سول ناۋبەتتەر كەزىندە ەت جاقىندارىمىزدان ايىرىلدىق. تەك ەكىنشى دۇنيەجۇزىلىك سوعىستىڭ وزىندە قانشاما قازاق قىناداي قىرىلدى. بىراق ءبىزدىڭ حالىق قانداي اۋىر كەزەڭدەردە دە ادامگەرشىلىكتى ساقتاي بىلگەنىن ۇمىتپاۋىمىز كەرەك. ءوز باسىنا كۇن تۋعان كەزەڭدەردە دە باسقالارعا قول ۇشىن سوزۋدى ادامدىق پارىز دەپ ەسەپتەدى. قازاقتىڭ وزگە ۇلتتارعا پانا بولعانىن ايتپاي-اق, تەك «لەنينگرادتىق ورەنىم» دەيتىن جامبىل اتامىزدىڭ ايگىلى جىرىن ەسكە تۇسىرسەك تە جەتكىلىكتى. سول جىردىڭ مىڭداعان لەنينگرادتىققا كۇش بەرگەنى, جۇباتقانى, بەيبىت ومىرگە تالپىندىرعانى كۇنى كەشەگىدەي ەسىمىزدە.
وتانداستارىمدى, جالپى باۋىرلارىمدى وسى قاۋىپتى ءارى قاتەرلى ىندەت كەزىندە سابىر ساقتاۋعا شاقىرامىن. ەڭ الدىمەن جاسى ۇلكەن اتا-اجەلەرىڭدى, بالا-شاعالارىڭدى قورعاپ, ولاردىڭ ومىرىنە قاۋىپ توندىرمەڭدەر دەگىم كەلەدى. كارانتين تالاپتارىن ورىنداپ, تارتىپكە باعىنساق, شىدامدىلىق تانىتساق, ءبىز كۇتكەن جاقسى كۇندەر ەرتەرەك تۋاتىنى انىق. ءيا, ول ءبىزدىڭ سابىرىمىزعا, توزىمىمىزگە بايلانىستى بولىپ تۇر. باسقا تۇسكەن قيىندىقتى سابىرمەن عانا جەڭەمىز. بۇل جاعداي تەك ءبىزدىڭ ەمەس, دۇنيەجۇزى حالىقتارىنىڭ باسىنان ءوتىپ جاتىر. سول ءۇشىن ءبىرىنشى كەزەكتە ازاماتتىق قادىر-قاسيەتىمىزگە كولەڭكە تۇسپەسە ەكەن. وتانداستارىما دا وسىنى تىلەيمىن. ەت جاقىندارىمىزدى دا بارىنشا قورعايىق, ازاماتتىعىمىزدى دا جوعالتپايىق.
مۇنداي قيىن-قىستاۋ شاقتا مەملەكەتىمىزدىڭ باسشىسى قاسىم-جومارت توقاەۆتىڭ توڭىرەگىنە توپتاسىپ, تىعىرىقتان شىعۋ جولدارىن بىرلەسە ىزدەگەنىمىز ءجون دەپ بىلەمىن.
تورەگەلدى شارمانوۆ,
قازاق تاعامتانۋ اكادەمياسىنىڭ پرەزيدەنتى, اكادەميك, مەملەكەتتىك سىيلىقتىڭ لاۋرەاتى
