رۋحانيات • 30 شىلدە، 2020

وشاقتا جانعان وت

60 رەت كورسەتىلدى

جاز. اۋىل كەشى. ىمىرت ءۇيىرىلىپ كە­لەدى. سامان كىرپىشتەن تۇرعىزىلعان توقال ءۇي­دىڭ الدىنداعى وشاققا قي سالىنىپ، وت تۇتاتىلدى. كوپ كەشىكپەي ونىڭ مۇرجاسىنان ءتۇتىن كوتەرىلىپ، قارا قازان شىمىرلاپ قايناي باستايدى. ۇساق مالدىڭ تۇياعى تاپتاعان قيدىڭ جا­لىنى كومىردەن كەم بولماعانىن اعا بۋىن ۇر­پاق وكىلدەرى وتە جاقسى بىلەدى. وسى تا­بيعي وتىن عاسىرلار بويى قازاقى پەش­تىڭ قىزۋىن باسەڭدەتپەي كەلدى ەمەس پە؟ ال ءۇيدىڭ ءىشى مەن سىرتىنداعى وشاق­تا قا­را قازانعا پىسىرىلگەن تاعامنىڭ ءدامى ءتىل ءۇيى­­رىلىپ تۇراتىنى ۇمىتىلا قويار ما ەكەن.

مۇنداي كورىنىس ەل ىشىندە سەكسەنىنشى جىلدارعا دەيىن ساقتالىپ كەلدى. كەيىننەن قيدىڭ ورنىن كومىر، سودان سوڭ كوگىلدىر وتىن الماستىردى. وشاقتار جويىلىپ، ءار ۇيگە گاز قۇبىرلارى تارتىلدى. سىرىڭكەنى ءبىر تارتىپ قالساڭ بول­دى، كوگىلدىر وت لاپ ەتە تۇسەدى. ەندىگى جەردە تاماق قارا قازاندا ەمەس، قالايى كوس­تريۋلدەردە پىسىرىلە باستادى. ءبارىبىر وشاقتا جانعان وت پەن كوككە بوي سوزا كوتەرىلگەن ونىڭ ءتۇتىنى سول جىلدارداعى اۋىل بالالارىنىڭ كوكەيىندە جاتتالىپ كالدى.

وشاقتا جانعان وتتىڭ جانىندا، اربانىڭ ۇستىندە جاتىپ بالا-قيال جەر-كوكتى شارلاپ كەتە بارۋشى ەدى. وشاق وتى جۇزدەگەن، مىڭداعان اۋىل بالالارىنىڭ ارمانىن ۇشتاپ، ءتۇپسىز تەرەڭ الەمگە جەتەكتەپ كەتە باراتىن. اۋىلدىڭ ۇل-قىزىنىڭ ارمانشىل، ماقساتكەر بولىپ ءوسۋىنىڭ ءبىر سىرى وشاقتا جانعان وتتان اۋىسقان شەكسىز قۋات پا دەپ قالاسىڭ. ال كەرىسىنشە ءبىر كۇن وشاقتا وت جانباي قالسا، اۋىل بالاسىنىڭ كوڭىلى ءپاس، جابىرقاۋ بولا قالاتىنى دا بار. كورشىلەس قونىستانعان قوس ءۇيدىڭ سىرتقى وشاقتارى دا قاتار ورنالاسقان ەدى. كورشىنىڭ وشاعىندا ساتىر-كۇتىر لاۋلاپ وت جانىپ، ءبىزدىڭ ءۇيدىڭ وشاعى قارايىپ، ۇڭىرەيىپ تۇرسا، اتام مەن اجەمە: وشاقتا نەگە وت جانباي جاتىر، دەپ ىعىردى شىعارۋشى ەدىم.

مۇنداي وشاقتار اۋىلدىق جەردە ءالى دە كەزدەسەدى. كوزىڭە شوقتاي باسىلاتىن سول تۇرمىستىق زات-م ۇلىكتى كورگەندە ءۇي يەلەرىنە مۇنى پايدالانىپ تۇراسىڭدار ما دەگەن ساۋال قوياسىڭ ەرىكسىز. ارينە. اسىرەسە جاز كەزىندە وعان ەت اسىپ جەگەندى جاقسى كورەمىز. ونىڭ ءدامى مۇلدەم بولەك بولادى دەيدى جەرگىلىكتى تۇرعىندار.

وشاق دەگەن ءسوزدى جالاڭ قاراستىرماي، وعان تەرەڭىرەك ءمان بەرسەك، ۇيا، وتباسى دەگەن ماعىنالى ۇعىم شىعادى. مىسالى، قازىرگىدەي كۇردەلى كەزەڭدە ىندەت قوس وكپەدەن قىسقان كەزدە وشاعىمىزدىڭ وتى سونبەسىن، اعايىن! «اش قارىن جۇبانا ما، مايلى اس جەمەي» دەپ دانا اباي ايتقانداي، قازانىمىزدا بۇلكىلدەپ، بىلقىلداپ پىسكەن مايلى ەت سىزگە شيپا بولىپ دارىعاي!

 

اقتوبە

 

سوڭعى جاڭالىقتار

ۇقساس جاڭالىقتار