قوعام • 21 شىلدە، 2020

پاراوليمپيادالىق سپورتشى حالىقارالىق سىياقىعا ۇمىتكەر

21 رەت كورسەتىلدى

قازاقستاندىق پاراوليمپيادالىق سپورتشى ءاليا راەۆا ايتارلىقتاي جەتىستىكتەرگە قول جەتكىزگەنى جانە قوعامنىڭ دامۋىنا زور ۇلەس قوسقانى ءۇشىن گەرمان گماينەردىڭ حالىقارالىق سىياقىسىنا تاعايىندالىپ، سوڭعى داۋىس بەرۋ كەزەڭىنە ءوتتى، دەپ حابارلايدى Egemen.kz

جەڭىمپاز جيناعان داۋىس سانىنا بايلانىستى بەلگىلەنەدى. ءدال قازىر ءاليا ەكىنشى ورىندى يەلەنۋدە، ونىڭ جەڭىسكە جەتۋى ءۇشىن كەلەسى سىلتەمە ارقىلى ءالى دە داۋىس بەرۋگە بولادى: 

https://www.sos-childrensvillages.org/who-we-are/hermann-gmeiner-award/2020-hermann-gmeiner-award

ءاليا SOS الماتى بالالار قالاشىعىنىڭ تاربيەلەنۋشىسى. دۇنيەگە كەلگەن بويدا الياعا بالالارداعى تسەرەبرالدى سال دياگنوزى قويىلىپ، سونىڭ سالدارىنان بويجەتكەن شاعىندا بىرنەشە كۇردەلى وتا جاسالدى. دارىگەرلەر ءاليا جۇرە المايدى دەگەن شەشىم شىعاردى.

الايدا جاقىندارىنىڭ قولداۋىمەن، ءوزىنىڭ ەرىك كۇشىنىڭ، جىگەرىنىڭ ارقاسىندا ءاليا قورقىنىشتى اۋرۋدى جەڭىپ شىقتى. اياعىنا تۇرىپ، تولىققاندى ءبىلىم الىپ، ومىرلىك سەرىگىن كەزدەستىرىپ، وتباسىن قۇردى. سۇيىكتى جۇمىسىنا ادال، ماقساتتارىنا بەرىك جان. قازىرگى تاڭدا قوعامدىق قوردا قىزمەت اتقارىپ، قيىن جاعدايعا تاپ بولعان ادامدارعا ءوز-وزىنە دەگەن سەنىمىن قايتارۋعا كومەكتەسۋدە.

ءاليانىڭ ءومىر حيقاياسى سىياقى ۇيىمداستىرۋشىلارىڭىڭ كوڭىلىنەن شىعىپ، بۇكىل الەمنەن قاتىسقان 200 ۇمىتكەردىڭ اراسىنان ىرىكتەلىپ، فينالعا ءوتىپ، 8 فينالدىق قاتىسۋشىلار سانىنا ءىلىندى. داۋىس بەرۋ 23 شىلدەگە دەيىن جالعاسادى. ءاليا جەڭگەن جاعدايدا قازاقستان مەن تمد ەلدەرىنىڭ تاريحىنداعى اتالعان سىياقىنى ۇتىپ العان العاشقى ۇمىتكەر اتانادى.  

گەرمان گماينەردىڭ سىياقىسى – SOS بالالار قالاشىقتارىنىڭ بەلگىلى جەتىستىكتەرگە قول جەتكىزىپ، باسقالارعا (سپورت، شىعارماشىلىق، كاسىپتىك تاراپىنان) ۇلگى بولا الاتىن تاربيەلەنۋشىلەرىنە تاعايىندالادى. سىياقى ەكى جىلدا ءبىر رەت ەڭ كوپ داۋىس جيناعان ايەل جانە ەر ادامعا بەرىلەدى.

SOS بالالار اۋىلدارى – جەتىم جانە اتا-اناسىنىڭ قامقورلىعىنان ايىرىلعان بالالاردى ۇزاق مەرزىمدە وتباسى مودەلىندە تاربيە بەرۋمەن اينالىسادى. العاشقى SOS بالالار اۋىلى  1949 جىلى  يمست قالاسىندا (اۆستريادا) گەرمان گماينەر اۆستريالىق پەداگوگتىڭ باستاۋىمەن اشىلعان. بۇگىن SOS بالالار اۋىلدارى الەمنىڭ 136 ەلىندە مىڭداعان بالالارعا سۇيىسپەنشىلىك پەن قامقور ورتادا وسۋگە مۇمكىندىك بەرىپ كەلەدى. قازاقستاندا SOS بالالار اۋىلدارى 1994 جىلدان بەرى الماتى، نۇر-سۇلتان جانە تەمىرتاۋ قالالارىندا جۇمىس اتقارىپ جاتىر.

سوڭعى جاڭالىقتار

ۇقساس جاڭالىقتار