الەم • 29 شىلدە، 2020

اقش اسقان ستۋدەنتتەر ەلگە قايتۋى كەرەك

446 رەت كورسەتىلدى

جاقىندا ۆاشينگتون بيلىگى پاندەمياعا بايلانىستى كۇزگى جانە الداعى وقۋ جىلى تەك ونلاين فورماتتا وتكىزىلەتىن بولسا، شەتەلدىك ستۋدەنتتەر ەلىنە قايتۋى ءتيىس ەكەنىن مالىمدەدى.

قازىرگى ۋاقىتتا اقش-تا وقيتىن شەتەلدىك ستۋدەنتتەر ەلدەن كەتۋى، يا زاڭدى مارتەبەدە قالۋى ءۇشىن جەكە كۋرستارعا نەمەسە باسقا وقۋ ورنىنا اۋىسۋ سياقتى شارالاردى قولعا الۋى كەرەك. جاعداي ۋشىقسا، ونىڭ سوڭى دەپورتاتسياعا الىپ كەلۋى مۇمكىن.

كۇندىزگى وقۋ بولىمدەرىندە قاشىقتان وقيتىن، F-1 جانە M-1 ۆيزاسىن العان ستۋدەنتتەر ونلاين كۋرستى تولىعىمەن جۇكتەپ السا، اقش-تا قالۋ مۇمكىندىگى كوپ. ۆيزانىڭ ءبىرىنشى ءتۇرى شەتەلدىك ستۋدەنتتەرگە ەلدە وقۋعا، ەكىنشىسى – كاسىبي كۋرستاردان وتۋگە بەرىلەدى. سونىمەن قاتار كۇندىزگى بولىمدە وقيتىن ءبىلىم الۋشىلار فەدەرالدىق ەرەجەلەردى ساقتاۋى مىندەتتى. ال F ۆيزاسىنا قاتىسۋعا قۇقىعى بار ستۋدەنتتەر ءبىر ساباقتان نەمەسە ءۇش سىناق ساعاتىنان ونلاين تۇردە وتە الادى.

وسى تاراپتا لوس-اندجەلەس قالاسىنداعى University of California-عا «extension» باعدارلا­ماسى­مەن وقۋعا تۇسكەن مۇحاممەد الىمبەتتەن از-كەم اقپارات العان ەدىك. «كوشى-قون جانە كەدەن پولي­تسياسى باسقا ەلدىڭ ستۋدەنتتەرىنە كۇزگە دەيىن ەلدەن كەتۋدى مىندەتتەدى. ەگەر ءسىز وقيتىن جوعارى وقۋ ورنى تولىقتاي ونلاين فورماتقا وتسە، سوندا عانا ەلدەن كەتۋگە ءماجبۇر بولاسىز. مەن وقيتىن ءبىلىم ورداسىندا ساباقتاردىڭ 80 پايىزى قاشىقتان ءوتىپ جاتىر. الايدا قالعان 20 پايىزىن ءالى دە «گيبريد» فورماتتا قاراستىرۋدامىز. ياعني جوعارى وقۋ ورنىنا ءالى دە بارۋعا تۋرا كەلەدى. ەڭ وكىنىشتىسى، بالالىق شاعىمنان بەرگى ارمانىم اقش-تا ءبىلىم الۋ بولسا، سوعان قول جەتكىزگەن كەزدە بۇل زاڭنىڭ شىعۋى شەتەلدىك ستۋدەنتتەر ءۇشىن اۋىر سوققى بولدى»، دەيدى م.الىمبەت.

ول قاشىقتان ءبىلىم الۋدىڭ قولايسىز ەكەنىن ايتتى.

«دۇكەندەرگە، ساۋدا ورىندارىنا بەتپەر­دەسىز كىرۋگە بولمايدى. ادامدار اراسىنداعى اراقا­شىقتىق تا ساقتالعان. نەگىزىندە ۆيرۋس كىشكەنە باسەڭدەگەن سياقتى ەدى. بىراق وسىدان 1 اي بۇرىن دجوردج فلويدتىڭ وقيعاسىنان كەيىن ەلدە جاعداي كۇرت ناشارلاپ، اۋرۋ جۇقتىرعانداردىڭ سانى لەزدە ارتا ءتۇستى»، دەيدى ستۋدەنت.

ەسكە سالا كەتەيىك، اقش پرەزيدەنتى دونالد ترامپ جىل سوڭىنا دەيىن بىرقاتار ۆيزانى بەرۋدى توقتاتتى جانە Green-كارتا ۇستاۋشىلاردىڭ كەيبىر جەكەلەگەن ساناتىنا كىرۋگە تىيىم سالۋدى ۇزارتتى.

اق ءۇي باسشىسى «ەكونوميكالىق قۇلدىراۋعا الىپ كەلگەن كوروناۆيرۋستىق پاندەمياعا بايلانىس­تى يمميگرانت ەمەس ۆيزا باعدارلامالارى جۇمىس ىستەيتىن امەريكالىقتارعا قاۋىپ توندىرەدى»، دەگەن پىكىر قالدىردى. مۇنى اقش پرەزيدەنتتىگىنەن ۇمىتكەر دونالد ترامپتىڭ سايلاۋالدى باعدارلاماسى دەسەك تە بولادى.

 

سوڭعى جاڭالىقتار

ۇقساس جاڭالىقتار