ايماقتار • 21 شىلدە، 2020

جومارت جاندار جاقسىلىعى

165 رەت كورسەتىلدى

اتىراۋدا جاقسىلىق جاساعىسى كەلەتىن جاناشىرلار كوپ. اراسىندا كاسىپكەرلەر دە، سپورتشىلار دا، ءتىپتى نوتاريۋس­تار دا بار. ولار اۋرۋحانالارعا ءدارى-دارمەك پەن وتتەگى كونتسەنتراتورىن سىيلاپ جاتىر.

ماسەلەن، جەرگىلىكتى كا­سىپ­كەر ماحمۋت مەرا­لي­ەۆ دەنساۋلىق ساقتاۋ مە­كە­مە­لە­رىنە ءدارى-دارمەك الىپ بەرۋ ءۇشىن قارجى جيناۋعا باستاما كوتەردى. سوعان بايلا­نىس­تى «اتامەكەن» ۇكپ اتى­راۋ وڭىرلىك فيليالى جانىنان كاسىپكەرلەر، وبلىستىق اكىم­دىك پەن دەنساۋلىق ساقتاۋ با­س­قارماسىنىڭ، قوعامدىق ۇيىم­­داردىڭ وكىلدەرىنەن جۇ­مىس­شى توبى قۇرىلدى. ال، وب­­لىستىق دەنساۋلىق ساقتاۋ باس­قارماسى قاجەتتى ءدارى-دار­­مەكتىڭ ءتىزىمىن ۇسىن­دى. جۇ­­مىسشى توبى جەتەك­شى­لە­رى­نىڭ ءبىرى – «يدەال ماركەت» جشس-ءنىڭ باس ديرەكتورى تالعات بەكەنوۆتىڭ ايتۋىنشا، ال­عاشقى ەكى كۇندە «سانا» قايىرىمدىلىق قورىنا 30 ملن تەڭگە جينالدى.

– قوردىڭ ەسەپشوتىنا تۇسكەن قارجىنىڭ ءبىر بو­لى­گى وبلىستىق اۋرۋحانا سۇ­­راتقان ەڭ قاجەتتى ءدارى-دار­­مەكتەر جيىنتىعىن ساتىپ الۋعا جۇمسالدى. ءبىز №2 وبلىستىق ينفەكتسيالىق اۋرۋ­­حانا جانىنداعى پروۆي­زور­­لىق ستاتسيونارعا 10 ءتۇر­لى مەديتسينالىق ءدارى-دار­مەكتىڭ 3245 داناسىن تاپ­سىر­دىق. ونىڭ ىشىندە دەكسامە­تا­زون، تسيانوكوبالامين، پيري­دوك­سين، تسەفترياكسون، ازيت­روميتسين، ينگاۆيرين جانە باسقا دا دارىلەر بار. بىراق بۇل دارىلەردى تابۋ وتە قيىن بولدى. كوتەرمە باعا­مەن جەتكىزەتىن كومپانيالار وتە باياۋ جا­ۋاپ بەرەدى. سوعان قاراماستان، وڭىردەگى وزگە دە ەمدەۋ ورىندارىنا قايتارىمسىز كومەك بەرۋدى كوزدەپ وتىرمىز، – دەيدى تالعات بەكەنوۆ.

ال نوتاريۋستار دا ارنايى قارجى جيناپ، دەمەۋ­شى­لىك كومەك كورسەتۋ ءۇشىن جۇ­دىرىقتاي جۇمىلدى. ولار وز­دەرى جيناعان قارجىعا «ارمەد 7F-5L» ماركالى وت­تەگى كونتسەنتراتورىن ساتىپ الىپ، جىلىوي اۋداندىق اۋرۋ­حاناسىنىڭ ۇجىمىنا تاپ­­سىردى.

– ەلىمىزدە وسىنداي جومارت جاندار ءالى دە بار. قيىن كەزدە قول ۇشىن سوزىپ، دەمەۋ­شىلىك بىلدىرگەن اتىراۋ وبلىستىق نوتارياتتىق پالا­تا­سىنىڭ ءتورايىمى گۇلنار ماساتوۆاعا، سونداي-اق بار­لىق جەكە نوتاريۋسقا العى­سىمىزدى بىلدىرەمىز. وتتەگى كونتسەنتراتورىنىڭ قاۋىپ­تى ىندەتكە شالدىققان ناۋ­قاس­تاردىڭ تەزىرەك ساۋىعىپ، وتباسىنا امان-ەسەن ورال­­ۋىنا سەپتىگى تيەدى، – دەيدى جىلىوي اۋداندىق ورتالىق اۋرۋحاناسىنىڭ ديرەكتورى نۇربەك ۇكىباەۆ.

مۇنداي جومارتتىقتى يسا­تاي اۋدانىنداعى «بارىس» با­لا­لار-جاسوسپىرىمدەردىڭ دە­نە­شىنىقتىرۋ كلۋبىنىڭ دي­رەكتورى اسحات جۇمابەكوۆ تە تانىتتى. ول ءوزى تۇراتىن اۋدانداعى اۋرۋحاناعا العاش­قى وتتەگى كونتسەنتراتورىن سىيعا تارتتى. ونى الما­تى­دان ءوز قارجىسىنا ارنايى الدىردى. باعاسى – 550 مىڭ تەڭگە.

– قازىرگىدەي قيىن كەزدە دارىگەرلەر ناۋقاستاردى ەم­دەۋ ءۇشىن كۇنى-ءتۇنى ەڭبەك ەتۋدە. مەنىڭ اتا-انام دا وسى سالادا ۇزاق جىل ەڭبەك ەتتى. سوندىقتان، دارىگەرلەردىڭ تىنىمسىز جۇمىسىنىڭ اۋىر­لىعىن جاقسى بىلەمىن. الاي­دا، دارىگەرلەرگە دە كەيدە مۇم­­كىندىگى بار ازاماتتاردىڭ قول­داۋى قاجەت-اق، – دەيدى اسحات جۇمابەك.

يساتاي اۋداندىق اۋرۋحا­نا­سىنىڭ دارىگەرى سەرجان ساندىباەۆتىڭ ايتۋىنشا، وتتەگى كونتسەنتراتورى – ەمدەۋ ورنىنان جەتكىزىلگەن العاش­قى قۇرىلعى. ۇزدىكسىز وتتەگى ءبولىپ تۇراتىندىقتان، وعان اۋا تولتىرۋدىڭ قاجەتى جوق. وسى كەزگە دەيىن اۋرۋحانادا مۇنداي قۇرىلعى بول­ماعاندىقتان، ناۋقاستار ارنايى وتتەگى باللوندارى ار­قىلى تىنىس الىپتى. ال مۇنداي باللونداردى ساناۋ­لى ساعاتتان سوڭ اۋىس­تى­رىپ تۇرۋ كەرەك. وتتەگى كونتسەن­تراتورىنىڭ جوقتىعى دارىگەر­لەردىڭ جانىنا باتاتىنى داۋسىز ەدى.

وڭىردەگى اۋرۋحانالارعا كومەك كورسەتۋدەن مۇناي-گاز ونەركاسىبىندەگى وتاندىق كومپانيا – «ەمبىمۇنايگاز» اق دا تارتىنعان جوق. كاسىپورىننىڭ قوعاممەن باي­­لانىس قىزمەتىنىڭ اقپا­را­تىنا سۇيەنسەك، وبلىستىق اۋرۋحاناعا وكپەنى جاساندى جەلدەتۋگە ارنالعان وت­تە­گى كونتسەنتراتورلارىن الۋعا، وپەراتسيالىق بلوكتار­دى، رەانيماتسيالاردى، ديا­ليز ورتالىقتارى مەن پرو­ۆي­زورلىق بولىمشەلەردى مەدي­تسي­نالىق گازبەن قامتا­ماسىز ەتۋ جۇيەسىن جۇرگى­زۋ جانە مە­دي­تسينالىق جاب­دىق­تار­دى ساتىپ الۋ ءۇشىن 146 ملن تەڭگە كولەمىندە دەمەۋشىلىك كومەك كورسەتىلىپتى. سونداي-اق، جىلىوي اۋداندىق اۋرۋحاناسىنا 35 ملن تەڭگە اۋدارىلعان. ال ءوڭىر تۇر­عىن­دا­رىنا كورسەتىلگەن كومەكتىڭ جالپى سوماسى 300 ملن-عا جۋىق تەڭگەنى قۇراعان.

– بۇعان دەيىن «ەم­بى­مۇ­ناي­گاز» اق اتىراۋ قالا­سىنىڭ بەرەكە ىقشام­اۋدا­نىنداعى كارانتيندىك ستا­تسيونارلاردى تۇرمىستىق تەحنيكامەن، گيگيەنالىق قاجەتتى زاتتارمەن قامتاماسىز ەتۋگە 100 ملن تەڭگە بولگەن بو­لا­تىن. ماحامبەت اۋدانىن­دا قايتادان اشىلعان پرو­ۆي­زورلىق ورتالىققا اۆتوبۋس بەرىلدى. ال وبلىستىق اۋرۋحاناعا 40 وتتەگى باللونى تاپسىرىلدى، – دەپ حابارلادى كومپانيانىڭ قوعاممەن بايلانىس قىزمەتى.

 

اتىراۋ وبلىسى

 

سوڭعى جاڭالىقتار

دوللار ارزاندادى

ەكونوميكا • بۇگىن، 16:52

قوسشىدا جاڭا مەكتەپ اشىلادى

ءبىلىم • بۇگىن، 16:25

ۇقساس جاڭالىقتار