بۇگىنگى تاڭدا "استانا ورمانى" جشس 120-دان استام ادامدى جۇمىسپەن قامتىپ وتىر.
"استانا ورمانى" جشس-دە جاستار قالا ماڭىنداعى جاسىل بەلدەۋدە (ونىڭ 11 502,2 گەكتارىنا ەكپە اعاشتار وتىرعىزىلعان) جانە قالا اۋماعىندا ەڭبەك ەتۋدە. ولار 275 350 دانا تال مەن كوشەتتەردى – سۇيەلدى قايىڭ, ۇساق جاپىراقتى شەگىرشىن, قاراعاي, كودە, بوز جيدە, تەرەك اعاشتارى مەن كوشەتتەردى قوپسىتۋ جانە سۋارۋمەن اينالىسادى.
بۇل اعاشتارعا كۇتىم جاساۋ ارقىلى جاستار تابيعات پەن قالا كەلبەتى ۇندەستىك تاپقان بىرەگەي ەكوجۇيەنىڭ قالىپتاسۋىنا ءوز ۇلەستەرىن قوسىپ كەلەدى. "استانا ورمانى" جشس مەكەمەسىندە جاستار 90 مىڭ تەنگە جالاقىعا قوسا "جاسىل ەل" جوباسىنان ارنايى بولىنگەن 35 394 تەنگە سىياقىعا يە بولىپ, ءوز ەڭبەكتەرىن جالعاستىرۋدا", دەدى قالالىق جاستار ساياساتى ماسەلەلەرى باسقارماسىنىڭ باسشىسى داۋلەت كارىبەك.
قازىرگى ۋاقىتتا "جاسىل ەل" جوباسى اياسىندا جاستار ءۇش ساناتتا جۇمىس جاساۋدا. اتاپ ايتقاندا, 14 پەن 17 جاس ارالىعىنداعى كوپ بالالى جانە از قامتىلعان وتباسىلاردىڭ جاستارى, 17-22 جاس ارالىعىنداعى ستۋدەنتتەر جانە ودان ۇلكەن توپ, ياعني 18 بەن 29 جاس ارالىعىنداعى جۇمىسسىزدار. جالپى, جارتى جىلدىڭ قورىتىندىسى بويىنشا "جاسىل ەل" جوباسى اياسىندا 1087 جاس جۇمىسقا ورنالاستىرىلدى.
