سەنات دەپۋتاتى اتالعان زاڭ بۇزۋشىلىقتىڭ زاردابى اۋىر ەكەنىنە جانە قۇلقىننىڭ ق ۇلى بولعان مۇنداي كاسىپكەرلەردىڭ ءىس-ارەكەتىنە دەر كەزىندە توسقاۋىل قويۋ كەرەكتىگىنە نازار اۋدارعان.
«قازىر ءاربىر دارىلىك پرەپارات پەن مەديتسينالىق بۇيىم ەسەپكە الىنىپ, دارىگەرلەرىمىز ءاربىر سىرقاتتىڭ دەنساۋلىعى مەن ءومىرىن ساقتاپ قالۋ ءۇشىن جانقيارلىقپەن كۇرەسىپ جاتقان كەزدە مۇنداي سۇمپايى كاسىپكەرلەردىڭ اشكوزدىگى مەن ارامزالىعى جاعانى ۇستاتادى. ولاردىڭ ارام پيعىلىنىڭ اۋقىمى ءبىزدىڭ مىڭداعان وتانداسىمىزدىڭ ومىرىنە قاۋىپ ءتوندىرىپ, ەلىمىزدىڭ دەنساۋلىق ساقتاۋ جۇيەسىنە وراسان زور نۇقسان كەلتىرە جازدادى», دەلىنگەن حاتتا.
سونىمەن قاتار سەناتور بۇل باسسىزدىق تەك وتاندىق مەديتسيناعا ەمەس, تۇتاس ۇلتقا تونگەن قاتەر ەكەنىن دە تىلگە تيەك ەتكەن. شىن مانىندە, «قازاقستان رەسپۋبليكاسىنىڭ ۇلتتىق قاۋىپسىزدىك تۋرالى» زاڭىنا سايكەس ازاماتتاردىڭ ءومىرى, دەنساۋلىعى جانە اماندىعىنىڭ جاي-كۇيى ۇلتتىق قاۋىپسىزدىكتىڭ ءبىر ءتۇرى بولىپ تابىلادى. سوندىقتان حاتتا قىلمىستىق ىزدەستىرۋ ورگاندارى فالسيفيكات ونىمدەردى تاراتۋدان تۋىندايتىن اۋىر سالدارلاردى دالەلدەۋ كەرەكتىگىنە دە باسا ءمان بەرىلگەن.
«قازىردىڭ وزىندە حالقىمىز وتە قيىن جاعدايدى باستان كەشىرىپ وتىرعان جاعدايدا مۇنداي سوراقى قىلمىستىڭ ورىن الۋى ەل قاۋىپسىزدىگىنە تونگەن زور قاتەر دەپ باعالانۋعا ءتيىس. وسىعان وراي دارىلىك زاتتار مەن مەديتسينالىق بۇيىمداردى ساتۋ, تاراتۋ جانە ساقتاۋمەن اينالىساتىن مەكەمەلەردى شۇعىل تۇردە تەكسەرۋ كەرەك. مۇنداي استىرتىن تسەحتىڭ قانشا ۋاقىت جۇمىس ىستەپ, فالسيفيكات ونىمدەردىڭ قانشا مولشەرىن تاراتىپ ۇلگەرۋ مۇمكىندىگى دە ارنايى تەكسەرۋدى قاجەت ەتەدى», دەيدى مۇحتار قۇل-مۇحاممەد.
بۇدان باسقا, حاتتا وسى سالاداعى حالىقارالىق تاجىريبە دە سۇزگىدەن وتكىزىلىپ, مۇنداي قىلمىستىڭ اۋقىمى, ادام ءومىرى مەن دەنساۋلىعىنا تيگىزەتىن اۋىر زارداپتارى قىلمىستىق جاۋاپكەرشىلىك تۇرعىسىنان سارالانۋعا ءتيىس ەكەنى ايتىلعان. سونداي-اق جالعان دارىلىك قۇرالدار مەن مەديتسينالىق بۇيىمداردى دايارلاۋ, ولاردىڭ اتاۋى مەن قوراپتارىن زاڭسىز جولمەن پايدالانۋ دا دەربەس قىلمىستىق قۇرام رەتىندە قاراستىرىلۋى قاجەتتىگى جازىلعان.
وسىعان بايلانىستى سەنات دەپۋتاتى دارىلىك قۇرالدار مەن مەديتسينالىق بۇيىمداردى پايدالانۋ سالاسىنداعى قىلمىستىق زاڭنامانى ودان ءارى جەتىلدىرۋ ماسەلەسىن جەدەل قولعا الۋ كەرەكتىگىن العا تارتىپ, بۇل ىستە جوعارعى پالاتانىڭ حالىقارالىق قاتىناستار, قورعانىس جانە قاۋىپسىزدىك كوميتەتى قولداۋ مەن كومەك كورسەتۋگە ءازىر ەكەنىن جەتكىزگەن.
سەناتوردىڭ مالىمدەمەسى جاريا ەتىلگەن كۇنى تۇستەن كەيىن الدامشى ءدارى-دارمەك جاساۋشىلار مەن ونى ۇيىمداستىرۋشىلاردىڭ قاماۋعا الىنعانى حابارلاندى. بىراق كۇدىكتىلەردىڭ اتى-ءجونى كورسەتىلمەۋىنە قاراعاندا, ولاردىڭ ارتىندا ءدۇمى مىقتى بىرەۋلەر تۇرعانداي كورىنەدى.
