مىسالى, ونەركاسىپ سالاسىندا 103,5%, قۇرىلىستا – 131,8%, ينۆەستيتسيا تارتۋدا – 108,3%, باسپانا بەرۋدە – 111,8%, اۋىل شارۋاشىلىعىندا 103,3% ءوسىم بايقالعان.
بىلتىرعىمەن سالىستىرعاندا جەرگىلىكتى بيۋدجەتتىڭ ءتۇسىمى 29,2%-عا ارتقان. بۇل جوسپارداعىدان 11,6%-عا ارتىق.
ءوندىرىس سالاسىندا يندەكس ءوسىمىنىڭ ناقتى كولەمى وڭدەۋ سەكتورىنىڭ ءوسۋى ەسەبىنەن قامتاماسىز ەتىلدى. بۇل جەردەگى كورسەتكىش – 106,4%. ال تاۋ-كەن ءوندىرىسى سەكتورىندا ول 105,7%-دى قۇرادى.
بۇگىندە «ارسەلورميتتال تەمىرتاۋ» جانە «قازاقمىس» كورپوراتسياسى» الپاۋىت كاسىپورىنداردىڭ تۇراقتى جۇمىس ىستەپ تۇرعانىن ايتقان ءجون. الەمدىك نارىقتا مىس پەن بولات باعاسىنىڭ وسكەنى بايقالادى.
وبلىس بويىنشا ونەركاسىپ ءونىمىنىڭ كولەمى التى اي ىشىندە 1,360 ترلن تەڭگەنى قۇرادى. بۇل قارقىننىڭ جىلدىڭ سوڭىنا دەيىن ساقتالاتىنىنا وبلىس باسشىلىعى سەنىمدى.
ينۆەستيتسيا سالاسىنا كەلسەك, بيىلعى جارتى جىلدىڭ قورىتىندىسى بويىنشا وبلىسقا 300 ملرد تەڭگەدەن استام كاپيتال كەلگەن. بۇل الدىنداعىدان 8,3%-عا ارتىق جانە مۇنىڭ 85%-ى – جەكە ينۆەستيتسيا.
بۇدان بولەك, شەتەل ينۆەستورلارى بەلسەندى تۇردە اتسالىسقان 44 جاڭا ينۆەستيتسيالىق جوبا ىسكە اسىرىلىپ جاتىر. مۇنداعى سوما 2 ترلن تەڭگەنى قۇراپ, 13 مىڭ جاڭا جۇمىس ورنىن اشۋدى كوزدەيدى.
جىلدىڭ سوڭىنا دەيىن 231 ملرد تەڭگەنى قۇراپ, 3,5 مىڭ جوعارى وندىرىستىك تۇراقتى جۇمىس ورنىن اشاتىن 14 جاڭا جوبا ىسكە قوسىلادى. قازىردىڭ وزىندە ونىڭ بەسەۋى جۇمىس ىستەي باستادى.
ساران قالاسىنداعى بۇرىنعى رەزينو-تەحنيكالىق ونىمدەرى (رتي) زاۋىتىنىڭ بازاسىندا قىتايلىق الەمدىك كوشباسى «Yutong» كومپانياسىنىڭ قاتىسۋىمەن اۆتوبۋستار مەن ارنايى تەحنيكالار شىعارۋ جوباسى ىسكە اسىرىلا باستادى. ءساتىن سالسا, جىلدىڭ سوڭىنا قاراي العاشقى اۆتوبۋس كونۆەيەردەن شىعۋى ءتيىس.
سونىمەن قاتار وسى زاۋىتتىڭ بازاسىندا بيىل جىلىنا 3,5 ملن دانا اۆتوموبيل شينالارىن شىعاراتىن جوبا دا قولعا الىنباق. بۇل جوبالاردى جۇزەگە اسىرۋ وبلىس ەكونوميكاسىن ارتاراپتاندىرۋعا وڭ اسەرىن تيگىزەدى جانە ماشينا جاساۋ ۇلەسىن ەكى ەسەگە ارتتىرادى.
شاعىن جانە ورتا بيزنەس تۋرالى ايتار بولساق, بيىلعى جىلدىڭ باسىنان بەرى جۇمىس ىستەپ تۇرعان كاسىپكەرلىك سۋبەكتىلەرىنىڭ سانى 0,5%-عا ءوسىپ, 88400 بىرلىكتى قۇرادى. بۇل سالادا بۇگىندە وبلىستىڭ ەكونوميكالىق تۇرعىدا بەلسەندى تۇرعىندارىنىڭ 35%-ى قامتىلعان. ولار بويىنشا ينۆەستيتسيا تارتۋدىڭ ءوسىمى 20%-دى قۇرادى.
داعدارىسقا قارسى شارالار ارقىلى وبلىستىڭ 30 مىڭنان استام كاسىپكەرى سالىق, بانك الدىنداعى كرەديت جانە جالعا الۋ اقىسى بويىنشا كەيىن تولەۋ جەڭىلدىكتەرىنە يە بولدى.
وبلىستا قۇرىلىس سالاسىندا بيىلعى جارتىجىلدىقتىڭ قورىتىندىسى بويىنشا جۇمىس 131,8%-دى قۇرادى. ونىڭ ىشىندە تۇرعىن ءۇيدى پايدالانۋعا بەرۋ قارقىنى 11,8%-عا ارتتى. بيىل بىلتىرعىعا قاراعاندا تۇرعىن ءۇيدى پايدالانۋعا بەرۋ ءىسىن 42,5%-عا ارتتىرۋ مىندەتى العا قويىلعان.
وڭىردە ساپالى اۋىز سۋمەن قامتاماسىز ەتۋ بويىنشا اۋقىمدى جۇمىس جۇرگىزىلۋدە. بۇل باعىتتا تۇرعىنداردى ورتالىقتاندىرىلعان اۋىز سۋمەن جانە ارنايى تارتىلعان سۋ قۇبىرىمەن قامتاماسىز ەتۋدىڭ 95 جوباسىن ىسكە اسىرۋ قولعا الىنعان. مۇنىڭ ءوزى بيىل قالالىق تۇرعىنداردىڭ 98%-ىن جانە اۋىلدىقتاردىڭ 87%-ىن ورتالىقتاندىرىلعان اۋىز سۋمەن قامتاماسىز ەتۋگە مۇمكىندىك بەرەدى. ال 2021 جىلى قىزمەتتىڭ مۇنداي تۇرىمەن قالالىقتاردى جانە 2023 جىلعا قاراي اۋىلدىق جەرلەردىڭ تۇرعىندارىن 100%-عا قامتاماسىز ەتۋ جوسپاردا بار.
وبلىس ەكونوميكاسى ءۇشىن اۆتوموبيل جولدارىنىڭ ماڭىزى زور. بيىل «قاراعاندى-بالقاش» جانە «بالقاش-بۋرىلبايتال» جول ۋچاسكەلەرى پايدالانۋعا بەرىلەدى. مۇنىڭ الدىندا, ياعني وسى جىلدىڭ 6 شىلدەسىندە قاراعاندىنى اينالىپ وتەتىن «سولتۇستىك جانە شىعىس اينالما جولى» اشىلدى. بۇل جوبالاردى يندۋستريا جانە ينفراقۇرىلىمدىق دامۋ مينيسترلىگى ىسكە اسىرىپ جاتىر.
جول ءوڭىردىڭ دامۋىنا ستراتەگيالىق تۇرعىدا يگى ىقپالىن تيگىزەتىن بولادى. ىرگەلەس سالالاردى ەسەپكە العاندا, بۇل جۇرگىزىلىپ جاتقان جۇمىستار 20 مىڭنان استام جۇمىس ورنىن اشۋعا مۇمكىندىك بەردى.
اۋىل شارۋاشىلىعى سالاسى دا ۇياتقا قالدىرماي تۇر. اۋىلشارۋاشىلىق ونىمدەرىنىڭ ناقتى كولەم يندەكسى مال شارۋاشىلىعى ونىمدەرىن ءوندىرۋ ءوسىمىنىڭ ارقاسىندا 103,3%-دى قۇرادى.
العاشقى جارتىجىلدىقتا ازىق-ت ۇلىك تاۋارلارىنا ارنالعان تۇتىنۋ باعاسىنىڭ يندەكسى 103,9%-دى قۇرادى. ونىڭ ىشىندە الەۋمەتتىك ماڭىزى بار ازىق-ت ۇلىك تاۋارلارىنا ارنالعان باعا يندەكسى 104,5% بولدى. بۇل رەسپۋبليكا بويىنشا ورتاشا ماننەن تومەن.
ەندى, توتەنشە جاعداي كەزىندە تابىسىنان ايىرىلعان كاسىپكەرلەر مەن تۇرعىندارعا الەۋمەتتىك تولەم تولەۋ بويىنشا مىنانى اتاپ وتۋگە بولادى. وبلىستا 272 مىڭ ادام 42 500 تەڭگە مولشەرىندە تولەم الدى. بۇل ەكونوميكالىق بەلسەندى تۇرعىنداردىڭ 40%-ىن قۇرايدى. كوممۋنالدىق قىزمەتتىڭ 15 مىڭ تەڭگەلىك وتەماقىسىن وبلىستىڭ 76 500 تۇرعىنى الدى. بۇل دەگەنىڭىز 2 ملرد تەڭگەدەن استام قارجى. سونداي-اق توتەنشە جاعداي كەزەڭىندە وبلىستىڭ 80 مىڭ تۇرعىنى ازىق-ت ۇلىك جانە تۇرمىستىق جيىنتىقتار تۇرىندەگى كومەكپەن قامتاماسىز ەتىلدى.
ەلباسىنىڭ باستاماسى بويىنشا «بىرگەمىز» قورى ارقىلى وبلىستىڭ 40 مىڭنان استام تۇرعىنى 2,2 ملرد تەڭگە مولشەرىندە كومەك الدى. سونىمەن قاتار اتاۋلى الەۋمەتتىك كومەك الاتىن ەڭبەككە جارامدى تۇرعىنداردىڭ 74%-ى جۇمىسقا تارتىلدى.
جالپى العاندا, ەڭبەك نارىعىنداعى ىقپال ەتۋ ءىس-شارالارىنىڭ ناتيجەسىندە جىل سوڭىنا دەيىن 43 مىڭنان استام ادام جۇمىسپەن قامتىلماق. سونىمەن بىرگە 30 مىڭنان استام جاڭا جۇمىس ورىندارى اشىلادى. مۇنىڭ ءوزى وبلىستا جۇمىسسىزدار سانىنىڭ وسپەۋىنە يگى اسەرىن تيگىزەرى ءسوزسىز.
قاراعاندى وبلىسى
