جالپى وبلىستا كوروناۆيرۋس ىندەتىمەن سىرقاتتانعان 2 859 ادام تىركەلگەن. وسى كۇنگە دەيىن ناۋقاستاردىڭ 1965, ياعني 69% جازىلىپ شىقتى. جەتى ناۋقاس ىندەتتەن قايتىس بولعان.
ەپيدماۋسىم باستالعاندا وبلىستا بارلىعى 976 توسەك-ورىن دايىندالدى. ونىڭ 135-ءى ينفەكتسيا, 241-پروۆيزور, 600-كارانتيندىك ورىن. بۇگىنگى كۇنى ولاردىڭ سانى 2405-كە ارتتى.
- قاجەتتىلىك تۋىنداعان جاعدايدا 500 توسەك ورىن رەزەرۆىمىز بار. ونىڭ ىشىندە ينفەكتسيالىق 200 جانە پروۆيزورلىق 300 ورىن ازىرلەندى. وبلىستا 6 كومپيۋتەرلىك توموگراف قىزمەت كورسەتەدى. ونىڭ 4-ەۋى وبلىس ورتالىعىندا, 2-ەۋى اۋداندا ورنالاسقان. قوسىمشا اپپارات الۋعا دەمەۋشىلەردى تارتۋ ماسەلەسى قاراستىرىلۋدا, - دەدى وبلىس اكىمى گ.ابدىقالىقوۆا.
وڭىردە 52 رەنتگەن اپپاراتىنىڭ 20-ى وبلىس ورتالىعىنداعى, 32-ءسى اۋداندارداعى مەديتسينا مەكەمەلەرىندە قىزمەت كورسەتەدى. 107 وكپەنى جاساندى جەلدەتۋ اپپاراتى بار. دەنساۋلىق ساقتاۋ مينيسترلىگىنە تاعى وسىنداي 192 قۇرىلعىعا تاپسىرىس بەرىلدى. سونىمەن قاتار, 153 وتتەگى كونتسەنتراتورى بار. كەشە قوسىمشا وڭىرىمىزگە «شۇعىلا» قوعامدىق قورى تاراپىنان 200 دانا وتتەگى اپپاراتى جەتكىزىلدى.
COVID-19 ينفەكتسياسىنا قارسى كۇرەس شارالارىنا تارتىلعان 2407 مەديتسينا قىزمەتكەرىنە قارجىلاي قولداۋ ماقساتىندا پاندەميا كەزەڭىندە 4 ايدا 1 ملرد 117,6 ملن تەڭگە تولەندى. سونداي-اق, وبلىستىڭ بارلىق ەمدەۋ مەكەمەلەرى ءبىرىنشى تيپتەگى كوستيۋمدەرمەن, قورعانىس قۇرالدارىمەن قامتاماسىز ەتىلىپ, قاجەتتى بەكىتىلگەن 26 ءتۇرلى ءدارى-دارمەكتىڭ 2 ايلىق قورى قالىپتاستى. "سك فارماتسيادان" كەلەتىن بارلىق ءدارى-دارمەكتىڭ 100 پايىزى كەلدى. ال, ءدارىحانالاردا 1 ايعا جەتەرلىك ءدارى قورى قالىپتاستى. بۇگىنگى كۇنى سۇرانىستاعى دارىلەردىڭ بارلىعى ساتىلىمدا بار.
وبلىس اكىمى ءوڭىر ەكونوميكاسىن قايتا قالپىنا كەلتىرۋ اياسىندا اتقارىلىپ جاتقان شارالارعا توقتالدى.
- ەكونوميكالىق جاعدايدى ەسكەرە وتىرىپ, وبلىستىڭ 2020 جىلعا ارنالعان بەكىتىلگەن بيۋدجەت قايتا قارالىپ, 2,2 ملرد. تەڭگە شىعىس قىسقارتىلدى. ەكونوميكانى قايتا قالپىنا كەلتىرۋ جونىندەگى وبلىستىق جوسپار بەكىتىلدى. جوسپارعا سايكەس جەرگىلىكتى جولداردى جوندەۋ, سۋ جانە جىلۋ جۇيەسىن جاڭعىرتۋ, ەنەرگيامەن قامتاماسىز ەتۋ, جاڭا جۇمىس ورىندارىن اشۋ, اۋىل شارۋاشىلىعى جانە الەۋمەتتىك سالانى دامىتۋ باعىتىندا شارالار جۇزەگە اسىرىلاتىن بولادى, - دەدى وبلىس اكىمى.
ءوڭىر ەكونوميكاسىن قايتا قالپىنا كەلتىرۋ اياسىندا وڭىرگە جاڭا ينۆەستيتسيالار تارتىلۋدا. اتاپ ايتساق, قۇنى 1,5 ملرد تەڭگە بولاتىن جىلىنا 130 تونناعا دەيىن تۇيە سۇتىنەن قۇرعاق ۇنتاق وندىرەتىن تسەحتىڭ قۇرىلىسى. جانە قۇنى 3 ملرد تەڭگەلىك يسپاندىق تسەحتىڭ قۇرىلىسى. بۇل تسەحتا جىلىنا 180 مىڭ توننا تۇز وندىرىلەدى. ەكى جوبا دا ارال اۋدانىندا جۇزەگە اسىرىلادى.
مۇنىمەن قوسا, 2020 جىلدىڭ ەكىنشى جارتىجىلدىعىندا ارال اۋدانىندا كالتسيلەنگەن سودا, قىزىلوردا قالاسىندا شىنى پلاستيك قۇبىرلار شىعاراتىن زاۋىتار مەن جاڭاقورعان اۋدانىندا كۇن ەلەكتر ستانتسياسىنىڭ قۇرىلىسى باستالادى دەپ جوسپارلانۋدا. سونىمەن قاتار, جىل سوڭىنا دەيىن 3 ءوندىرىس ىسكە قوسىلادى دەپ كۇتىلىپ وتىر. ولار: قىزىلوردا قالاسىندا شىنى زاۋىتى, ارال اۋدانىندا كۆارتس قۇمىن بايىتۋ بويىنشا تاۋ-كەن بايىتۋ كومبيناتى ء(بىرىنشى جەلىسى) جانە قارماقشى اۋدانىندا قۇس فابريكاسى.
جيىن سوڭىندا وبلىس اكىمى تۇرعىنداردى ساقتىق شارالارىن ساقتاۋعا شاقىردى.
- الدىمىزدا بارشا مۇسىلمان قاۋىمىنىڭ اسىعا كۇتەتىن «قۇربان ايت» مەرەكەسى كەلە جاتىر. كەشە عانا وبلىستىڭ باس سانيتارلىق دارىگەرىنىڭ قاۋلىسى قابىلدانىپ, قاۋلىعا سايكەس قۇربان شالۋ راسىمدەرى ونلاين فورماتتا ۇيىمداستىرىلدى. سوندىقتان, جاقىندارىمىزدىڭ اماندىعى مەن ساۋلىعى ءۇشىن كوپشىلىك شارالاردان باس تارتىپ, جاماعات بولىپ جينالماي, وتباسىندا اتاپ وتۋگە شاقىرامىن. ساقتىق شارالارىنا اسا ءمان بەرىپ, تالاپتارعا باعىنۋ - تەك ءوزىمىزدىڭ دەنساۋلىعىمىز ءۇشىن عانا ەمەس, تۇتاس ەل الدىنداعى ازاماتتىق بورىشىمىز, سانالى تۇردە باستى ۇستانىمىمىز بولۋ كەرەك, - دەدى گۇلشارا ابدىقالىقوۆا.
