ايماقتار • 24 شىلدە، 2020

اقتوبەنىڭ الەۋەتى ارتىپ كەلەدى

261 رەت كورسەتىلدى

اقتوبە ەلىمىزدەگى ونەركاسىبى دامىعان وڭىرلەردىڭ ءبىرى. مۇندا وندىرىستىك كاسىپورىنداردىڭ ءورىسىن ءوسىرۋ ءىسى ەكى باعىت بويىنشا جۇرگىزىلۋدە. ونىڭ ءبىرىنشىسى بۇرىننان بار. ءوز ءداستۇرى قالىپتاسقان بايىرعى كاسىپورىنداردى جاڭعىرتۋ جونىندەگى جوبالار، - دەپ حابارلايدى Egemen.kz.

بۇدان 3-4 جىل بۇرىن باستالعان مودەرنيزاتسيالىق ءىس-شارالاردى ساتىلاي جۇرگىزىپ، ءار جىل سايىن ونىڭ كولەمىن ءوسىرۋ كوزدەلگەن. نەگىزىنەن وتاندىق كومپانيالاردىڭ ءوز قاراجاتى ەسەبىنەن جۇرگىزىلەتىن جاڭعىرتۋ جۇمىستارىنا بولىنەتىن قاراجات كولەمى جارتى تريلليون تەنگەنىڭ توڭىرەگىندە بولماق.

ال ەكىنشى باعىت نارىقتاعى سۇرانىسقا سايكەس جاڭا كاسىپورىندار قۇرۋ. بۇل ءىس شاشىراڭقى ەمەس، كەرىسىنشە وعان شوعىرلانۋ مەن توپتاسۋ سيپاتىنداعى ۇردىستەر ءتان. بۇل باعىتتا "اقتوبە يندۋستريالىق ايماعىنىڭ" اتقاراتىن ءرولى مەن قىزمەتى ايىرىقشا. بۇگىنگى كۇنگە دەيىن اتالعان يندۋستريالىق ايماقتىڭ الەۋەتىن ودان ءارى كوتەرۋ ىسىندە جۇزەگە اسا قويماعان مۇمكىندىكتەر مولىراق بولسا، قازىرگى كۇنى ونىڭ پايدالانىلۋ كوەفيتسيەنتى تولىعىپ كەلەدى. ايتالىق بيىل اقتوبە قالاسىندا جىل اياعىنا دەيىن جالپى قۇنى 21،8 ميلليارد تەنگە تۇراتىن بەس كاسىپورىن اشۋ قولعا الىنعان. وسى ارقىلى 315 جاڭا جۇمىس ورنىن قۇرۋ بەلگىلەنگەن. بۇل يندۋستريالىق ايماقتىڭ الەۋەتىن ودان ءارى ءوسىرۋ ىسىنە قوسىلا الاتىن ەلەۋلى كۇش بولماق. ەگەر ونىڭ جاي-كۇيىنە تەرەڭىرەك زەر سالساق ءبارى دە نارىق سۇرانىسىنان تۋىنداعان ومىرشەڭ جوبالار ەكەنىنە كوز جەتكىزە الامىز.

بۇل جونىندە وڭىرلىك ۇيلەستىرۋ كەڭەسىندە بيىلعى جىلى جۇزەگە اسىرىلاتىن جۇمىستاردىڭ تىزبەسى جاسالعان. اتاپ ايتقاندا بۇلار قۇرىلىس يندۋسترياسى ونىمدەرى، قولدانىلعان موتور مايلارىن قايتا وڭدەۋ، كۇردەلى مەتالل قۇرىلىمدار جانە مەتالل بۇيىمدارىن دايىندايتىن زاۋىت بولىپ تابىلادى. اتالعان كەڭەس قۇنى 10 ميلليون تەنگەگە جۋىق سەگىز جوبانى ماقۇلداعان ەكەن. مۇنداي سۇيەكتى دە سالماقتى وندىرىستىك كۇشتەردى توپتاستىرۋ ارقىلى يندۋستريالىق ايماقتا جىل سوڭىنا دەيىن كەم دەگەندە 600 ادامدى جۇمىسپەن قامتۋعا مۇمكىندىكتەر تۋعىزىلماق. سونداي-اق ارتىق-كەمى جوق 25 كومپانيا يندۋستريالىق ايماقتىڭ پرەزيدەنتى ەكەندىگى دە ونىڭ پرەسپەكتيۆالىق مۇمكىندىكتەرىنەن حابار بەرە الادى.

ەلىمىزدە كەنجەلەۋ دامىعان ەرەكشە ءوندىرىستىڭ ءبىرى –قاعاز شىعارۋ ءوندىرىسى ەكەنى بەلگىلى. "اقتوبە يندۋستريالىق ايماعىندا" وسى ولقىلىقتىڭ ورنىن تولتىرۋعا قاتىستى قاعاز وندىرەتىن زاۆودتىڭ قۇرىلىسى باستالىپ كەتكەنى دە اتاپ ايتۋعا تۇرارلىق. بۇل كاسىپورىن ينۆەستيتسيالىق قاراجات ەسەبىنەن تۇرعىزىلۋدا. قۇنى 300 ميلليون تەنگە قۇرايتىن ءوندىرىس ورنى جىلىنا 3335 توننا قاعاز نەمەسە 23 ميلليون وراما دارەتحانا قاعازىن، 3 ميلليون ورام قاعاز سۇزگىلەرىن جانە 7،5 ميلليون پاكەت مايلىقتارىن شىعارماق. بۇعان قاجەتتى شيكىزات كوزدەرىن تولىقتىرۋدىڭ بىرنەشە جولدارى قاراستىرىلعان. بۇل ءۇشىن بىرىنشىدەن ماكۋلاتۋرانى جيناۋ جوسپارى جاسالعان. مۇنداي ۇدەرىس وندىرىستىك تسەحتىڭ جانىنان سالىنعان سۇرىپتاۋعا جانە ساقتاۋعا ارنالعان قويما ارقىلى جۇرگىزىلەدى. بۇعان دەيىن بارلىق شيكىزات رەسەيدەن ساتىپ الىنىپتى. جربا جاڭاشىلدارى ەندى بۇل كىرىپتارلىقتان تولىقتاي ارىلۋدى ماقسات ەتۋدە. بۇل ماڭىزدى ماسەلەنى تولىق وندىرىستىك تسيكلدى قۇرۋ جانە ەلىمىزدىڭ ىشكى نارىعىن ساپالى قاعاز ونىمدەرىمەن قامتۋ جونىندەگى كەشەندى ءىس-قيمىل ارقىلى شەشۋ قاراستىرىلعان.

"اقتوبە يندۋستريالىق ايماعىنىڭ" الەۋەتى وسىلايشا جىل سايىن ارتىپ كەلەدى.

 

اقتوبە

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:42

ۇقساس جاڭالىقتار