ەلوردا • 29 شىلدە، 2020

قالاي يممۋندىق پلازما دونورى بولۋعا بولادى؟

68 رەت كورسەتىلدى

COVID-19-بەن اۋىراتىن ناۋقاستاردى ەمدەۋ ءۇشىن يممۋندىق پلازمانى ورتا نەمەسە اۋىر دارەجەلى كوروناۆيرۋس ينفەكتسياسىمەن اۋىرعان دونورلار تاپسىرا الادى، دەپ حابارلايدى ەلوردا اكىمدىگىنىڭ ءباسپاسوز قىزمەتى.

دونوردىڭ جاسى 18-دەن اسقان، جەكە كۋالىگى بار جانە سالماعى كەمىندە 50 كگ بولۋى كەرەك.

"سونداي-اق جۇكتى ەمەس جانە بوسانباعان ايەلدەر دە پلازما تاپسىرا الادى. بۇل پلازمانى قۇيۋ كەزىندە يممۋننولوگيالىق اسقىنۋلارعا جول بەرمەس ءۇشىن جاسالادى. مۇنداي اسقىنۋلار سيرەك بولادى، بىراق كەزدەسۋى مۇمكىن. مۇنداي پروبلەمانى تۋعىزباۋ ءۇشىن ءبىز بوسانعان ايەلدەردەن قان المايمىز"، – دەيدى دونورلىق كادرلاردى جيناقتاۋ ءبولىمىنىڭ مەڭگەرۋشىسى، ترانسفۋزيولوگ-دارىگەر ەلميرا كوپەەۆا.

ءبىرىنشى كۇنى ورتالىقتا دونور قانى مەن انتيدەنەنى تالداۋ ءۇشىن تەكسەرۋ جۇرگىزىلەدى.

ەگەر كورسەتكىشتەر قالىپتى بولسا، كەلەسى كۇنى ول يممۋندىق پلازمانى تاپسىرۋعا شاقىرىلادى. پروتسەدۋرانىڭ اپپاراتتىق ادىسپەن جاسالاتىن پلازمافورەزدەن ەش ايىرماشىلىعى جوق. پلازما 600 ميلليليتر نەمەسە ودان تومەن كولەمدە الىنادى.

"انتيدەنەلەر راستالعان جاعدايدا، يممۋندىق پلازمانى تاپسىرار الدىندا دايىندالۋ كەرەك. كەشكى ساعات 6-دان باستاپ، اششى، مايلى، قۋىرىلعان تاعامداردى، ءسۇتتى پايدالانباعان ءجون. سۋدى نەمەسە قارا شايدى كوپ ءىشۋ قاجەت"، – دەيدى ە.كوپەەۆا.

كۇن سايىن تەكسەرۋگە 10-11 دونور كەلەدى، ولاردىڭ تەك 3-4-ەۋى عانا پلازمانى تاپسىرا الادى. كوبىنە تالداۋ قالىپتى بولمايدى جانە قالپىنا كەلتىرۋ ءۇشىن كوپ ۋاقىت قاجەت.

وسىنداي دونورلاردىڭ ءبىرى نۇر-سۇلتان قالاسىنىڭ تۇرعىنى الماس اسقاتوۆ بولدى. ەر ادام ءبىر جارىم اي بۇرىن COVID-19-بەن اۋىرعانىن ايتادى. 39،2 تەمپەراتۋرامەن ون كۇن جۇرگەن. ەندى باسقالارعا كومەكتەسۋگە شەشىم قابىلداپتى.

"مەنىڭ انام اۋىرىپ قالدى. ەكى جاقتى پنەۆمونيامەن، وكپەنىڭ 60% زاقىمدالۋىمەن اۋىر جاعدايدا اۋرۋحاناعا ءتۇستى. سوندىقتان مۇنىڭ نە ءۇشىن قاجەت ەكەنىن جاقسى تۇسىنەمىن. ەڭ باستىسى، بىرەۋدىڭ ءومىرىن ساقتاپ قالۋ ءۇشىن ماڭىزى زور"، – دەيدى ا.اسقاتوۆ.

نۇر-سۇلتان قالاسىندا بارلىعى 190 دوزا يممۋندىق پلازما دايىندالىپ، اۋرۋحانالاردىڭ سۇرانىسى بويىنشا 151 دوزا جىبەرىلدى. ولاردىڭ 10-ى باسقا دا قان ورتالىقتارىنا بەرىلدى. 77 دوناتسيا وتكىزىلدى، 69 ادام يممۋندىق پلازما دونورى بولدى. يممۋندىق پلازمانى تاپسىرۋعا نيەت بىلدىرۋشىلەر ترانسفۋزيولوگيا عىلىمي-وندىرىستىك ورتالىعىنا جۇگىنۋى قاجەت. ورتالىق كەرەي مەن جانىبەك حاندار كوشەسى، 10 مەكەن-جايىندا ورنالاسقان.

سوڭعى جاڭالىقتار

ۇقساس جاڭالىقتار