قوعام • 31 شىلدە، 2020

جۇرت كۇتكەن جولدان كوپ كەمشىلىك انىقتالدى

893 رەت كورسەتىلدى

بىلتىر قىزىلوردا وبلىسىنداعى قازالى مەن ارال اۋدان­دارى اۋىلدارىن جالعاستىرىپ جاتقان «بەكارىستان بي – جاڭاقۇرىلىس» باعىتىنداعى جول قايتا سالىنا باس­تاپ، وسى جاڭالىقتى ۇزاق جىل كۇتكەن جۇرتشىلىقتىڭ كوڭىلىندە ءبىر ءۇمىت ويانىپ ەدى. اسىرەسە، 33 جىلدان بەرى جوندەۋ كورمەگەن جولعا تۇسە باستاعان اسفالتقا ارال اۋدانىنداعى جاڭاقۇرىلىس پەن قاراتەرەڭ اۋىلىنىڭ تۇرعىندارى قاتتى قۋاندى.

باس-اياعى 33 شاقىرىمدىق جولدىڭ 11 شاقىرىمى قازالى­نىڭ اۋماعىندا جاتىر. ال قالعان بولىگىن ارال اۋداندىق تۇرعىن ءۇي-كوممۋنالدىق شارۋا­شىلىعى، جولاۋشىلار كولىگى جانە اۆتوموبيل جولدارى ءبو­لىمى ءوز تەڭگەرىمىنە الىپ، بىل­تىر تامىز ايىندا جول توسەۋ باستالىپ كەتتى. جىلعا جۋىق ۋاقىت ارالىعىندا كۇرە جول­دىڭ 9 شاقىرىمىنا اسفالت ءتۇسىپ ۇلگەردى. بىراق «جول اكتيۆتەرى ۇلتتىق ساپا ور­تالىعى» رمك قىزىلوردا وبلىستىق في­­ليا­لى جۇرگىزگەن تەكسەرۋ وسى 9 شاقىرىمنىڭ تالاپقا ساي ەمەستىگىن انىقتاپ وتىر. باستاپقى تەكسەرۋ وسى جىلدىڭ مامىر ايىندا جۇرگىزىلىپ، وندا ءاسفالتتىڭ قالىڭدىعى تالاپقا ساي ەمەستىگى بەلگىلى بولعان. جوبا بويىنشا جولدىڭ قالىڭدىعى 6 سانتيمەتر بولۋى ءتيىس ەكەن، بىراق تەكسەرۋ بارىسىندا ونىڭ نەبارى 3-4 سانتيمەتر ەكەنى انىقتالعان. ءتىپتى اسفالت قۇرامىنىڭ ساپاسى دا سىن كوتەرمەيتىن بولىپ شىقتى. فيليال ماماندارى مەردىگەر «نۇرتەحسەرۆيس» جاۋاپ­كەرشىلىگى شەكتەۋلى سەرىك­تەستىگىنە انىقتالعان كەمشىلىك­تەردى تەز ارادا رەتكە كەلتىرۋدى مىن­دەتتەپتى. اراعا اي ارالاتىپ، قايتا جۇرگىزىلگەن تەكسەرۋ بۇل تالاپتىڭ ورىندالماعانىن كورسەتىپ وتىر.

– «ەكىنشى تەكسەرۋدە دە ەش­قانداي جوندەۋ شارالارى جۇرگىزىلمەگەندىگى انىقتالدى. اسفالت قالىڭدىعى ءالى دە تا­­لاپ­قا ساي ەمەس. تەكسەرۋ قو­رى­­تىندىسى جايلى ءتيىستى ورىن­­دارعا حات جولدادىق، – دەيدى «جول اكتيۆتەرى ۇلت­تىق ساپا ورتالىعى» رمك قى­­زىل­ور­دا وب­لىستىق فيليالى باس­شى­سى­نىڭ مىندەتىن اتقارۋشى ەر­جان ۋسمانوۆ.

جول قۇرىلىسى باستالعان ساتتە-اق جاڭاقۇرىلىس اۋىلى­نىڭ تۇرعىندارى اسفالتتىڭ تىم جۇقا ەكەنىن بايقاعان ەكەن. بىراق مەردىگەر كومپانيا وكىل­دەرىنىڭ ۋادەسىنە سەنىپتى.

– 33 جىلدان كەيىن سالىنىپ وتىرعان جولدى ءبىزدىڭ اۋىل عانا ەمەس، قاراتەرەڭدىك اعايىن دا ۇزاق كۇتىپ ەدى. ەندى ونىڭ سا­پا­­سىز سالىنعانىن ەستىپ، قۋا­نى­شىمىز سۋ سەپكەندەي باسىلىپ قالدى. جول تىرشىلىك كوزى ەكەنى اركىمگە دە بەلگىلى عوي. ءبىز­دىڭ تىلەك – جەرگىلىكتى بيلىك وسى ماسەلەگە نازار اۋدارىپ، حا­لىق­تىڭ ارمان-تىلەگىن ورىنداسا، – دەيدى جاڭاقۇرىلىس اۋىل­دىق ارداگەرلەر كەڭەسىنىڭ توراعاسى سەردالى شالباەۆ.

 

قىزىلوردا وبلىسى

 

سوڭعى جاڭالىقتار

اشىقتىق – قوعام دامۋىنىڭ كەپىلى

ايماقتار • بۇگىن، 13:00

دوللار قايتا قىمباتتادى

ەكونوميكا • بۇگىن، 12:18

ۇقساس جاڭالىقتار