جوعارىداعى ينتەرنەت-گازەتتىڭ جازۋىنا قاراعاندا ماگەللان تۇقىمداس پينگۆين جىل سايىن بەس مىڭ شاقىرىم جولدى كوكتەي ءوتىپ, جان-جانۋاردىڭ تۇلەگى باستالاتىن كوكتەمنىڭ سوڭعى ايلارىندا پاتاگونيالىق دوسى جۋانعا كەلەدى. وسىنشاما ۇزاق ءارى قاتەرلى جولدى باسىپ وتۋىنە وعان ەشقانداي كەدەرگى جوق. پاتاگونيالىق بولسا تەڭىزدەردى كەشىپ ءوتىپ كەلەتىن «دوسىن» جىل سايىن اسىعا كۇتەتىن كورىنەدى.
بۇل ەكەۋىنىڭ بۇلايشا ساعىنسا قاۋىشۋىنا سەبەپ بولعان وقيعا: 2011 جىلى پاتاگونيالىق ازامات ريو-دە-جانەيرو قالاسىنا جاقىن جەردەگى جاعالاۋدا كۇنگە قىزدىرىنىپ جاتىپ, مۇنايدىڭ قالدىق مايىنا ءتۇسىپ ءولىمشى كۇيگە جەتكەن پينگۆيننىڭ جاس تولىنە تاپ بولادى. ونى مايدان تازالاپ, تاماقتاندىرىپ كۇتىپ باعادى. قىسقاسى, ولىمنەن اراشالاپ قالادى.
كۇزگە سالىم كۇيلەنگەن پينگۆين ءوز ۇيىرىمەن بىرگە الىس ساپارعا اتتانىپ كەتەدى دە, كەلەسى كوكتەمدە قۇتقارۋشىسى جۋان پەرەيرا دە سوۋزانى قايتا ىزدەپ كەلەدى. اتالعان وقيعاعا ءمان بەرىپ زەرتتەگەن جەرگىلىكتى بيولوگ پاۋلو كراجەۆكيدىڭ ايتۋىنشا, الىستان ات ارىلتىپ كەلىپ قۇتقارۋشىسىن كورگەن پينگۆين يت سياقتى قىسقا قۇيرىعىن شوشاڭداتىپ, قۋانعاننان شىڭعىرا قۇرقىلتايلاپ قۇشاق جايا ۇمتىلادى ەكەن.
ءبىر قىزىعى, بۇل پينگۆين قۇتقارۋشىسىنان باسقا جان بالاسىنا جولامايدى. ال جۋان بولسا, ونى تاماقتاندىرادى, جۋىندىرىپ كۇتىپ باعادى. تۇلەپ بولعان سوڭ ۇيىرىمەن بىرگە وتتى جەرگە ايالداپ, پەرۋ جاعالاۋىن جاناي ءوتىپ, فولكلەند جانە حۋان-فەرناندەس ارالدارى ماڭىندا قىستى وتكىزەدى دە, تۇلەر تۇستا سالىپ ۇرىپ قۇتقارۋشىسىنا كەلەدى. قازىر 9-10 جاس شاماسىنداعى بۇل ماگەللان پينگۆينى ءارى كەتسە 25 جىل جاسايدى دەيدى بيولوگتار.
