بۇل – وتكەن تاريح.
ۇلت بولىپ ۇيىسىپ, پرەزيدەنت توقاەۆتىڭ قاسىنان تابىلۋدىڭ كەزى كەلگەنى ىشكى تۇيسىكپەن سەزىلىپ تۇر. قازىرگى جاعدايدى 1990 جىلدار, تاۋەلسىزدىكتىڭ العاشقى جىلدارىنداعى جاعدايمەن دە سالىستىرۋعا بولمايدى. ول جىلدارى تاۋەلسىز ەلمىز دەگەن قاسيەتتى ۇعىمنىڭ ءوزى مۇز جارعىش كەمەدەي قيىنشىلىقتاردى ەڭسەرىپ شىعۋعا سەپ بولعانى ۇمىتىلعان جوق. 1990 جىلدار مەن قازىرگى ۋاقىت اراسى جەر مەن كوكتەي. سوندىقتان 1990 جىلداردىڭ قيىندىعىن العا تارتىپ, حالىقتى سابىرعا شاقىرۋمەن ماسەلە بىتپەيدى. قازىر جاعداي ۋشىعىپ كەتتى. ەكونوميكامىزدىڭ كەمشىن تۇستارى ءار-ءار جەردەن ءبىلىنىپ قالىپ جاتىر. جۇرەكتىڭ سىزداۋىنا سەبەپ بولاتىن قۇبىلىستارمەن قوسا, قاۋىپتى دەرت كوپ زامانداستارىمىزدىڭ قاتارىن سيرەتىپ كەتتى. ىندەت ەلىمىزدەگى بايلار مەن كەدەيلەر اراسىنداعى تەڭسىزدىكتى, ادامداردىڭ تۇرمىسى اراسىنداعى الشاقتىقتى عانا ەمەس, ءبىزدىڭ مۇمكىندىگىمىزدى دە كورسەتىپ بەردى. تاۋەلسىزدىگىمىزدىڭ تاريحىن بولشەكتەپ قاراۋىمىزدىڭ ناتيجەسىندە ءبىز وسى كۇنگە جەتتىك. حالىق كوك ءبورى ءتارىزدى دەرتىنە داۋا ىزدەپ, سابىلىپ كەتتى. مەن مۇنى تۋرا ماعىناسىندا ايتىپ وتىرمىن. باسقاشا ايتقاندا, جاڭارۋعا ۇمتىلۋ, شەگىنەرگە جول قالماعانىن جانە ەندىگى جەردە كەمشىلىكتەردى جاسىرىپ قالۋدىڭ مۇمكىن ەمەستىگى بەلگىلى بولىپ قالدى.
پرەزيدەنت قاسىم-جومارت توقاەۆتىڭ «حالىقتى الاڭعا الىپ شىققان – كەدەيلىك» دەگەن ءبىر اۋىز ءسوزىن قازىرگى جاعدايعا بەرىلگەن باعا رەتىندە قابىلداۋ كەرەك. بۇل – بىلە بىلگەن ادامعا وتە اۋىر باعا. ال بۇل پىكىردىڭ پرەزيدەنت, كاسىبي ديپلومات توقاەۆ تاراپىنان ايتىلۋى باسقا جولدىڭ قالماعانىن, ەندىگى جەردە تەك شىندىق قانا العا جىلجۋعا مۇمكىندىك بەرەتىنىن بايقاتىپ تۇر.
مىنا ىندەت كوپ نارسەنىڭ بەتىن اشتى, كىم ەكەنىمىزدى, جاڭانىڭ جانتالاسا جۇمىس ىستەگەنمەن جاقسى ناتيجەلەرگە قول جەتكىزۋدىڭ قيىندىعىن كورسەتتى. حالىق اۋىزبىرشىلىگى مەن ءبىر-بىرىنە دەگەن مەيىرىمىن جوعالتىپ الماپتى. وعان تاۋبە دەيمىز.
ۇكىمەت قۇرامىنا تازا اۋا كەرەك. حح عاسىردىڭ ەمەس, ححI عاسىردىڭ داعدارىس مەنەدجەرلەرى كەرەك. وتكەن تاريح ءوز ميسسياسىن اتقاردى. پرەزيدەنتىمىز ماڭىنداعىلاردان ءوز بويىنداعى تازالىق پەن زيالىلىقتى, ساياسي مادەنيەتتىلىك پەن دەگدارلىقتى تالاپ ەتەتىنىن ەل كورىپ-ءبىلىپ وتىر. ءدال قازىر بيلىك باسىنا دىلىنە ادال ازاماتتاردىڭ كەلۋى – جاڭارۋدىڭ باسى.
جالپىۇلتتىق مۇددەنى ءبىلدىرۋ حالىقتىڭ ءوزىن-ءوزى تانىپ, باعالانۋ دارەجەسىن كوتەرۋ قابىلەتىمەن عانا ەمەس, سونى ويداعىداي جۇزەگە اسىرۋدىڭ جولىن تابۋ قابىلەتىمەن دە دارالانىپ تۇرۋعا ءتيىستى.
«ورتالىق ازياداعى كورشى مەملەكەتتەرمەن قارىم-قاتىناس ماسەلەسى دە «بولتىرىك ءبورى استىندانىڭ» كەبىن كيىپ قالماس ءۇشىن ۇنەمى نازار اۋدارىپ, ارعى جاق-بەرگى جاعىن باعدارلاپ وتىرۋعا ءتيىس باستى شارۋامىز بولىپ قالا بەرۋى كەرەك. تاعدىرىمىز, ارعى-بەرگى تاريحى ءبىر تۋىس مەملەكەتتەرمىز.
ورتالىق ازياداعى بەس مەملەكەت شىن ىنتىماقتى ورتاعا اينالعىسى كەلسە, باعىتتارىن ايقىنداپ بەلگىلەگەنى ءجون. وسى تاراپتاعى پرەزيدەنت ساياساتىنىڭ ۇستانىمى ەل ءۇشىن ماڭىزدى دەپ ەسەپتەيمىن.
مەملەكەتتىڭ ۇلتتىق مۇددەگە قاتىستى ساياساتىن حالىق ءبىلۋى ءتيىس.
ەل باسقارىپ وتىرعان ازاماتتارعا قولداۋ ءبىلدىرۋ حالىقارالىق تاجىريبەدە بار. ەل كوشىن باستاعان ەرلەرگە قاتىستى ءسوز باستاعاندا اسىرە- ماقتاۋلاردان اۋلاق بولساق ەكەن دەيمىن. ورىستاردا «جالعان ماقتاۋدان ءولى ءسوزدىڭ ءيىسى شىعادى» دەگەن ءسوز بار. ماقتان مەن جاعىمپازدىق ارقىلى مەملەكەت باسشىسىنىڭ ايبىنىن اسىرامىز دەگەن ۇعىم كەلمەسكە كەتتى.
قازىر قاسىم-جومارت كەمەل ۇلى توقاەۆ ءۇشىن حالىقتىڭ سەنىمىنەن ارتىق كۇش جوق بولار. حالىقتىڭ پرەزيدەنتىمىزدىڭ قاسىندا شىندىقتى سۇزگىدەن وتكىزىپ جەتكىزەتىن ساراي جىراۋلارى ەمەس, وي سالاتىن, شىندىقتىڭ بەتىنە تۋرا قارايتىن ازاماتتار جۇرسە ەكەن دەگەن تالابى زاڭدى.
ەل مەن ەل باسقارىپ وتىرعان تۇلعا اراسىنداعى بايلانىس, تابيعي ۇيلەسىمدىلىك العا جۇرۋىمىزگە جول اشىپ, ۇلت بولىپ ۇيىستىرادى. ەكى اراداعى بايلانىستىڭ ينديكاتورى – سەنىمنىڭ دەڭگەيىنە قاراپ ولشەنەدى.
قازىر قازاقتىڭ جەرىنىڭ بىرتۇتاستىعىنا كوزىنىڭ سۇعىن قاداپ وتىرعان سىرت كۇشتەر جەتەدى.
قازاقتى قازاق قانا تىعىرىقتان الىپ شىعادى.
تاۋەلسىزدىك ءۇشىن كۇرەس ەندى باستالدى. ەلدىڭ اماناتىن جاۋاپكەرشىلىگىنە العان ازاماتقا سەنىم بىلدىرەتىن كەز كەلدى. ەڭ باستىسى, ەل سەنىمىن سەزىنۋ پرەزيدەنت ءۇشىن دە ماڭىزدى فاكتور.
مۇرات اۋەزوۆ,
مەملەكەت جانە قوعام قايراتكەرى
