جاڭعىرتۋ جۇمىستارىن اتقارىپ جاتقان مەكەمە «قازقايتاجاڭارتۋ» رمك باسشىلارىنىڭ ايتۋىنا قاراعاندا, مۇنداعى نىساندار تانىمدىق جانە رۋحاني تۋريزم ءۇشىن وتە قولايلى. سول سەبەپتى, قورىق-مۋزەيدى جاڭعىرتۋدىڭ 2019-2021 جىلدارعا ارنالعان جوسپارى قولعا الىنىپ وتىر. سونىمەن قاتار جاڭعىرتۋ ىسىمەن بىرگە ارحەولوگيالىق قازبا جۇمىستارى دا جوسپارعا سايكەس جۇزەگە اسىرىلاتىن كورىنەدى.
قازىرگى تاڭدا كەشەندى عىلىمي, رەستاۆراتسيالىق جۇمىستار ناتيجەسىندە قوجا احمەت ياساۋي كەسەنەسىنىڭ قازاندىق, ۇلكەن اقساراي, قابىرحانا, قۇدىقحانا بولمەلەرىن اقتاۋ قىزمەتى قارقىندى جۇرگىزىلسە, كەسەنە كۇمبەزى, قازارما, رابيا سۇلتان بەگىم كەسەنەسى, شىعىس مونشاسى, جۇما مەشىتى, داربازا قاقپاسى, حان مەشىتى, جەتى اتا قاقپاسى, قىلۋەت جەر استى مەشىتتەرىندە رەستاۆراتسيالاۋ جۇمىستارى دا جالعاسىن تابۋدا.
الداعى ۋاقىتتا XI-XII عاسىر ۇلەسىندەگى 40 مەشىتتەن قازىرگى زامانعا جەتكەن جالعىز ورىن جۇما مەشىتى ميحرابىمەن بىرگە تولىعىمەن جاڭعىرتىلىپ جانە ونىڭ اعاش باستىرماسىن كەڭەيتۋ جۇمىستارى جوسپارلانعان. قازىرگى تاڭدا مەشىتتىڭ وڭتۇستىك-شىعىس قابىرعالارىنا دەمونتاج جۇمىستارى جۇرگىزىلۋدە.
سونىمەن قاتار XI-XII عاسىرعا ءتان قىلۋەت جەراستى مەشىتىن قايتا جاڭعىرتۋ بارىسىندا عيماراتتىڭ نەگىزگى سالماق تۇسەتىن قۇرىلىمدارى مەن جەراستى قۇرىلىسىنىڭ ىرگەسىن كەڭەيتۋ جۇمىستارى جاسالۋدا. XV عاسىردىڭ تاريحي جادىگەرى – ورتاعاسىرلىق شىعىس مونشاسى مەن كۇمبەزدىڭ جۇقا قاباتىن, ينتەرەرىن رەستاۆراتسيالاۋ, ەكىنشى ەسىكتى سالۋ جانە ىرگەلەس اۋماقتى اباتتاندىرۋ جوسپاردا بار ەكەن.
ال ساۋلەتتىك عيمارات قازارماعا 2000 جىلدان بەرى كۇردەلى جوندەۋ جۇمىستارى جۇرگىزىلمەگەن بولاتىن. قازىرگى تاڭدا ونىڭ شاتىرىن تولىعىمەن اۋىستىرۋ جۇمىستارى جۇزەگە استى.
