پرايمەريز – پارتيانىڭ ءار وڭىردە وتكىزىلەتىن سايلاۋ الدىنداعى ىشكى سايلاۋى. ۇعىنىقتى تىلمەن ايتقاندا دەپۋتات رەتىندە حالىققا قىزمەت ەتۋگە بەلىن بەكەم بۋعان ازاماتتاردىڭ انىقتالىپ, ولاردىڭ ەل تىرلىگىنە ارالاسۋىنا مۇمكىندىك بەرەتىن الاڭ. ىسكەر ازاماتتاردى ىرىكتەپ, ولاردىڭ سايلاۋ دەگەن ساياسي تارتىسقا تۇسۋىنە جول اشاتىن پرايمەريز اقش, كانادا, ارگەنتينا, ۋرۋگۆاي, گەرمانيا, تۇركيا, ۇلىبريتانيا, يسپانيا, يتاليا سىندى ەلدەردە قۇقىقتىق سالماعى باسىم فورمات بولىپ تابىلادى. قازاقستان تاريحىندا مۇنداي دەموكراتيالىق اكتسيانى العاش بولىپ Nur Otan پارتياسى قولعا الىپ وتىر.
وزەگىندە تەڭدىك, ادىلەتتىلىك دەگەن ۇعىمدار جاتقان دەموكراتيانىڭ دامۋىنا, داۋىرلەۋىنە جول اشاتىن پرايمەريز جاڭا كوشباسشىلاردى انىقتاۋعا مۇمكىندىك بەرەدى. قوعام ومىرىنە بەي-جاي قارامايتىن ۇمىتكەرلەردىڭ ىشىنەن دەپۋتات بولۋعا لايىقتىلار پارتيا مۇشەلەرىنىڭ داۋىس بەرۋىمەن ىرىكتەلەدى.
جاسىراتىنى جوق, قازىرگى تاڭدا قوعامدا دەپۋتات بولۋ ءۇشىن مول مال-دۇنيەڭ, ادىمى اشىلعان بيزنەسىڭ, قارجىلاي قورىڭ, دەمەۋشىلىك تىرلىگىڭ بولۋى كەرەك دەگەن قاساڭ تۇسىنىك بار. دەپۋتاتتاردىڭ اراسىندا قايىرىمدىلىق ىستەرگە دەن قويىپ, جومارتتىق تانىتىپ جۇرگەن ازاماتتار بارشىلىق. ولاردىڭ بۇل يگى قادامىن قولدايمىز. بىراق دەپۋتات جۇمىسىنىڭ ءورىسى وسىمەن عانا شەكتەلمەي, ودان دا كەڭ بولۋى ءتيىس. ول قوعامدا بولىپ جاتقان ءتۇرلى ماسەلەلەردى تاپ باسىپ, ولاردى شەشۋگە اتسالىساتىن ازامات بولۋى قاجەت. بارلىعىنا توپىراق شاشۋدان اۋلاقپىز, بىراق قازىرگى تاڭدا قوعامىمىزدا سايلاۋشىلار ءۇشىن «ساعىمعا» اينالعان دەپۋتاتتار كەزدەسەدى. مىنە, پرايمەريز جاۋاپتى ءارى ساۋاپتى قىزمەتكە سايلانىپ الىپ, حالىق اماناتىن سۇلەسوق ارقالاپ جۇرگەن سونداي ازاماتتاردى شەتكە ىعىستىرىپ, ورالىمدى قابىلەتى بار جاندارعا ەل يگىلىگى ءۇشىن جۇمىس ىستەۋگە مۇمكىندىك بەرەتىن ساياسي قادام.
حالىق اماناتىن ارقالاعان ادام بۇقارامەن تىعىز بايلانىستا بولۋى قاجەت. ولاي بولسا, سايلاۋ الدىنداعى سايلاۋدا, ياعني پرايمەريزدە قولىنان ءىس كەلەتىن, سان الۋان داۋ-شارعا ارالاسا الاتىن, بيلىككە ءتۇرلى پروبلەمالاردى شەشۋدىڭ جولدارىن ۇسىنا بىلەتىن, وي ءورىسى كەڭ, قوعامدىق جۇمىستاردىڭ بەل ورتاسىندا جۇرەتىن ازاماتتار تاڭدالادى. ەندەشە, الداعى ۋاقىتتا وتكەلى وتىرعان پرايمەريزدىڭ ەل دامۋىنا قوسار ۇلەسى از بولمايتىنىنا سەنەيىك.
تالعات بالتاباەۆ,
جۋرناليست
