ەلوردا • 21 شىلدە، 2020

ەلوردا اۋەجايىندا 12 شاقىرىم اۋا ارناسى زالالسىزداندىرىلدى

13 رەت كورسەتىلدى

جولاۋشىلار مەن قىزمەتكەرلەردىڭ دەنساۋلىعىن قورعاۋ ماقساتىندا ەلوردا اۋەجايىنىڭ ت2 تەرمينالى عيماراتىندا (جەرگىلىكتى رەيستەرگە ارنالعان) 12 000 مەتر اۋا ارناسى تازارتىلىپ، زالالسىزداندىرىلدى. بۇل تۋرالى يدم ءباسپاسوز قىزمەتى حابارلايدى، دەپ جازادى Egemen.kz

ماۋسىم ايىنىڭ ورتاسىندا باستالعان تازارتۋ جانە زالالسىزداندىرۋ جۇمىستارىن تامىز ايىندا اياقتاۋ جوسپارلانىپ وتىر. بۇل پروتسەدۋرا جۇيەلى نەگىزدە 3 جىلدا 1 رەت جۇرگىزىلىپ تۇرادى. "نۇرسۇلتان نازارباەۆ حالىقارالىق اۋەجايى" اق باسقارما توراعاسى عابيت ءتاجىمۇراتوۆ اتاپ وتكەندەي، اۋەجاي اكىمشىلىگى اۋەايلاق اۋماعىندا جولاۋشىلار مەن قىزمەتكەرلەردىڭ قاۋىپسىزدىگىن قامتاماسىز ەتۋ بويىنشا كەشەندى جۇمىستار جۇرگىزىپ جاتىر.

اۋا باپتاۋ جانە اۋا جەلدەتۋ جۇيەلەرى زالالسىزداندىرىلىپ، جولاۋشىلار مەن قىزمەتكەرلەر تازا اۋامەن تىنىستايدى. استانانىڭ اۋە قاقپاسى ارقىلى 2020 جىلدىڭ ماۋسىم ايىنىڭ وزىندە 220 مىڭعا جۋىق جولاۋشى وتكەنىن ەسكەرسەك، مۇنداي جۇمىستاردىڭ ماڭىزى وتە زور.

اۋا باپتاۋ جانە جەلدەتۋ جۇيەلەرىن جوسپارلى تازالاۋ ناتيجەسىندە:

- جەلدەتۋ جابدىعىنىڭ جۇمىس قۋاتى 25-45%-عا ارتادى;

- قىزمەتكەرلەردىڭ اۋىرىپ قالۋ ىقتيمالدىعى 30%-عا تومەندەيدى (ددۇ دەرەكتەرى بويىنشا);

- ءورت جانە باسقا دا شۇعىل جاعدايلار تۋىنداۋ ىقتيمالدىعى ازايادى.

عيماراتتىڭ جەلدەتۋ جۇيەسىن تازالاۋ ءۇشىن سەرتيفيكاتتاۋدان وتكەن جانە بارلىق رۇقسات قۇجاتى بار جەرگىلىكتى كومپانيانىڭ ماماندارى تارتىلىپ، ارنايى جابدىقتار مەن ارنايى سۇيىقتىقتاردى پايدالانادى. بارلىق قولدانىلاتىن زاتتار ادام دەنساۋلىعىنا زيانسىز جانە ءيىسى جوق.

سوڭعى جاڭالىقتار

ۇقساس جاڭالىقتار