الەم جۇرتشىلىعىن اۋرە-سارساڭعا سالعان پاندەميانىڭ زاردابى ءبىزدىڭ ەلگە دە اۋىرتپالىعىن الىپ كەلدى. سوعان قاراماستان حالقىمىز پسيحولوگيالىق يممۋنيتەتتى باسەڭدەتپەي, تىعىرىقتان شىعۋدىڭ جولىن ىزدەۋدە. وسى ورايدا الماتىلىق ستۋدەنتتەر اليانسى "جاقىنىڭا جاناشىر بول", "دارىگەرلەرگە مىڭ العىس", "ماسكا تاق", "اراقاشىقتىقتى ساقتا" دەگەن سوزدەر جازىلعان بىرنەشە فۋتبولكانى نارىققا شىعاردى. اتالعان كيىم ءتۇرىن شىعارۋعا جەرگىلىكتى جاس كاسىپكەرلەر دەمەۋشى بولىپ, قولداۋ كورسەتىپ كەلەدى.
الماتى ستۋدەنتتەر اليانسىنىڭ توراعاسى جاسۇلان قۋاندىقتىڭ ايتۋىنشا, فۋتبولكالارداعى جازۋ جاستاردىڭ توتەنشە جاعدايعا بەيجاي قاراماۋىنا ۇندەيدى.
– پاندەميامەن بۇكىل دۇنيە ءجۇزى كۇرەسىپ كەلە جاتىر. بۇدان قازاقستان جاستارى دا تىس قالماي, الماتى ستۋدەنتتەر اليانسىنىڭ اتىنان كوروناۆيرۋستىق ينفەكتسيادان ساقتانۋعا ۇندەيتىن جازۋلارى بار فۋتبولكالار شىعاردىق. وسىلايشا جاستاردى ىندەتپەن كۇرەسۋگە, ەلدەگى كەزەكتى جاعدايعا سالعىرت قاراماي, بەتپەردە تاعىپ, ساقتىق شارالارىن ساقتاپ جۇرۋگە شاقىرامىز. ءوزىمىز بەن جاقىندارىمىز ءۇشىن ساق جۇرەيىك! – دەيدى جاسۇلان قۋاندىق.
ۇيىم باسشىسىنىڭ ايتۋىنشا, كوروناۆيرۋس ىندەتىمەن كۇرەسۋدە بۇكىل دۇنيە ءجۇزى ءارى-ءسارى كۇي كەشۋدە. قازىرگىدەي سىن-ساعاتى تۋعان مەزەتتە ء"بىز بىرگەمىز!" ۇرانىن تۋ ەتكەن قازاقستاندىق جاستار دا تەڭىزگە تامعان تامشىداي بولسىن ءوز ۇلەستەرىن قوسىپ قالۋعا تىرىسىپ باعۋدا. الداعى ۋاقىتتا دا الماتى ستۋدەنتتەر اليانسى يگى ءىستىڭ ودان ءارى جالعاسىن تابارىنا سەنىمى مول!
