پىكىر • 23 شىلدە، 2020

پرەزيدەنتتىڭ پاراساتىنا سەنەمىز

110 رەت كورسەتىلدى

پاندەمياعا اينالعان ۆيرۋستىڭ ەمىن تابۋ قيىن، قازا كوپ! مۇنداي ەرەكشە زوبالاڭ كەزىندە كىمگە سەنەمىز؟! ارينە، قۇدايعا سەنەمىز. بىراق «اۋرۋدى جاراتقان – قۇداي، اۋىرتقان قۇداي ەمەس». دەمەك، ارقايسىمىز ءوز-وزىمىزگە سەنەمىز! «وزىڭە سەن! ءوزىڭدى الىپ شىعار، اقىلىڭ مەن ەڭبەگىڭ ەكى جاقتاپ». ۇرەيىڭدى جەڭە ءبىلۋىڭ مەن ساقتانا ءبىلۋىڭ دە سول سەنىمنىڭ ىشىندە.

بەس كۇندىك عۇمىرىڭ – بازار مەن مازار اراسىنداعى جول. سول جول ءۇستى، اركىمگە تورقالى تويدا «قۋ باس دومالاتا» الماعانىن دا، توپىراقتى ولىمدە «وي، باۋىرىمداپ» قالماعانىن دا سۇيەككە تاڭبا ساناتار ۇلى سالتى بار، «ولىمنەن ۇيات كۇشتى» ۇستانىمىنا بەرىك، وجدانى بيىك حالقىمىزعا سەنەمىز! جەر-جەردە جوقتان بار جاساپ، اجال الدىنداعى ادامدارعا جاپپاي جانتالاسا تەگىن كومەك كورسەتىپ جاتقان قاراپايىم ۇلدارىمىز مەن قىز­دارىمىزدىڭ جاسامپازدىعى دا – قازاق ارلىلىعىنىڭ قۇدىرەتى! توبەسىنەن مىڭ ۇرعاندى ماڭدايىنان ءبىر سيپاعانى ءۇشىن دە كەشىرە سالاتىن اڭعال-اڭقىلداق قاسيەتىمىز دە بار عوي، سونىمەن قاتار «وتكەلدە ات اۋىستىرمايدى» قاعيداسىن ەسكەرە وتىرا، قامسىزدىققا سالىنعان قايران ۇكىمەتىمىز بەن وبلىستار اكىمدىكتەرىنە دە سەنگىمىز كەلەدى. ولاردىڭ دا الەۋمەتتىك سىن قىسپاعىندا پاندەمياعا قارسى كورسەتىپ جاتقان شاپشاڭ دا شالت قيمىل-ارەكەتتەرىن بايقاپ وتىرمىز. «يگىلىكتىڭ ەرتە-كەشى جوق». ۆيرۋسولوگياسى مەن ەپيدەميو­لوگياسى كەنجەلەپ قالعان ەلدە ارداقتى­لارىنان ايىرىلىپ جاتقانىنا قاراماس­تان، ولىمگە باس تىككەن، ول ءۇشىن ارنايى تولەنەر اقىلاردىڭ بەرىلمەي جاتقا­نىنا دا ءماۋ دەمەستەن، ماماندىعىن ادام­دىعى اسقاقتاتقان دارىگەرلەرىمىزدىڭ جانقيارلىق ەڭبەگىنە سەنەمىز! مىڭ دا ءبىر راحمەت ايتامىز! اسىرەسە، قاۋىپتىلىگى جاعىنان اتومدىق جارىلىستىڭ رادياتسيالى اۋماعىنان بىردە-ءبىر كەم ەمەس ەمحانالاردا، وتتاي جانعان مەديتسينالىق سكافاندرلار ىشىندە كۇندىز-ءتۇنى تۇنشىعا جۇرە، سالماعى باتپانداي وتتەگى باللوندارىن  جوعارى-تومەن تاسىپ، ەم جاساپ، بىلەكتالدى-بەلۇزدى ازاپتى باستارىنان ۇدايى وتكەرىپ جۇرسە دە، ەڭبەگىنىڭ ونشا ەلەنبەسىنە دە رەنىش بىلدىرمەي كەلە جاتقان اياۋلى مەيىربيكەلەر مەن سانيتارلارعا سەنەمىز. ولارعا دەگەن العىسىمىز شەكسىز.جانىن شۇبەرەككە تۇيە زىر جۇگىرىپ جۇرگەن اينالايىن ەرىكتىلەرگە سەنەمىز! ءبارىن ايت تا، ءبىرىن ايت، مەملەكەت باسشىسى رەتىندە تاعدىرى ەل پەشەنەسىنە جازىلعان; الاش الدىندا انت بەرىپ تە ۇلگەرمەي جاتىپ، ارىس قالاسىنداعى تەحنوگەندىك وراسان اپاتپەن، دۇنگەندىك-ۇيعىرلىق قىرسىق وقيعا­لارمەن، تۇركىستان وبلىسىنداعى سۋ اپاتى جانە ولارعا جالعاسا جەتكەن جوي­قىن ءتاجتاجال ىندەتىمەن دە بەتپە-بەت كەل­گەنىندەگى اسا زور جاۋاپكەرشىلىك تانىتا بىلمەگى، ءار قيىندىققا وراي مۇلتىكسىز شە­شىم شىعارماعى، ءفارابيدىڭ – 1150، التىن وردانىڭ – 750، ابايدىڭ 175 جىلدىق مەرەيتويلارىن ابىرويمەن وتكى­زۋدەگى الەمەت جۇمىستار بارىسىن مۇ­قيات قاداعالاماعى جانە ءبىر­ مە­زەتتە سىرتقى ساياساتتى دا كەمەل وي­لانىپ-تولعانباعى، از ۋاقىت ىشىندە سونىڭ ءبارىنىڭ تاۋداي سال­ماعى ءبىر ءوزىنىڭ قىل­شا موينىنا تۇسسە دە، ەش قاجىماعان پرەزي­دەنتىمىز قاسىم-جومارت توقاەۆتىڭ اقىل-پاراساتىنا سەنەمىز.

حالىق دەگەنىمىز تۇلا بويى تول­عان كوزدەن تۇراتىن ارگۋس سەكىلدى، ءبارىن كورىپ-ءبىلىپ وتىر. ەۋرازيالىق ەكو­نوميكالىق كەڭەستىڭ كەزەكتى وتىرىسىندا رەسەيدىڭ يمپەريالىق امبيتسياسىنا تويتارىس بەرىلدى، پاندەمياعا قارسى تو­تەنشە جاعداي رەجىمى جاريالاندى، اس­تاناداعى وتشاشۋ سەكىلدى قاتەلىكتەر ەس­كەرىلىپ، قارالى كۇن بەلگىلەندى، «سق-فارماتسيا» بىلىعى دەرەۋ اشكەرەلەندى، باسشىلارىنىڭ ۇستىنەن قىلمىستىق ءىس قوزعالدى، ىندەتتى جويۋعا بولىنگەن اسا كولەمدى قارجىنىڭ قايدا كەتكەنى شاپشاڭ تەكسەرىلۋدە، جانازالار ۇستىندە جاپپاي ساۋدا جۇرگىزگەن دارىحانالىق ارسىزدار جاۋاپقا تارتىلىپ، ءدارى-دارمەك جەتىسپەۋشىلىگى جويىلۋدا، تۇمشان (ماس­كا) شىعاراتىن جۇزدەگەن تسەح ىسكە قوسىلۋدا. ۇكىمەتكە دەگەن ەكىاپتالىق قاتاڭ تالاپقا وراي، ەلدىڭ تۇكپىر-تۇك­پىرىندە الەۋمەتتىك كومەك، ەكونوميكانى قۇلدىراتپاۋ امالدارى سىندى قايىرى مول قارقىندى ارەكەتتەر جاسالۋدا. ىندەتتىڭ بەتى قايتا باستادى. قاشىقتان ونلاين وقىتۋ جۇمىستارى بارىسىندا «تسيفرلى قازاقستان» جوباسىنىڭ جالعاندىعىنا قاراي، تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى ا.جۇماعاليەۆ قىزمەتىنەن الىندى، دەنساۋلىق ساقتاۋ مينيسترلىگىنە جاڭا باسشى كەلدى. ول وزگەرىستەر دە پرەزيدەنتىمىزدىڭ «مەملەكەتتىك باسقارۋ جۇيەسىن قايتا قۇرۋ» يدەياسىنىڭ باستاماسى رەتىندەگى العاشقى ناتيجەلەر دەپ بىلەمىز. ال جىلدار بويى قوردالانىپ قالعان ساياسي-الەۋمەتتىك، ەكونوميكالىق ماسەلەلەردىڭ پرەزيدەنت ۇيعارىمىمەن قۇرىلعان ۇلتتىق قوعامدىق كەڭەستە دۇركىن-دۇركىن تالقىعا ءتۇسۋى مەن تەلەارنالاردا قوعامدىق-ساياسي توك-شوۋلاردىڭ تىكەلەي ەفيردە ۇيىمداستىرىلا باستاۋى دا – قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىنا ورايعى اۋەلگى ادىلەتتى تىرلىكتەر. سو­نىڭ ءوزى ءسوز بوستاندىعى قاقىن اسىرا پاي­­دا­­لانۋدىڭ جابايى تريبۋناسىنا دا اينالعان الەۋمەتتىك جەلىلەردەگى داۋاسىز دەماگوگيانىڭ، توڭكەرىسكە ۇندەۋدىڭ، قوعام قايراتكەرلەرىن ءجونسىز عايباتتاۋ مەن جالعان اقپارات تاراتۋدىڭ، «5G قاتەرى» مەن «بيلل گەيتس ۆاكتسيناسى» سەكىلدى قاۋەسەتتەرمەن قوعامدا ۇرەي تۋ­عىزۋشى پسيحوديۆەرسيانىڭ، ت.س.س. كەساپاتتاردىڭ اپتىعىن دا باسارىنا داۋ جوق. ىندەتتىڭ بەتىن تۇبەگەيلى قايتارۋدا ء«بىز بىرگەمىز!» قورى مەن چەللەندجى دە ءوز سەپتىگىن تيگىزەر. بىراق بولاشاعىمىزدىڭ جارقىن بولماعىنىڭ كەپىلى رەتىندەگى حالىق بىرلىگىنىڭ نەگىزى – مەملەكەتتىك يدەولوگيا، ونىڭ نەگىزى – مەملەكەتتىك ءتىل. ءتىل بىرلىگى بولماي، ەل بىرلىگىنىڭ بولماسى – اكسيوما. پرەزيدەنتىمىزدىڭ «قازاق ءتىلى – ۇلتارالىق ءتىل بولارعا كەرەك!» دەگەن مالىمدەمەسى دە بولاشاقتا بولار ۇلكەن رۋحاني وزگەرىستەردىڭ انىق بەلگىسى.

 

تىنىشتىقبەك ابدىكاكىم ۇلى،

اقىن، مەملەكەتتىك سىيلىقتىڭ لاۋرەاتى

 

سوڭعى جاڭالىقتار

قوستانايعا العاشقى قار ءتۇستى

ايماقتار • بۇگىن، 10:02

سالىمشىلارعا 887 پاتەر

ايماقتار • بۇگىن، 09:10

قىسقا دايىندىق تولىق اياقتالدى

ايماقتار • بۇگىن، 07:46

قاجەتتى وتىننىڭ 70%-ى جەتكىزىلدى

ايماقتار • بۇگىن، 07:43

قارسىلاسى اۋىرىپ قالىپتى

سپورت • بۇگىن، 07:38

چەمپيوندار ليگاسى باستالدى

فۋتبول • بۇگىن، 07:36

فرانتسياعا جول ءتۇسىپ تۇر

وقيعا • بۇگىن، 07:33

بوتەنگە سالەم

رۋحانيات • بۇگىن، 07:19

قوس ىشەكتى قوڭىرىم

رۋحانيات • بۇگىن، 07:14

وڭتايلى ينتەگراتسيالانعان جۇيە

ەكونوميكا • بۇگىن، 07:13

نە وقىپ ءجۇرسىز؟

تانىم • بۇگىن، 07:00

ۇقساس جاڭالىقتار