ماسەلەن, تاراز قالاسىنداعى «كوبەسوۆا» جەكە كاسىپكەرلىگى 2011 جىلدان بەرى وتتەگى باللونىن تولتىرۋمەن اينالىسىپ كەلەدى. اتالعان مەكەمە باسشىسى ميراش كوبەسوۆانىڭ ايتۋىنشا, وسى ۋاقىتقا دەيىن ولار وبلىستاعى 45 اۋرۋحانانى وتتەگى باللونىمەن قامتاماسىز ەتىپ كەلگەن. الايدا قازىرگىدەي الەمدى ابىگەرگە سالعان قاۋىپتى ىندەت كەزىندە ناۋقاس جاندار ءۇشىن وتتەگى باللوندارىنىڭ قاجەتتىلىگى ارتقان. قازىرگى كەزدە «كوبەسوۆا» جەكە كاسىپكەرلىگى تاراز قالاسىنداعى 5 اۋرۋحانانى جانە وبلىستىڭ بارلىق 10 اۋدانىنان ءبىر-ءبىر اۋرۋحانانى وتتەگى باللونىمەن قامتاماسىز ەتۋدە. وزگەگە ءومىر سىيلاۋدى ماقسات ەتكەن كاسىپكەر ەرىكتىلەردىڭ كۇشىمەن كۇن-ءتۇن دەمەي جۇمىس ىستەۋدە.
اتالعان جەكە كاسىپكەرلىك وسى ۋاقىتقا دەيىن وبلىس اۋرۋحانالارىن كۇنىنە 56 وتتەگى باللونىمەن قامتىپ كەلگەن بولسا, بۇگىندە بۇل سۇرانىس ون ەسەگە ارتىپتى. بۇگىندە ولار 500-600 وتتەگى باللونىن تولتىرۋدا ەكەن. ء«بىر مينۋتتا 1-دەن 5 وتتەگى باللونىنا دەيىن تولتىرامىز. ساعاتىنا 250-300 وتتەگى باللونى تولتىرىلادى. اينالاسى ەكى-ءۇش ساعاتتىڭ ىشىندە قاجەت دۇنيەنى دايىنداۋعا بولادى. دەگەنمەن, وسى ۋاقىتقا دەيىن جۇك ارتۋشىلار ماسەلەسى تۋىنداپ كەلدى. الايدا بۇل ماسەلە دە ءوزىنىڭ شەشىمىن تاپتى. كۇن سايىن ەرىكتىلەر كومەككە كەلىپ, بىزگە كومەكتەسۋدە. سونىمەن قاتار بىزگە «قازفوسفات» جاۋاپكەرشىلىگى شەكتەۋلى سەرىكتەستىگىنىڭ دە كومەگى كوپ, كومەكتەسىپ وتىرعان ازاماتتاردىڭ بارىنە دە العىس ايتامىن», دەيدى ميراش كوبەسوۆا. راسىندا دا, كۇن سايىن وڭىردە وتتەگى باللوندارىنا دەگەن سۇرانىس ارتۋدا ەكەن. ماسەلەن, قورداي اۋدانى 25, ت.رىسقۇلوۆ اۋدانى 30, مەركى اۋدانى 40, تالاس اۋدانى 70 وتتەگى باللونىنا تاپسىرىس بەردى. وزگە اۋداندار دا ءوز قاجەتىن سۇرايدى. بىراق كاسىپكەر ولاردى اۋداندارعا جەتكىزۋ جاعى قيىنداۋ بولىپ تۇرعانىن ايتادى. جۋىردا عانا شۋ اۋدانىنا جىبەرگەن كولىك بۇزىلىپ, وتتەگى باللونى اۋرۋحاناعا ۋاقتىلى جەتپەگەن. ياعني كولىك تاپشىلىعى كەيدە قول بايلايدى ەكەن. وسى جانە وزگە دە ماسەلەلەردى ايتىپ وبلىس اكىمى بەردىبەك ساپارباەۆقا حات جازعان كاسىپكەر اكىمنىڭ تاراپىنان قولداۋ بار ەكەنىن, جۋىردا بارلىق ماسەلەنىڭ شەشىمىن تاباتىنىن ايتادى.
بۇگىندە جامبىل جۇرتشىلىعىنا جاناشىر بولىپ, ناۋقاستاردى وتتەگىمەن قامتىپ وتىرعان «كوبەسوۆا» جەكە كاسىپكەرلىگى بۇل ءىستى ءارى قاراي جالعاستىرا بەرەدى. «جاقسىدا جاتتىق جوق» دەگەندەي, ميحايل پلاتوۆ, انتون كاباكوۆ سياقتى ەرىكتى ازاماتتار دا بۇل ىسكە قولۇشىن سوزۋدا ەكەن. سونىمەن قاتار «تاراز-بولاشاق» جوعارى مەديتسينالىق كوللەدجىنىڭ قۇرىلتايشىسى قانات اسقاروۆ, كوللەدج ديرەكتورى اينۇر جەكسەمبينوۆا باستاعان وقۋ ورنىنىڭ قىزمەتكەرلەرى دە ىزگىلىك تانىتىپ, ءوز قاراجاتى ەسەبىنەن ەرىكتىلەرگە تاماق ءپىسىرىپ, تاراتۋدا. وسىلايشا قاۋىپتى ىندەتپەن كۇرەستە كوپ بولىپ جۇمىلعان جامبىلدىقتار ناۋقاستارعا ءۇمىت سىيلاپ, جاقسىلىقتىڭ جارشىسى اتانىپ وتىر.
جامبىل وبلىسى
