جالپى, كارانتين تالاپتارىن بۇزۋ جاعدايى تاراز قالاسىندا ءجيى كەزدەسۋدە. ماسەلەن, جۋىردا عانا كونە شاھارداعى قوناقۇيلەردىڭ بىرىندە كارانتين تالاپتارىنىڭ بۇزىلۋى انىقتالعان. بۇل جەردە ءبىر توپ ادام سپيرتتىك ىشىمدىك ءىشىپ, باسسەينگە ءتۇسىپ دەمالعان.
وسىنداي جاعداي وبلىس ورتالىعىنداعى مەيرامحانالاردىڭ بىرىندە دە ورىن العان. الايدا, اتالعان مەكەمە باسشىلىعى ءموبيلدى توپتى كورە سالا, 40-قا جۋىق كەلۋشىنى ءۇش VIP-بولمەگە جاسىرۋعا تىرىسقان. ءسويتىپ, كەرىسىنشە ولاردىڭ اۋرۋ جۇقتىرۋ قاۋپىن جوعارىلاتقان. جامبىل وبلىسى اكىمدىگىنىڭ مالىمەتىنشە, تەكسەرۋشىلەر ەسىكتەردى اشۋ ءۇشىن قۇتقارۋشىلاردىڭ كومەگىنە جۇگىنگەن.
وسىنداي زاڭبۇزۋشىلىقتار تاراز قالاسىنداعى باسقا ويىن-ساۋىق ورىندارىندا دا كەزدەسكەن. رەيد ناتيجەسىندە ءبىر تۇندە شامامەن 2 ميلليون تەڭگە ايىپپۇل سالىنىپ, حاتتامالار تولتىرىلعان. سونداي-اق, ءموبيلدى توپتار كارانتين كەزىندە قوعامدىق تاماقتانۋ نىساندارىنىڭ سانيتارلىق-ەپيدەميولوگيالىق تالاپتارى مەن جۇمىس جاعدايلارىن بەلسەندى تۇردە تۇسىندىرۋدە. دەگەنمەن, جامبىل وبلىسىنىڭ باس مەملەكەتتىك سانيتارلىق دارىگەرى عازيز نادۋەۆ ازاماتتار بۇل رەيدتەردىڭ نەگىزگى ماقساتى ايىپپۇل سالۋ ەمەس ەكەنىن ءتۇسىنۋى كەرەكتىگىن ايتادى.
"قازىرگى ەپيدەميولوگيالىق جاعداي حالىقتىڭ كارانتين شارالارىن بارىنشا ۇستانۋعا مىندەتتى ەكەندىگىن كورسەتۋدە. كۇن سايىن كوپتەگەن ادامدار كوروناۆيرۋستىڭ قۇربانىنا اينالۋدا. ولاردىڭ ىشىندە ءوزىمىزدىڭ تۋىستارىمىز, دوستارىمىز بەن تانىستارىمىز دا بولۋى مۇمكىن. ءار ادام ءوز ارەكەتى ءۇشىن جاۋاپ بەرۋى كەرەك. ءوزىمىزدى ساقتاپ, اينالامىزعا قاۋىپ توندىرمەۋىمىز كەرەك. ءبىز ولار ءۇشىن جاۋاپكەرشىلىك سەزىنۋىمىز ءتيىس", - دەيدى ول.
جامبىل وبلىسى
