دەيىن, تاۋارلىق قويلارعا - 1500-دەن 2500 تەڭگەگە دەيىن كوتەرىلدى.
سونداي-اق, اسىل تۇقىمدى وتاندىق (8 مىڭنان 15 مىڭعا دەيىن) جانە يمپورتتالعان قويلاردى ء(بىر باسىنا 150 مىڭ تەڭگەگە دەيىن) ساتىپ الۋ نورمالارى جوعارىلادى.
مال شارۋاشىلىعىمەن اينالىساتىن فەرمەرلەرگە قولايلى جاعداي جاساۋ ماقساتىندا مينيسترلىك مال ساتىپ الۋعا نەسيە بەرۋدىڭ كەپىلدىك ساياساتىن وزگەرتتى, سونىمەن قاتار فەرمەرلىك شارۋاشىلىق پەن بورداقىلاۋ الاڭدارىنا نەسيە الۋعا وتىنىشتەردى قاراۋ مەرزىمدەرى وڭتايلاندىرىلدى.
ەندى مالدى 1:1 وتىمدىلىك كوەففيتسيەنتىمەن ساتىپ الۋعا بولادى. سونىمەن بىرگە, فەرمەرلەر سۋبسيديا العاننان كەيىن, تۇراقتى كەپىلدىك - 15 بولادى.
قالعان 85% ساتىپ الىنعان مالمەن قامتاماسىز ەتىلەدى. قازاقستاندىق مال وسىرۋشىلەرگە قوسىمشا قولداۋ كورسەتۋ ءۇشىن كارانتين كەزىندەگى دياگنوستيكالىق زەرتتەۋلەردىڭ باعاسى سيىرعا 23,5 مىڭنان 4271 تەڭگەگە دەيىن, ال ەۋروپالىق وداق ەلدەرىنەن اكەلىنگەن بۇقا ءۇشىن 28,5 مىڭنان 8741 تەڭگەگە دەيىن تومەندەتىلدى.
اكىمدىكتەر مەن اۋىلشارۋاشىلىعى تاۋارىن وندىرۋشىلەردىڭ وتىنىشتەرىنە بايلانىستى, قر اۋىل شارۋاشىلىعى مينيسترلىگى كارانتين كەزىندە يمپورتتالعان مالعا دياگنوستيكالىق سىناقتار جۇرگىزۋ شىعىنداردىن وڭتايلاندىرۋ بويىنشا جۇمىستار جۇرگىزدى.
ەۋروپالىق وداقتا جانۋارلاردىڭ اسا قاۋىپتى اۋرۋلارى بويىنشا ەپيزووتيالىق جاعداي تۇراقتى بولعاندىقتان, شماللەنبەرگ اۋرۋى بويىنشا كارانتين كەزىندە ەو-دان يمپورتتالعان جانۋارلاردىڭ ءبىر پتر تەستىلەۋىنە دەيىن ازايتۋ تۋرالى شەشىم قابىلداندى.
زەرتتەۋ جۇمىستارىنىڭ قۇنىن تومەندەتۋ يمپورتتالعان مال باسىن اكەلۋ كەزىندە اۋىلشارۋاشىلىق تاۋارىن وندىرۋشىلەر جۇكتەمەسىن ەداۋىر ازايتادى.
كارانتين كەزىندەگى يمپورتتالاتىن جانۋارلاردى دياگنوستيكالىق زەرتتەۋ قۇنى قازاقستان رەسپۋبليكاسىنىڭ بارلىق ايماقتارىندا بىردەي ەكەنىن اتاپ وتكەن ءجون.
كانادادان اكەلىنگەن ءىرى قارا مالدى تەكسەرۋ قۇنى (ۆەتەرينارلىق سەرتيفيكاتتاردا كورسەتىلگەن اۋرۋلاردىڭ تىزىمىنە سايكەس), ەگەر تابيعي قاشىرۋ قولدانىلماسا, 1 سيىرعا 1978 تەڭگە, ال تابيعي قاشىرۋ قولدانىلسا, 3267 تەڭگە بولادى.
بۇقانى زەرتتەۋ قۇنى - 6448 تەڭگە جانە سايكەسىنشە 7737 تەڭگە.
اقش-تان اكەلىنگەن مال ءۇشىن: سيىرعا - 2697 تەڭگە, بۇقاعا - 7167 تەڭگە.
اۆستراليادان اكەلىنگەن ىقم: سيىرعا - 1408 تەڭگە, بۇقاعا - 2984 تەڭگە.
لاتىن امەريكاسىنان اكەلىنگەن ىقم: سيىرعا - 4120 تەڭگە, بۇقاعا - 8590 تەڭگە. ەاەو-عا مۇشە مەملەكەتتەردەن (رەسەي فەدەراتسياسى جانە بەلارۋس) اكەلىنگەن ءىرى قارا مالعا: سيىرعا - 3183 تەڭگە (ۆيرۋستىق ديارەيا مەن جۇقپالى رينوتراحەيتكە قارسى ەگىلمەگەن) جانە 1978 تەڭگە (ەگىلگەن), بۇقا ءۇشىن - 7653 تەڭگە (ەگىلمەگەن) جانە 6448 تەڭگە (ەگىلگەن).
2020 جىلى اگروونەركاسىپتىك كەشەندى دامىتۋدىڭ مەملەكەتتىك باعدارلاماسىنا سايكەس قازاقستانعا 95 مىڭ باس ەت جانە ءسۇت باعىتىنداعى ءىرى قارا مال اكەلۋ جوسپارلانىپ وتىر.
