15 تامىزدا مەكسيكادا وتەتىن بوكس كەشىندە داۋرەن ەلەۋسىنوۆ ونەر كورسەتەدى. وليمپيادا جانە الەم چەمپيونى, ازيا ويىندارى مەن ازيا چەمپيوناتىنىڭ ەكى دۇركىن جەڭىمپازى دەگەن دارداي اتاقتارى بار دانياردىڭ تۋعان اعاسى اۋەسقويلار رينگىندە دە ءوزىن جاقسى قىرىنان كورسەتتى. ەل چەمپيونى, قۇرلىق بىرىنشىلىگىنىڭ جۇلدەگەرى اتاندى. كاسىپقويلار اراسىندا 9 كەزدەسۋ وتكىزگەن ول 8 رەت جەڭىسكە جەتتى. جەتى قارسىلاسىن ەسىنەن تاندىردى. تاعى ءبىر باسەكە تەڭ اياقتالدى. گۆادالاحارادا داۋرەن جەرگىلىكتى بوكسشى حۋان كارلوس رەيگوسپەن ايقاسادى. ونىڭ كورسەتكىشى مىناداي: 34 جەكپە-جەك, 16 جەڭىس (6 نوكاۋت), 15 جەڭىلىس, 3 كەزدەسۋ تەڭ. ورتا سالماقتاعى قوس ساڭلاق WBC International نۇسقاسىنىڭ التىن بەلبەۋى ءۇشىن تالاسادى.
ال 10 تامىزدا ماسكەۋدە الەكساندر جۋراۆسكي شارشى الاڭعا شىعادى. ورتا سالماقتاعى وتانداسىمىز رەسەيلىك حۋسەين بايسانگۋروۆپەن قولعاپ تۇيىستىرەدى.
