يۆان يۆانوۆيچ تالانتتى باسشى, تاماشا ۇيىمداستىرۋشى ءارى ناۋقاستارى مەن ارىپتەستەرىنە باۋىرمال, جاناشىر بولدى. ول COVID-19-بەن كۇرەستە العاشقى كۇننەن باستاپ الدىڭعى شەپتە تۇردى.
ول مەديتسينالىق قاۋىمداستىق ورتاسىندا ايرىقشا ابىروي-بەدەلگە يە بولدى. قىزمەتكەرلەرى دە جوعارى كاسىبيلىگى مەن قايىرىمدىلىعى ءۇشىن, اينالاسىنا ۇنەمى تەك سوزبەن عانا ەمەس ىسىمەن دە قول ۇشىن سوزعانى ءۇشىن ونى جوعارى باعالادى. ءومىرىنىڭ سوڭعى كۇنىنە دەيىن ول ءوزىنىڭ ماماندىعىنا ادال بولدى.
يۆان يۆانوۆيچ ءوزىنىڭ مەديتسيناداعى ەڭبەك جولىن 1978 جىلى اۋرۋحانادا سانيتار بولىپ باستادى. بۇل كەزدە ول قاراعاندى مەملەكەتتىك مەديتسينالىق ينستيتۋتىنا وقۋعا تۇسكەن بولاتىن. سودان كەيىن 3 كۋرستا وقىپ جۇرگەنىندە حيرۋرگيالىق بولىمدە مەيىرگەر بولدى. وقۋدى تامامداعان سوڭ قاراعاندى وبلىسى مولودەجنىي كەنتىنىڭ اۋداندىق ورتالىق اۋرۋحاناسىندا حيرۋرگ دارىگەر بولىپ قىزمەت اتقاردى.
يۆان يۆانوۆيچ ءوزىنىڭ ومىرىندەگى ماڭىزدى كەزەڭدەرىنىڭ ءبىرى دەپ پروفەسسور ا.يۋ.سۆيدلەر باسقاراتىن الماتى ينستيتۋتى ۋرولوگيا كافەدراسىنىڭ كلينيكاسىنداعى بىلىكتى دارىگەرلەر ورتاسىنا تۇسكەن كەزىن ەسەپتەيتىن ەدى.
ءوزىنىڭ كاسىبي قىزمەتى بارىسىندا يۆان يۆانوۆيچ ءتۇرلى العىس حاتتارمەن جانە قۇرمەت گراموتالارىمەن ماراپاتتالدى. 2018 جىلى ەلوردانىڭ مەديتسينالىق ۇيىمدارى اراسىنداعى دەنساۋلىق ساقتاۋ سالاسىنداعى بىلىكتى مەنەدجەر رەتىندە «التىن شيپاگەر» مەديتسينالىق سىياقىعا يە بولدى. سونىمەن قاتار ول كاسىبي قىزمەت بارىسىنداعى اتقارعان ەڭبەگى ءۇشىن «قۇرمەت» (2013 ج.) وردەنىمەن, «دەنساۋلىق ساقتاۋ ىسىنە قوسقان ۇلەسى ءۇشىن» ءتوس بەلگىسىمەن, «قازاقستان رەسپۋبليكاسىنىڭ تاۋەلسىزدىگىنە – 20 جىل» مەدالىمەن, سونداي-اق قازاقستان پرەزيدەنتىنىڭ جارلىعىمەن 2020 جىلدىڭ 20 ماۋسىمىندا ازاماتتاردىڭ دەنساۋلىعىن قورعاۋ بويىنشا جانكەشتىلىكپەن جۇمىس ىستەپ, زور ەڭبەك سىڭىرگەنى ءۇشىن «پاراسات» وردەنىمەن ماراپاتتالدى.
يۆان ءيۆانوۆيچتىڭ باسشىلىق ەتۋىمەن 2018 جىلدىڭ قىركۇيەك-قاراشا ايلارىندا ەكى ستاتسيوناردىڭ, ياعني №2 قالالىق اۋرۋحانا مەن №1 پەريناتالدىق ورتالىقتىڭ بىرىگۋ پروتسەدۋراسى جۇرگىزىلدى. بۇل بىرىگۋ جولى بىرقاتار وڭدى ناتيجە بەردى.
ونىڭ موينىنا دارىگەرلىك جانە ۇيىمداستىرۋشىلىق قىزمەتىنىڭ ۇلكەن جۇگى ارتىلىپ, ادال ەڭبەگىنىڭ ارقاسىندا جۇزدەگەن ادامنىڭ ءومىرى قۇتقارىلىپ, مىڭداعان ناۋقاستىڭ شىنايى العىسىنا يە بولدى.
ونىڭ جارقىن بەينەسى ءاردايىم جادىمىزدا ساقتالادى.
نۇر-سۇلتان قالاسىنىڭ اكىمدىگى
