رۋحانيات • 31 شىلدە، 2020

ۇلىق مەيرام

59 رەت كورسەتىلدى

بۇگىن الەم مۇسىلماندارىمەن قاتار قازاقستاندىق جاماعات تا يسلامداعى ەڭ ۇلىق مەرەكە – قۇربان ايت مەيرامىن قارسى الىپ، ونىڭ العاشقى كۇنىن ەرەكشە ىقىلاسپەن اتاپ وتۋدە.

قۇربان ايت مەيرامى بيىل پاندەميا جاعدايىندا ۇيىم­داس­تىرىلىپ وتىر، ناقتىلاي ايتقاندا قالىپتاسقان احۋالعا بايلانىستى قازاقستان مۇسىلماندارى ءدىني باسقارماسىنىڭ ءپاتۋاسى بويىنشا مەشىتتەردە ايت نامازى وقىلعان جوق ءارى وسى مەرەكەگە قاتىستى ءداستۇرلى ءجون-جورالعىلارعا، ءدىني راسىمدەرگە يسلام شارتتارىن ساقتاي وتىرىپ از-كەم وزگەرىستەر مەن شەكتەۋلەر ەنگىزىلدى. مۇنىڭ ءبارى حالىق دەنساۋلىعىن ساقتاۋ، قورعاۋ ماقساتىندا قولعا الىنعاندىقتان، حالقىمىز قمدب شەشىمدەرىنە قولداۋ ءبىلدىردى.

ايتۋلى مەرەكەدە قازاقستان مۇسىل­مان­دارى رياسىز پەيىلمەن، جاراتقانعا دەگەن بيىك سەنىممەن اللا جولىندا قۇربان شالىپ، ىزگىلىك پەن قايىرىمدىلىقتىڭ، قاناعات پەن سابىرلىقتىڭ وزىق ۇلگىسىن كورسەتىپ، كومەككە مۇقتاج جاندارعا قول ۇشىن سوزىپ، ولاردىڭ باتا-تىلەگىن الىپ، العىسىنا بولەنۋدە.

سان عاسىرلاردان بەرى يسلام ءدىنىن رۋحا­ني تىرەگىنە، تەمىرقازىعىنا اينالدىرعان حال­قىمىز قۇربان ايتقا دەگەن ىقىلاس-نيەتىن مەرەكەگە ايرىقشا دايىندالۋىمەن دە ءبىل­دىردى. ۇلىق مەيرام كەزىندە سالت-ساناعا ءسىڭىپ، ءداستۇر رەتىندە قالىپتاسقان، ىجدا­­ھات­تىلىقپەن ورىندالاتىن قۇلشى­لىق­­تار مەن ءدىني راسىمدەر ىزگى نيەتپەن اتقا­رى­لۋ­دا. بۇل ءوز كەزەگىندە قۇربان ايتتىڭ، ونىڭ ايا­سىندا ورىندالاتىن ءداستۇرلى را­سىم­دەردىڭ حال­قىمىزدىڭ رۋحاني بولمىسىنىڭ اجىراماس ءبىر بولىگى بولىپ كەتكەنىن كورسەتسە كەرەك.

قۇربان ايت – مۇسىلمانداردىڭ اللاعا دەگەن سۇيىسپەنشىلىگى ايقىن كورىنەتىن مەيرام. بۇل مەرەكەدە اللا رازىلىعى ءۇشىن قۇرباندىققا مال شالىنادى. قاسيەتتى قۇراندا: «ۇمىتپاڭدار، ولاردىڭ ەتى دە، قانى دا ەشقاشان اللاعا جەتپەيدى. وعان جەتەتىن نارسە – جۇرەكتەرىڭىزگە ۇيالاعان تاقۋالىقتارىڭ (شىنايى نيەت­تەرىڭ)» («حاج» سۇرەسى، 37-ايات)، – دەلىنگەن. بۇل جەردە اللا جولىندا جاقسىلىق جاساۋعا نيەتتەنگەن ادام قۇرباندىق شالۋ امالىن رياسىز ويمەن ىسكە اسىرادى.

وكىنىشكە قاراي، قۇربان ايتتا پاندەميا جاعدايىنا بايلانىستى جاماعاتپەن قۇلشىلىق جاساي المادىق. ويتكەنى ال­لا­نىڭ اماناتى سانالاتىن حا­لىق دەنساۋلىعىن ساقتاۋ – مۇ­­­سىلماندىق باستى مىن­دەت بول­عاندىقتان وسىلاي بولدى.

بۇگىندە بۇكىل الەم ىندەت ارانىنىڭ اۋزىندا تۇر. بۇل اۋىرتپالىق ءبىزدىڭ ەلىمىزگە دە وڭاي ءتيىپ تۇرعان جوق. سوندىقتان اسا مەيىرىمدى، ەرەكشە قامقور اللا تاعالادان وسى سىناقتىڭ تەزىرەك اياقتالۋىن، ونىڭ سوڭى جاقسىلىققا ۇلاسۋىن تىلەيمىز.

اللا تاعالا ىندەتتىڭ بەتىن قايتارىپ، ونىڭ ءىزىن دە قالدىرماي، جاقسىلىعى مەن يگىلىگىن كور­سەتكەي. اتى جامان دەرتتەن كوز جۇمعانداردى پاناسىنا الىپ، سىرقاتتانىپ جاتقاندارعا شيپاسىن بەرگەي. ەڭسەلى ەلىمىز امان، ىنتىماعى جاراسقان حالقىمىز تىنىش بولسىن. قۇربان ايتتا جاساعان بارلىق قۇلشىلىق امالىمىز اللانىڭ تاراپىنان قابىل بولعاي.

 

سوڭعى جاڭالىقتار

ۇقساس جاڭالىقتار