قازىرگى تالاپقا ساي, كەز كەلگەن قۇرىلىستى جۇرگىزەتىن مەردىگەر كومپانيانىڭ كونكۋرس نەگىزىندە انىقتالاتىنى بەلگىلى. سول سياقتى تاراز قالاسىندا دا بىرقاتار مەردىگەر كومپانيا وزدەرىنە تيەسىلى نىسانداردى ءبولىپ الىپ, جۇمىس جۇرگىزۋدە. دەگەنمەن قازىرگى كەزدە كەيبىر مەردىگەر كومپانيالاردىڭ جاۋاپسىزدىعىنان جۇمىس جۇيەلى جۇرمەي تۇر. قۇجات بويىنشا قانتتاي, ال ىسكە كەلگەندە ىركىلىپ قالاتىن جاۋاپتى مەكەمەلەردىڭ بۇل جولى دا ايتاتىن «جىرى» تاۋسىلماي وتىر. ءبىرى ىندەتتى سىلتاۋراتسا, ەندى ءبىرى جۇمىستى ساپالى ءارى ۋاقتىلى اياقتايتىنىنا سەندىرىپ باعۋدا. جامبىل وبلىسىنىڭ اكىمى بەردىبەك ساپارباەۆ تاراز قالاسىندا اۋقىمدى جۇمىستىڭ جۇزەگە اسۋى ءتيىس ەكەنىن, بۇل رەتتە مەردىگەر كومپانيالاردىڭ بەلسەندىلىگى, جۇمىسقا جاۋاپكەرشىلىگى, قۇرىلىس جۇمىسىن كەستەگە ساي ساپالى ءارى شيراق جۇرگىزۋى اسا ماڭىزدى ەكەنىن ەسكەرتكەن بولاتىن. ءتىپتى ءوزى تاراز قالاسىندا قۇرىلىسى ءجۇرىپ جاتقان بىرقاتار الەۋمەتتىك نىسانداردى ارالاپ, مەردىگەر كومپانيالاردىڭ جۇمىسىنا سىن دا ايتقان ەدى. ال بۇل سىننان جاڭا وقۋ جىلىنا دەيىن ناتيجە شىعا ما, جوق پا, ول جاعىن ۋاقىت كورسەتەدى.
قازىرگى كەزدە ءاليحان بوكەيحان اتىنداعى گيمنازيانىڭ 300 وقۋشىعا ارنالعان نىسانىن كەڭەيتۋ جۇمىسى جۇرگىزىلۋدە. ارينە, مەملەكەت تاراپىنان ءتيىستى قاراجات ءبولىنىپ, بارلىق مۇمكىندىك قاراستىرىلسا دا مۇنداعى جۇمىس نەگىزگى كەستەدەن ەكى اپتاعا كەشىگىپ وتىر. بۇگىندە بۇل جۇمىستىڭ كولەمى 21 پايىزعا عانا ورىندالعان. وسىنداعى قۇرىلىس جۇمىستارىن جۇرگىزىپ وتىرعان «تارازقۇرىلىسينۆەست» جشس ۋچاسكە باستىعى قانات تۇسىپبەكوۆتىڭ ايتۋىنشا, ءبىراز جۇمىسشىلار سىرقاتتانىپ قالعان. سوندىقتان جۇمىس كەشەۋىلدەپ تۇر. الايدا مەردىگەر كومپانيانىڭ وكىلى نەگىزگى كەستەدە كورسەتىلگەن جۇمىستى ۋاقىتىندا ورىندايتىندارىن جەتكىزدى. مۇندا قۇرىلىس بيىل ناۋرىز ايىندا باستالعانىمەن, بۇگىندە جۇمىستىڭ ەڭسەرىلگەن ءتۇرى كورىنبەيدى. ءتورت ايدان بەرى تىم بولماسا جۇمىستىڭ جارتىسى دا بىتپەگەن. ەندى ءبىر ايدان كەيىن جاڭا وقۋ جىلى باستالادى. سونىمەن قاتار ەر بالالارعا ارنالعان ء«بىلىم» يننوۆاتسيالىق ليتسەيىندە دە 300 ورىندىق جاتاقحاناعا كۇردەلى جوندەۋ جۇمىستارى جۇرگىزىلۋدە. اتالعان ليتسەيدە 380 ەرەكشە زەرەك بالالار ءبىلىم الادى. ءبىلىم وشاعىنداعى جوندەۋ جۇمىستارىنا «سانات-قۇرىلىس» مەردىگەر كومپانياسى جاۋاپتى. ال اتالعان مەردىگەر كومپانيانىڭ وكىلى اسەت احاتاەۆتىڭ ايتۋىنشا, بۇل جەردە 40-تان استام ادام جۇمىسپەن قامتىلعان ەكەن. جۇمىس بارىسىندا ول جاتاقحانانىڭ الدىنداعى سپورت الاڭدارى دا جوندەلەتىنىن جەتكىزدى. ب.ساپارباەۆ مۇنداعى قۇرىلىس بارىسىن دا ارالاپ كورىپ, قارجىنى ءتيىمدى پايدالانۋدى, جاتاقحانا الدىندا ورنالاسقان وقۋشىلاردىڭ دەمالاتىن جابىق ورىندىقتاردى جاقسى بەزەندىرۋ قاجەتتىگىن, قۇرىلىستى الداعى جاڭا وقۋ جىلىنا دەيىن اياقتاۋ كەرەك ەكەنىن ايتتى. سول سياقتى دارىندى بالالارعا ارنالعان وبلىستىق «دارىن» مەكتەپ-ينتەرناتىنىڭ كۇردەلى جوندەلۋىنە دە 200 ملن تەڭگە بولىنگەن. جۇمىستىڭ ساپالى اتقارىلۋىنا «كاسۋب-تاراز» مەردىگەر كومپانياسى جاۋاپتى. كومپانيا ديرەكتورى وركەن اپتياليەۆتىڭ ايتۋىنشا, بۇل جەردە 102 جۇمىسشى ەڭبەك ەتۋدە. جۇمىسشىلاردىڭ جالاقىلارى تالاپقا ساي تولەنىپ, قازىر قۇرىلىستىڭ 60 پايىزى اياقتالعان. دەگەنمەن وبلىس باسشىلىعى تاراپىنان عيمارات سىرتىنىڭ كۇڭگىرت ەكەنى, ونىڭ قارا تۇسپەن بويالعانى سىنعا ۇشىرادى. شىنىندا دا بۇل وندىرىستىك زاۋىتتىڭ جاتاقحاناسى ەمەس, بولاشاق يەلەرى ءتالىم الاتىن ءبىلىم وشاعى. سوندىقتان دا قازىنا قارجىسىنا دۇرىس نارسەنىڭ جاسالعانى جاقسى. اتالعان ماقساتقا 263 ملن تەڭگە بولىنگەن. ەندى مەكتەپ قۇرىلىسىنا جاۋاپتى مەردىگەر كومپانيانىڭ سوعان ساي جۇمىس اتقارۋى اسا ماڭىزدى. سول سياقتى تاراز قالاسىندا 400 ستۋدەنت ءبىلىم الاتىن جامبىل يندۋستريالدى-تەحنولوگيالىق كوللەدجىندە دە جوندەۋ جۇمىستارى جۇرگىزىلۋدە. اتالعان كوللەدجدىڭ ستۋدەنتتەرى اۆتوكولىك جوندەۋ, دانەكەرلەۋشى, ەكسكۆاتورشى سياقتى جۇمىسشى ماماندىقتارى بويىنشا ءبىلىم الادى. مۇندا ءۇش ماماندىق بويىنشا دۋالدى وقىتۋ جۇيەسى ەنگىزىلگەن. سونىمەن قاتار اتالعان كوللەدج ەلباسىنىڭ قولداۋىمەن جۇزەگە اسقان «جاس مامان» جوباسىنا جامبىل وبلىسىنان ەنگەن ءبىلىم نىسانى. تاعى دا تاراز قالاسىنداعى عاني مۇراتباەۆ اتىنداعى ورتا مەكتەپتە دە كۇردەلى جوندەۋ جۇمىستارى جۇرگىزىلۋدە. مۇندا 750 وقۋشى ءبىلىم السا, 50 بالا شاعىن ورتالىققا بارادى. جاڭا وقۋ جىلىنا دەيىن اتالعان نىساننىڭ قانداي ساپادا اياقتالاتىنىن ۋاقىت كورسەتەدى.
شىنىندا دا مەكتەپ قۇرىلىسىنا جاۋاپتى مەردىگەر كومپانيالاردىڭ جۇمىسىنىڭ جۇيەلىلىگى اسا ماڭىزدى. جاڭا وقۋ جىلىنىڭ جاقىنداپ قالعانى ءوز الدىنا, ساپانىڭ دا الاتىن ورىنى وراسان. ايتپەسە, كەيدە جاز بويى ءجۇرىپ, كۇز كەلگەندە ارپالىسىپ ءبىتىرىپ, اقىرى نىساننىڭ ساپاسىنا كوڭىل بولىنبەي جاتاتىنى دا شىن. ماسەلەن, جۋىردا عانا قالا اكىمى ايتقازى قارابالاەۆ «قانت زاۋىتى» القابىنداعى 600 ورىندىق №22 مەكتەپتىڭ قۇرىلىس جۇمىستارىمەن تانىسىپ, مەردىگەر كومپانيانىڭ جۇمىسىن سىنادى. راسىندا دا مۇندا تەحنيكا جوق, ادام كۇشى از. قۇرىلىس باسىندا اينالدىرعان ون شاقتى ادام ءجۇر. قالا اكىمىنىڭ «تاۋىق قورا سالىپ جاتىرسىڭدار ما؟ الدە ساراي سالىپ جاتىرسىڭدار ما؟ مىنانداي جۇمىس بولمايدى عوي» دەگەن بەينەجازباسى الەۋمەتتىك جەلى ارقىلى تاراپ, ءبىراز مەردىگەر كومپانيانىڭ جۇمىسىنىڭ جۇيەسىزدىگىن اشىپ بەرگەندەي بولىپ ەدى. سوندىقتان دا ءاربىر كومپانيا ءوزىنىڭ جۇمىسىنا جاۋاپكەرشىلىكپەن قاراپ, ونى جەرگىلىكتى اكىمدەر ءوز قاداعالاۋىنا الىپ, ناقتى جۇمىستى تالاپ ەتىپ وتىرسا, كوپتەگەن ماسەلەنىڭ كۇرمەۋى شەشىلەتىنى انىق.
جامبىل وبلىسى
