ەڭبەكتىڭ ەلەنگەنى ەرەكشە سەرپىن بەرەدى

مەديتسينا • 17 شىلدە، 2020

ەڭبەكتىڭ ەلەنگەنى ەرەكشە سەرپىن بەرەدى

23 رەت كورسەتىلدى

الەمدى جايلاعان كوروناۆيرۋس ىندەتى ىرگەمىزگە تايانعاندا ەل ساۋلىعى ءۇشىن كۇرەستىڭ الدىڭعى لەگىنەن اق حالاتتى ابزال جاندار كورىندى. بۇل جولعى دەرتتىڭ دەرەگى دارىگەرگە دە بەلگىسىز ەدى، سوندا دا انتىنا ادال ماماندىق يەلەرى قاۋىپ تىرناعىنا ىلىنگەن ءار ادام ءۇشىن ايانباي ارپالىستى.

مۇرات جەتپىسباەۆ

قىزىلوردا وبلىسى بويىنشا كوروناۆيرۋس پاندەمياسىنا قارسى كۇرەسكە مەديتسينا سالاسىنىڭ 3396 مامانى جۇمىلدىرىلىپتى. ولاردىڭ 67،8 پايىزى دارىگەرلەر مەن ورتا بۋىن مەديتسينا قىزمەتكەرلەرى. مەملەكەت باسشىسىنىڭ دارىگەرلەر ەڭبەگىن لايىقتى باعالاۋ تۋرالى باستاماسىنان كەيىن وبلىستا الدىڭعى شەپتە ناۋقاستارعا مەديتسينالىق قىزمەت كورسەتكەن 15 مامان مەملەكەتتىك ناگرادالارعا يە بولدى. ودان بولەك، مەديتسينا قىزمەتكەرلەرىنىڭ كاسىبي مەرەكەسىنە وراي 55 مەديتسينا قىزمەتكەرى دەنساۋلىق ساقتاۋ مينيسترلىگى تاراپىنان ماراپاتتالدى.

ءدال قازىرگى كەزەڭدە ولاردىڭ ەڭبەگىن باعالاۋ، كۇنى-ءتۇنى قاۋىپتىڭ وتىندە جۇرگەن ماماندىق يەلەرىنە كورسەتىلەر قۇرمەت ەرەكشە بولۋى ءتيىس. ساۋلىعى سىر بەرگەن ادامنىڭ الدىمەن دارىگەرگە جۇگىنەتىنى انىق. ال ءوز باسىن قاتەرگە تىگىپ، ناۋقاستاردى اۋرۋدان اراشالاپ الماققا اسىققان اق حالات يەسىنىڭ جايىن ويلادىق پا؟..

وكىنىشكە قاراي، ايماق مەديتسيناسى وسى دەرتتىڭ بەتىن قايتارماققا جانتالاسىپ جۇرگەن بەس بىردەي مامانىنان ايىرىلدى. جۋىردا وبلىس اكىمى گۇلشارا ابدىقالىقوۆا سىندارلى ساتتە انتىنان اينىماي، دەمى ۇزىلگەنشە ەل ساۋلىعىن ساقتاۋعا قىزمەت ەتكەن وسى جاندار الۋعا ءتيىستى مەملەكەتتىك ناگرادالاردى ولاردىڭ جاقىندارىنا تابىس ەتتى.

وبلىس ورتالىعىنداعى جۇقپالى اۋرۋلار اۋرۋحاناسى – ىندەتكە شالدىققان العاشقى ناۋقاستى قابىلداعان ەمدەۋ مەكەمەسى. ارينە، باستاپقىدا بۇرىن-سوڭدى كەزدەسپەگەن كەسەلدىڭ اتىنان-اق ادام ۇركەتىن ەدى. بىراق ماماندار العاشقى ساتتەن-اق جاعدايدى تەز باعامداپ، توسەك تارتقان جانعا جاردەمگە اسىقتى.

– العاشقىدا ۇستىمىزگە ساقتىق ءۇشىن كيگەن كيىمنىڭ دە سالماعى اجەپتاۋىر سەزىلەتىن ەدى. بىراق كومەك كۇتىپ جاتقان ناۋقاستى كورگەندە ءبارىن ۇمىتتىق. ۇيگە قايتپاي جۇمىس ىستەگەن ارىپتەستەرىمە ءتانتىمىن. ولاردىڭ بارلىعى قانداي دا قۇرمەتكە لايىق جاندار، – دەيدى وبلىستىق جۇقپالى اۋرۋلار اۋرۋحاناسىنىڭ مەدبيكەسى، جۋىردا عانا «قۇرمەت» وردەنىمەن ماراپاتتالعان رايحان نۇرىمبەتوۆا.

رايحان قاسىمقىزىنىڭ وسى ەمدەۋ مەكەمەسىندە جۇمىس ىستەگەنىنە بيىل تۋرا 40 جىل تولىپتى. قىزىلوردا قالاسىنداعى مەديتسينالىق ۋچيليششەنى بىتىرگەن جىلى العاش تابالدىرىعىن اتتاعان وسى اۋرۋحانانىڭ ءار كەزەڭى كوز الدىندا. بىراق بيىلعىداي قاربالاس كوبەيگەن ءساتى ەسىندە جوق.

العاشقى ساتتەن-اق جەرگىلىكتى بيلىك جۇرتتى دەرتتەن ساقتاندىرۋمەن قاتار دارىگەرلەردىڭ قاۋىپسىزدىگىن دە قامتاماسىز ەتتى. جەرگىلىكتى كاسىپكەرلەر كوروناۆيرۋسپەن كۇرەسكە جۇمىلدىرىلعان ماماندار ءۇشىن قوناقۇيلەرىن بوساتىپ بەرىپ، ازاماتتىق جاسادى. دارىگەرلەر جۇمىستان كەيىن ۇيلەرىنە قايتپاي، بارلىق جاعدايى جاسالعان وسى جايلارعا تۇراقتادى. مەملەكەت جاساپ جاتقان قولداۋدان بولەك، ىسكەر ازاماتتار دارىگەرلەر ءۇشىن قارجىلاي دەمەۋ دە ۇيىمداستىرىپ جاتىر.

– بۇل ءبىزدىڭ قوعامنىڭ قيىندىققا قارسى بىرىگە الاتىندىعىن كورسەتتى. اۋرۋحانادا جاتقاندارعا كومەك كورسەتۋدەن ەرىكتىلەر دە سىرت قالىپ جاتقان جوق. ءبارىنىڭ تىلەگى – ىندەتتى توقتاتىپ، توسەككە تاڭىلعان جاندارعا جاردەم بەرۋ. وسىلايشا جۇمىلا بىلگەن جۇرتتان دەرت تە جەڭىلەدى. اماندىق بولسا، بۇل قيىندىقتان دا وتەمىز. ءبىزدىڭ سالاعا جاسالىپ جاتقان قولداۋعا ريزامىز. مەملەكەت تاراپىنان ەڭبەگىمىزدىڭ ەلەنگەنى ەرەكشە سەرپىن بەرەدى، – دەيدى رايحان قاسىمقىزى.

قازىر ورشىگەن دەرتتىڭ بەتى بىرتىندەپ قايتىپ كەلە جاتىر. ەل ساۋلىعى ساقشىلارىنىڭ جۇمىسى سوندا دا سايابىر تابار ەمەس. ولار توسەككە تاڭىلعان سوڭعى ناۋقاس اۋرۋىنان ايىعىپ، ۇيىنە شىققانشا تىنىم تاپپايدى. بۇل ايتۋعا عانا وڭاي، ارينە. وسىنداي ۇلكەن ىستە ءبىزدىڭ كەيىپكەرىمىز سەكىلدى مىڭداعان ماماننىڭ ۇلەسى بار.

قىزىلوردا وبلىسى