ەلوردا • 27 شىلدە، 2020

ەلوردادا كۆي بويىنشا جەدەل جاردەم شاقىرۋ سانى 5 ەسە ازايدى

توسەك-ورىن قاجەتتىلىگى 90%-دان 45%-عا تومەندەگەن. بۇل تۋرالى ەلوردا اكىمدىگىنىڭ رەسمي سايتىنى سىلتەمە جاساي وتىرىپ Egemen.kz حابارلايدى.

ايىم ءداۋىت

كارانتين شارالارى مەن امبۋلاتوريالىق ەمدەۋدى كۇشەيتۋ ناتيجەسىندە اۋرۋحانالار مەن دارىگەرلەردىڭ جۇكتەمەسى ازايعان. ەلوردادا 27 شىلدەگە دەيىن كۆي جۇقتىرعان 10 070 ناۋقاس تىركەلدى. ونىڭ ىشىندە 6766 ادام نەمەسە 67%-ى ساۋىعىپ، اۋرۋحانادان شىعارىلدى، 966 ادام قالا اۋرۋحانالارىندا ەم الۋدا. 5 شىلدەدەن باستاپ ينفەكتسيالىق جانە پروۆيزورلىق ستاتسيونارلاردا ەمدەلىپ جاتقاندار سانى 48% (3357-دەن 1758 ادامعا دەيىن) ازايعان.

سايكەسىنشە توسەك-ورىن قاجەتتىلىگى 90%-دان 45%-عا دەيىن تومەندەپ، بوس توسەك-ورىن سانى 369-دان 2000-عا دەيىن ارتقان. «پنەۆمونيامەن تۇسكەن ستاتسيونارلىق ەمدەگى ناۋقاستار سانى 44% (1333-تەن 746-عا دەيىن) ازايدى. جەدەل جاردەم ستانتسياسىنا جۇگىنەتىندەر 53% (تاۋلىگىنە 3410-نان 1608-گە دەيىن)، شاقىرۋلار 56% (تاۋلىگىنە 2368-دەن 1039-عا دەيىن)، كۆي بويىنشا شاقىرۋلار سانى تاۋلىگىنە بەس ەسە – 350-دەن 73-كە دەيىن ازايدى.

بىراق ىندەت ەشقايدا كەتكەن جوق. سوندىقتان كارانتين شارالارىن قاتاڭ ساقتاۋ قاجەت: ماسكا تاعىپ، الەۋمەتتىك قاشىقتىق ساقتاعان ءجون»، – دەدى نۇر-سۇلتان قالالىق قوعامدىق دەنساۋلىق ساقتاۋ باسقارماسى باسشىسىنىڭ م.ا. ءاليا رۇستەموۆا بۇگىنگى بريفينگتە. نۇر-سۇلتان قالاسىندا كوروناۆيرۋس ينفەكتسياسىن انىقتاۋ ءۇشىن پتر-تەستىلەۋدى توعىز زەرتحانا جۇرگىزەدى.

ونىڭ ىشىندە جەتى مەملەكەتتىك، ەكى جەكە زەرتحانا. ولاردىڭ جالپى قۋاتتىلىعى 5،5 مىڭ زەرتتەۋگە دەيىن. پاندەميا كەزىندە 284 مىڭ پتر تەست الىندى. سوڭعى ءۇش اپتا ىشىندە زەرتحانالاردا تاۋلىگىنە ورتاشا 2500 تەست جاسالادى. بۇل ماۋسىم ايىنا قاراعاندا 30%-عا تومەن (سانى 3500). قالانىڭ بارلىق ەمحانالارىندا پروۆيزورلىق بولىمشەلەر ۇيىمداستىرىلعان.

وندا جرۆي جانە پنەۆمونيا بەلگىلەرى بار ناۋقاستاردان جاعىندى الىنادى. سونداي-اق ءموبيلدى بريگادالار دا قۇرىلدى، ولار ۇيدە سيمپتومسىز ۆيرۋس تاسىمالداۋشىلاردان، سونداي-اق COVID-19 ناۋقاستارىمەن جاقىن قارىم-قاتىناستا بولعان ادامداردان ماتەريال الادى.

"بۇگىندە نۇر-سۇلتان قالاسىندا پتر تەست تاپسىرۋ پروبلەمالارى جوق. قازىرگى ۋاقىتتا قالا اكىمدىگى قوسىمشا زەرتحانالىق قۇرال-جابدىقتاردى ساتىپ الۋ ەسەبىنەن ەلوردا تۇرعىندارى ءۇشىن تەستىلىك زەرتتەۋ سانىن ارتتىرۋ بويىنشا جۇمىس جۇرگىزۋدە. سونىمەن قاتار كوروناۆيرۋس ينفەكتسياسىنىڭ بەلگىلەرى مەن ەپيدەميولوگيالىق انامنەز بولماعان جاعدايدا پتر تەست تاپسىرۋدىڭ قاجەتى جوق"، دەپ اتاپ ءوتتى ءا.رۇستەموۆا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز