وتكەن ماۋسىم ايىنىڭ اياعىندا وتكىزىلگەن كەڭەستە رەسپۋبليكا پرەزيدەنتى قاسىم-جومارت توقاەۆ اقتوبە وبلىسىندا ىندەتپەن كۇرەستىڭ تيىمدىلىگى تومەن بولىپ وتىرعانىن قاتاڭ سىنعا العانى ءمالىم. بۇدان كەيىن وڭىردە شۇعىل شارالار قابىلدانىپ ەمدەۋ مەكەمەلەرىنىڭ الەۋەتى ەكى-ءۇش ەسەگە دەيىن ءوسىرىلدى. دارىگەرلەر مەن ورتا بۋىن مەديتسينا قىزمەتكەرلەرىنىڭ قوسىمشا كورپۋسى ازىرلەندى. بۇل ىسكە م.وسپانوۆ اتىنداعى اقتوبە مەملەكەتتىك مەديتسينا ۋنيۆەرسيتەتىنىڭ بارلىق پروفەسسور-وقىتۋشىلار قۇرامى مەن بيىلعى جىلى وسى جوو-نى بىتىرگەن تۇلەكتەر دە تارتىلدى.
دەرتكە تاپ بولعانداردى ەمدەۋگە قاجەتتى ءدارى-دارمەكتەر قورى جاساقتالدى. بۇعان بيۋدجەتتەن تىس كوزدەر ەسەبىنەن تابانى كۇرەكتەي 500 ميلليون تەڭگە قوماقتى قاراجات ءبولىندى. بۇل ءىس جۇيەلى ءارى كەشەندى تۇردە قولعا الىنىپ ءدارى باعاسىنا شەكتەۋلى نورمالار قويىلدى. الىپساتارلىقپەن اينالىسقانداردىڭ جولى كەسىلىپ, ولارعا ءتيىستى اكىمشىلىك شارالار قولدانىلدى. سونداي اقتوبە قالاسىنداعى تك فارم كومپانياسى ۆيرۋسقا قارسى قولدانىلاتىن گريپپوۆەر دەگەن اتاۋ بەرىلگەن ءدارىنى شىعارىپ ونى اۋرۋحانالارعا شۇعىل جەتكىزۋ جولدارىن بەلگىلەدى. ءسويتىپ وسى ارقىلى وتاندىق فارماتسەپتيكانىڭ تاعى ءبىر جاڭا ءونىمىنىڭ تۇساۋى كەسىلدى دەۋگە تولىق نەگىز بار. ءدارى-دارمەك تاپشىلىعىن جويۋعا جانە ونىڭ جەتكىلىكتى قورىن جاساقتاۋ ىسىندە وبلىستا ىسكە اسىرىلعان وڭ شەشىمدەر مەن تاكتيكالىق قادامدار ۇكىمەتتىڭ كەيىنگى كەڭەيتىلگەن ماجىلىسىندە ارنايى اتالىپ ءوتتى. ءارى اقتوبەلىكتەردىڭ بۇل تاجىريبەسى وزگە وڭىرلەرگە ۇيرەنەتىن ءۇردىس رەتىندە ۇسىنىلدى.
كەلەسى كەزەكتە ىندەتتى اۋىزدىقتاۋعا قارسى جۇرگىزىلگەن ءىس-شارالار كەشەنىنىڭ ناقتى ناتيجەلەرى قانداي دەگەن ماسەلەگە كەلسە, اتاپ ايتۋعا تۇرارلىقتاي وزگەرىستەر جاسالعانى ايقىن بايقالادى. ەڭ باستىسى وڭىردە سانيتارلىق-ەپيدەميالىق جاعداي تۇراقتى سىيپات الا باستادى. ىندەتتىڭ باسەڭدەگەنى جەدەل جاردەمگە قوڭىراۋ شالعانداردىڭ ەداۋىر ازايعانىنان دا كورىنىس تابا الادى.
سوڭعى دەرەكتەر وڭىردە ەمدەۋ مەكەمەلەرىنە ناۋقاستانىپ تۇسۋشىلەردىڭ سانىنان اۋرۋىنان ايىعىپ شىققانداردىڭ سانى ءۇش ەسەگە باسىم تۇسكەنىن كورسەتەدى. وسى دەرەكتەن تۋىندايتىن تاعى ءبىر جاعىمدى ءجايت بۇگىنگى كۇنى وبلىستا اۋرۋحانالار مەن پروۆيزورلىق گوسپيتالدارداعى كەرۋەتتەر سانىنىڭ قىرىق پايىزى عانا پايدالانىلىپ وتىرعانى.
اقتوبە وبلىسىنىڭ اكىمى وڭداسىن ورازالين ورىندى اتاپ كورسەتكەندەي سوڭعى كەزدە پايدا بولا باستاعان ەپيدەميالىق جاعدايدىڭ وڭ ديناميكاسى بوساڭسۋعا ەش نەگىز بولا المايدى. سوندىقتان دا اقتوبە ايماعىندا ساقتانۋ مەن قاۋىپسىزدىڭ شارالارىنا قاتىستى وبلىستىڭ باس سانيتارلىق دارىگەرىنىڭ قاۋلىسىندا كورسەتىلگەن تالاپتار مەن مىندەتتەر ءوز كۇشىندە قالا بەرمەك. ساقتانساڭ ساقتارمىن دەگەن حالىقتىق قاعيداعا سۇيەنگەن جاعدايدا عانا ىندەتتىڭ بەتىن قايتارۋعا بولاتىنىنا اقتوبەلىكتەر كامىل سەنەدى.
اقتوبە
