جوباعا قاتىسۋعا نيەت بىلدىرگەن ۇمىتكەرلەر, ەڭ الدىمەن, حالقىنا ادال قىزمەت ەتۋگە دايار ازاماتتار. مۇنى پرەزيدەنت قاسىم-جومارت توقاەۆ بايقاۋ جاريالانعاندا جانە رەزەرۆكە وتكەن جاستارمەن كەزدەسۋدە دە اتاپ كورسەتتى. «كادرلىق رەزەرۆكە ءوتۋ دەگەنىمىز جوعارى لاۋازىمدى قىزمەتكە ورنالاسۋ عانا ەمەس. بۇل – ۇلت ءۇشىن, ەل ءۇشىن, حالىق ءۇشىن ايانباي تەر توگۋ دەگەن ءسوز. سىزدەرگە ۇلكەن جاۋاپكەرشىلىك جۇكتەلەدى», دەدى مەملەكەت باسشىسى. وزدەرىنە ارتىلعان جاۋاپكەرشىلىكتىڭ جۇگى اۋىر ەكەنىن جاقسى تۇسىنەتىن كەيىپكەرىمىز دە ەل يگىلىگىنە جۇمىس ىستەۋ باستى ماقساتى ەكەنىن جەتكىزدى.
جوبانى قولعا الۋداعى باستى ماقسات – كاسىبي بىلىكتىلىگى جوعارى مەنەدجەرلەردىڭ جاڭا بۋىنىن قالىپتاستىرىپ, ولاردىڭ كۇشىن ءتۇرلى سالادا سىناپ كورۋدى كوزدەدى. اۋەل باستا ايتىلعانداي, جەڭىسكە جەتكەن قاتىسۋشىلار باسشىلىق قىزمەتكە تاعايىندالىپ, ولارعا ويىندا جۇرگەن باستامالارىن جۇزەگە اسىرۋعا مۇمكىندىك بەردى.
«ينجينيرينگ جانە تەحنولوگيالار ترانسفەرتى ورتالىعىنىڭ» پرەزيدەنتى قىزمەتىنە تاعايىندالعان ءى.وسپانوۆ وسى كۇنگە دەيىن جيناعان مول تاجىريبەسى جاڭا ورىندا ءتيىمدى جۇمىس ىستەپ, ۇتىمدى جوبالاردى جۇزەگە اسىرۋعا سەپ بولاتىنىنا سەنىمدى.
– ەڭبەك جولىمدى مەملەكەتتىك قىزمەتتەن باستادىم. مينيسترلىكتە جۇمىس ىستەپ جۇرگەندە وڭىردە قىزمەت ەتىپ كورۋىم كەرەك دەگەن وي بولدى. بيزنەس سالاسىنا دا قىزىقتىم. مينيسترلىكتە ءتورت جىل ىشىندە دەپارتامەنت ساراپشىسىنان ديرەكتوردىڭ ورىنباسارى لاۋازىمىنا دەيىن كوتەرىلدىم. باسشىلىق تالپىنىسىمدى باعالاپ, ءاردايىم قولداۋ ءبىلدىرىپ وتىردى. كەيىن وڭىرگە – سول كەزدەگى وڭتۇستىك قازاقستان وبلىسىنا باردىم. ورتالىقتا جۇمىس ىستەپ جۇرگەندە وڭىرلەردە نە بولىپ جاتقانىن تولىق بىلمەيتىنىمە كوزىم جەتتى. ال وڭىرگە بارعانىمدا كوپ ماسەلەگە قاتىستى ويىم وزگەرىپ, تاجىريبە جينادىم. اۋىل شارۋاشىلىعىندا دا باعىمدى سىناپ, فەرمەرلەرمەن تىكەلەي جۇمىس ىستەدىم. ورتالىقتا جۇرگەن قىزمەتكەرلەر كەيدە جەرگىلىكتى ورىنداردىڭ سۇرانىسىن ءدال بىلمەي جاتادى. مۇندا جاسالىپ جاتقان نەبىر جاقسى باعدارلامالار وڭىرلەرگە قاجەت بولمايتىن كەزدەرى دە بولادى. ولار ءساتتى بولعانىمەن, بەلگىلى ءبىر ءوڭىردىڭ ناقتى ماسەلەسىن شەشۋگە باعىتتالماۋى مۇمكىن. جالپى, كاسىپكەرلەر مەن مەملەكەتتىك قىزمەتكەرلەردىڭ وڭىرلەردە تاجىريبە جيناعانىن دۇرىس دەپ ەسەپتەيمىن, – دەيدى ءى.وسپانوۆ.
ايماقتان كەيىن بىردەن حالىقارالىق ۇيىمنىڭ جۇمىسىنا ارالاسۋعا مۇمكىندىك العان ول قىزمەتتە ءوزىن جان-جاقتى سىناپ كوردى. رەزەرۆكە وتكەنگە دەيىن دۇنيەجۇزىلىك بانك پەن قازاقستان ۇكىمەتىنىڭ ء«ونىمدى يننوۆاتسيالاردى ىنتالاندىرۋ» جوباسىن باسقارۋ توبى ديرەكتورىنىڭ ورىنباسارى بولىپ قىزمەت ەتتى.
– پرەزيدەنتتىڭ جاستار كادرلىق رەزەرۆىنە قابىلداۋ ءجۇرىپ جاتقانىن ەستىدىم, بىراق وعان قۇجات تاپسىرۋ تۋرالى شەشىمگە بىردەن كەلمەدىم. حالىقارالىق ۇيىمداعى جۇمىسىمدى جالعاستىرا بەردىم. الايدا جيناعان تاجىريبەمدى حالىق يگىلىگىنە جۇمساۋىم كەرەك دەگەن وي كەلدى. مەن قاتىسقان جوبالاردىڭ ىشىندەگى ەڭ اشىق ىرىكتەۋ وسىندا بولدى. بىرنەشە كەزەڭنەن تۇرعان پروتسەسس ونلاين ءجۇردى. جوبادا جەڭىسكە جەتكەن ءاربىر مامان ءوزىن كوشباسشى رەتىندە سىناپ كورىپ جاتىر, بۇرىننان ويىندا جۇرگەن باستامالارىن ىسكە اسىراتىن كەز تۋدى. بيزنەستە جۇرگەن دارىندى جاستارىمىز مەملەكەتتىك قىزمەتتە سول سالانى دامىتۋعا تىرىسىپ ءجۇر. جوبا قازاقستانداعى بىلىكتى جاستاردىڭ باسىن قوسىپ, ولارعا ءوزارا بايلانىس ورناتۋعا, ورتاق يگى دۇنيەلەر جاساۋعا تاپتىرماس مۇمكىندىك بەرىپ وتىر, – دەيدى ءى.وسپانوۆ.
