«مەملەكەت باسشىسىنىڭ تاپسىرماسىنا سايكەس بيىلعى جىلدىڭ 1 قاڭتارىنان باستاپ الداعى ءتورت جىل ىشىندە ەلىمىزدەگى پەداگوگتەردىڭ جالاقىسى ەكى ەسە وسەدى. اعىمداعى جىلدىڭ قاڭتار ايىنان باستاپ پەداگوگتەردىڭ لاۋازىمدىق ەڭبەكاقىسى 25%-عا ءوستى, 2021 جىلدىڭ قاڭتارىنان باستاپ ءوسىم 50%-عا, 2022 جىلدىڭ قاڭتارىنان 75%-عا, 2023 جىلدىڭ قاڭتارىنان 100%-عا جەتۋى ءتيىس. جالاقىنىڭ ءوسۋى جوو مەن جوو-نان كەيىنگى ءبىلىم بەرۋ ۇيىمدارىنىڭ وقىتۋشىلارىنان باسقا پەداگوگتەرگە قاتىستى.
بۇل جاڭالىق ءبىلىم بەرۋ ۇيىمدارىندا جۇمىس ىستەيتىن مەديتسينا قىزمەتكەرلەرىن دە سىرت اينالىپ ءوتتى. ولقىلىقتىڭ ورنىن تولتىرۋ ماقساتىندا سالالىق ءبىلىم كاسىپوداعى وسى قىزمەتكەرلەردىڭ جالاقىسىن كوتەرۋ تۋرالى ماسەلەنى رەسمي حات ارقىلى 16 ناۋرىز 2020 جىلى ءبىلىم جانە عىلىم مينيسترلىگىنە, 19 مامىر 2020 جىلى پرەمەر-مينيستر اسقار مامينگە جەتكىزدى», دەپ جازىلعان رەسمي حابارلامادا.
قازاقستان ۇكىمەتىنىڭ لاۋازىمدىق جالاقىنى كوتەرۋ تۋرالى №1193 قاۋلىسى ءبىلىم بەرۋ ۇيىمدارىنداعى كىتاپحاناشىلارعا قاتىستى بولسا دا, بىرقاتار وڭىرلەردە وسى قاۋلى ورىندالماي وتىرعان كورىنەدى. سالالىق كاسىپوداق وسىعان وراي دا قر بعم مەن ۇكىمەتكە حات جولداعان.
«سالالىق كاسىپوداق ءبىلىم بەرۋ ۇيىمدارىندا جۇمىس ىستەيتىن كىتاپحاناشىلار مەن مەديتسينا قىزمەتكەرلەرىنىڭ ەڭبەكاقىسىنا قاتىستى ماسەلەنى قر كاسىپوداقتار فەدەراتسياسى الدىندا دا كوتەردى. جۋىردا قر كاسىپوداقتار فەدەراتسياسى ۇكىمەتكە حات جولدادى. كوتەرىلگەن ماسەلەلەر وڭىنان شەشىلەتىنىنە سەنىم بىلدىرەمىز»,- دەلىنگەن قوعامدىق بىرلەستىكتىڭ حابارلاماسىندا.
