سەرجان وماروۆ 1973 جىلى الماتى وبلىسى الاكول اۋدانىنىڭ ورتالىعى – ءۇشارال قالاسىندا دۇنيەگە كەلدى. عاسىرلار توعىسىندا الاۋى تۇتانعان سيدنەي وليمپياداسىندا قولا مەدالدى يەلەنگەن ايدىن سماعۇلوۆتاي داڭقتى دزيۋدوشىنى باپتاعان بىلىكتى باپكەر باقىتبەك ءمۇستافيننىڭ قول استىندا جاتتىعىپ, بالۋاندىق ونەردىڭ قىر-سىرىنا قانىقتى. كەيىننەن وسكەمەندەگى شىعىس قازاقستان مەملەكەتتىك ۋنيۆەرسيتەتىن ءتامامداپ, سول جەردە رۋسلان سەيىلحانوۆ, رۇستەم سماعۇلوۆ, اسقار موجانوۆ, ەرجان ومارباەۆ, ەرلان شەدەرباەۆ سىندى الەمدىك دەڭگەيدەگى جارىستاردا جاسىنداي جارقىراعان ساڭلاقتارمەن ءبىر زالدا جاتتىقتى. الاشتىڭ ماقتان تۇتار ازاماتى ايدىن سماعۇلوۆپەن ءۇش جىل بويى جاتاقحانانىڭ ءبىر بولمەسىندە تۇرىپ, ۋاقىت وزا وليمپيادادا اتوي سالعان بالۋانعا اعالىق قامقورلىق كورسەتتى.
سەرجاننىڭ سپورتشى رەتىندە دە باعىندىرعان بەلەستەرى از ەمەس. ول سامبو كۇرەسىنەن رەسپۋبليكالىق جارىستاردا وزا شاپتى, كوپتەگەن تۋرنيرلەردە توپ جاردى. 1993 جىلى كستوۆودا وتكەن جاستار اراسىنداعى الەم بىرىنشىلىگىنىڭ قولا مەدالىن موينىندا جارقىراتتى. قازاق كۇرەسىنەن ۇيىمداستىرىلعان بىرقاتار ءىرى جارىستاردىڭ تۇيە بالۋانى اتانىپ, «تەمىر تۇلپاردى» دا تىزگىندەدى.
ۇلكەن سپورتتان قول ۇزگەننەن كەيىن كەيىپكەرىمىز ءتۇرلى كاسىپتىڭ تۇتقاسىن ۇستادى. الايدا بوز كىلەمنەن الىستاعان جوق. جاڭا عاسىر تابالدىرىقتان اتتاعان تۇستا ءوزىنىڭ جەكە جوبالارىن باستاپ, الماتى مەن ءۇشارالدىڭ اراسىن كەزىپ جۇرگەن كەزىندە «جەرسۋ» دەپ اتالاتىن ىرگەلى كورپوراتسيانىڭ باسشىسى باۋىرجان وسپانوۆ ءوزىنىڭ تۋعان جەرى – الاكول اۋدانىنىڭ جىلاندى اۋىلىندا كۇرەس ۇيىرمەسىن اشىپ, باپكەر بولۋعا سەرجانعا قولقا سالدى. ارينە بەلگىلى كاسىپكەردىڭ بۇل بالۋانعا كوڭىلى ءتۇسۋى دە بەكەر ەمەس ەدى. سەرجاننىڭ بالۋان رەتىندە باعىندىرعان بەلەستەرىمەن قاتار, ونىڭ ازاماتتىق قاسيەتى, ەڭبەكقورلىعى, ىسىنە تياناقتىلىعى, سوزىنە بەرىكتىگى جايىندا ول دا ەستىگەن بولار. بيزنەسمەن وسپانوۆ باپكەر وماروۆقا: «مىندەتتى تۇردە وليمپيادا چەمپيونىن تاربيەلەۋگە ءتيىسسىڭ دەپ مەن ساعان تالاپ قويمايمىن. بىزدىكى تەك جاستار اۋىلدا سەندەلىپ بوس جۇرمەسىن, جات قىلىقتاردان اۋلاق بولسىن, سالاماتتى ءومىر سالتىن ۇستانسىن دەگەن نيەت قانا. ولار سپورت ارقىلى شىنىعىپ, شىمىر بولىپ وسسە دە ريزامىن. ال ەگەر الدەبىرەۋلەر ءوز قاتارىنىڭ الدى بولىپ, دارا تالانتىمەن وقشاۋلانىپ جاتسا, وندا ءبىز دە قاراپ قالمايمىز. بارىنشا كومەك كورسەتۋگە ءازىرمىز», دەدى.
بيزنەستە باعى جانعان ازامات قول ۇشىن بەرەمىن دەپ قۇلشىنىپ تۇرسا, تارتىناتىن نەسى بار. سەرجان كەلىسىمىن بەردى دە, ىسكە بىلەك سىبانا كىرىستى. ءوزى ارمانداعان الماتىنى, كىندىك قانى تامعان جەرى – الاكولدى تاستاپ, بالا-شاعاسىن ەرتتى دە, جوڭعار الاتاۋى بوكتەرىندەگى جىلاندىعا ءبىر-اق تارتتى. كەلگەن بەتتە ب.وسپانوۆ سول اۋىلدان ءۇي اپەردى, الدىنا ازىن-اۋلاق مال سالىپ بەردى. جاتتىعۋعا قاجەتتى قۇرال-جابدىقتارمەن قامتاماسىز ەتىپ, الاڭسىز دايارلانۋلارىنا جاعداي جاسادى. سپورتشىلاردىڭ وقۋ-جاتتىعۋ جيىندارىنان قالماي, شەت جەرلەردە وتەتىن تۋرنيرلەرگە, رەسپۋبليكالىق جارىستارعا شاكىرتتەرىن اپارۋعا قاجەتتى شىعىندى باكەڭ ءوز موينىنا الدى. ال باپكەرگە تەك ەرىنبەي ەڭبەك ەتىپ, شاكىرتتەرىنىڭ شەبەرلىكتەرىن شىڭداۋ عانا قالدى. ونداي قارا جۇمىستان س.وماروۆتىڭ تارتىنبايتىنى انىق.
سودان بەرى تالاي جىلدىڭ ءجۇزى بولدى. جىلاندىنىڭ جاستارى سالاۋاتتىلىققا كوپتەپ بەت بۇردى. كۇرەس زالىن جاعالاعانداردىڭ قاراسى مول. ال بۇقارالىق بار جەردە, ناتيجەنىڭ دە بولاتىنى زاڭدى عوي. بىرتە-بىرتە وماروۆ باپتاعان ورەندەردىڭ الدى حالىقارالىق جارىستاردا وزا شابا باستادى. ەڭ تاڭداۋلى شاكىرتى – اراي قاليجانوۆا 2005 جىلى سامبودان جاسوسپىرىمدەر اراسىندا گرەكيادا وتكەن الەم بىرىنشىلىگىندە قولا مەدالدى ەنشىلەدى. اقمارال شىڭعىسحانوۆا – بەلبەۋلى كۇرەستەن 2006 جىلى ايەلدەر اراسىندا ۇيىمداستىرىلعان قازاقستاننىڭ تۇڭعىش چەمپيوناتىنىڭ جەڭىمپازى. ءمولدىر باياحمەت ەكى رەت وقۋشىلار اراسىندا ەل چەمپيونى اتاندى. ماقپال تىلەۋباەۆا, سامات جانە سانات كوپشىكباەۆتار – رەسپۋبليكا بىرىنشىلىگىنىڭ, حالىقارالىق جارىستاردىڭ جەڭىمپازدارى. باسقا دا بولاشاعىنان ءۇمىت كۇتتىرەتىن جاس قىراندار جىلاندىدان كوپتەپ شىقتى. سونى بايقاعان وسپانوۆ مىرزا دا قاراپ قالعان جوق. ول ءوز قاراجاتىنا شاعىن عانا اۋىلدا سپورت كەشەنىن سالدى.
2015 جىلى ءدال سول باكەڭنىڭ دەمەۋشىلىگىمەن الماتى وبلىسى الاكول اۋدانىنىڭ لەپسى اۋىلىندا سپورتتاعى دارىندى بالالارعا ارنالعان مامانداندىرىلعان مەكتەپ-ينتەرنات ءوز ەسىگىن ايقارا اشتى. گرەك-ريم كۇرەسى, ەركىن كۇرەس, دزيۋدو, بوكس, اۋىر اتلەتيكا, شاڭعى جانە تاعى باسقا دا سپورت تۇرلەرى بويىنشا ۇيىرمەلەر جۇمىس ىستەي باستادى. سپورت زالدارى زامان تالابىنا ساي قۇرال-جابىقتارمەن جابدىقتالدى. بۇل ىسكە ەلىمىزدىڭ بىرقاتار وڭىرىنەن بىلىكتى باپكەرلەر تارتىلدى. ءبىر سوزبەن ايتساق, رەسپۋبليكامىزدىڭ ءار قيىرىنان كەلگەن جاس ورەندەردىڭ ەش الاڭسىز جاتتىعۋىنا بارىنشا جاعداي جاسالدى. ال وسى مەكەمەنى باسقارۋ بەلگىلى بالۋان, بىلىكتى باپكەر سەرجان بوستان ۇلىنا سەنىپ تاپسىرىلدى. باسشى رەتىندە دە ول ىسكەرلىگىمەن كوزگە ءتۇستى. باس-اياعى ءتورت جىلدان اسا ۋاقىت ارالىعىندا لەپسىدەگى مەكتەپ-ينتەرناتتىڭ وقۋشىلارى رەسپۋبليكالىق دودالاردا دارالانىپ, حالىقارالىق ارەنالاردا بوي كورسەتتى. ول از دەسەڭىز, ايتۋلى ازاماتتىڭ تىكەلەي ۇيتقى بولۋىمەن ەركىن كۇرەستەن ماۋلەن مامىروۆ پەن داۋرەن جۇماعازيەۆ, گرەك-ريم كۇرەسىنەن نۇرباقىت تەڭىزباەۆ پەن مارعۇلان اسەمبەكوۆ, بوكستان قانات يسلام مەن جانىبەك ءالىمحان ۇلى, دزيۋدودان ايدىن سماعۇلوۆ, اسحات جيتكەەۆ جانە ازامات مۇقانوۆتىڭ قۇرمەتىنە لەپسىدە جىل سايىن ءدۇبىرلى دودا ۇيىمداستىرىلىپ تۇردى.
سەرجان توقمەيىلسۋدى جانى سۇيمەيتىن جىگىت ەدى. اركەز «ارىق سويلەپ, سەمىز شىعۋدى» ۇناتاتىن. ماقتانىپ, شاكىرتىنىڭ جەڭىستەرىنە ماساتتانىپ تۇرعان ءساتىن ءبىر كورمەيسىڭ. ءسال كوتەرمەلەپ سويلەسەڭ ء«بارى اللا تاعالانىڭ ارقاسى. بىزدىكى – جاي تالپىنۋ, تىرمىسۋ عوي» دەپ كىشىپەيىلدىك تانىتاتىن. ول ەشۋاقىتتا ماقتانبايدى جانە ءوزىن دە ماقتاعاندى ۇناتپايدى. بولاشاقتاعى جوسپارىن سۇراساڭ, «بۇيىرتسا» دەپ باپپەن سويلەپ, سابىرلى قالپىنان ەش اينىمايتىن. ويتكەنى سەرجاننىڭ تابيعاتى سونداي! ال ەل سپورتىنىڭ جاي-كۇيى جايىندا اڭگىمە قوزعالسا, ونى توقتاتۋ قيىن. كەشەگىسىن, بۇگىنگىسىن ايتقاندا, الدىنا جان سالمايدى. تەك ءوزى سەرىك ەتكەن كۇرەس ونەرىن عانا ەمەس, وزگە دە سپورت تۇرلەرىنە قانىق ەكەنىن بىردەن اڭعارتادى. قازاق سپورتىنىڭ تاريحىنا كادىمگىدەي قانىق. ونداي ساتتەردە سابازبەن ءسوز تالاستىرۋ, تەكەتىرەسۋ – بەكەر. ىشتەي بولسا دا, مىقتىلىعىن مويىندايسىڭ!
وسكەمەندە بىرگە وقىعان دوستارى ايتادى: جاتاقحانادا تۇرعاندا سەرجاندى دۇكەنگە جۇمساساڭ, قاجەتتى تاعامعا بولىنگەن قاراجاتتىڭ تەڭ جارتىسىنا گازەت-جۋرنالدار ساتىپ الادى. «ەگەمەن قازاقستان», «سپورت», «جاس الاش», «قازاق ادەبيەتى», «انا ءتىلى», «پاراسات»... كىلەڭ قازاق باسىلىمدارى. ونسىز دا «شىقپا, جانىم شىقپا» دەپ تيىن ساناپ جۇرگەن ستۋدەنتتەر ونىڭ ءبىر بۋما گازەتتى كوتەرىپ كەلە جاتقانىن كورگەندە «مۇنىڭ نە, سەرجان؟ ەرتەڭ دە كۇن بار عوي. ازىققا اقشا قالدىرساڭ قايتەدى» دەپ رەنجىگەندەي سىڭاي تانىتادى ەكەن. سەكەڭ سوندا دا سەلت ەتپەيدى-اۋ! «ماسەلە تەك قارىن تويدىرۋ ەمەس قوي. ادام بالاسىنا رۋحاني ازىق تا قاجەت», دەپ جىلى جىميادى دا قويادى. وسىنداي جاۋاپتى ەستىگەندە ءبىز دە توسىلىپ قالامىز. ءسوز تاپقانعا قولقا جوق!
