مەديتسينا سالاسىندا 40 جىلعا جۋىق ەڭبەك ەتتى. ارىپتەستەرىنىڭ ايتۋىنشا, وسى مەرزىمدە ارىنا دا, اق حالاتىنا دا داق تۇسىرمەدى. ۇنەمى ىزدەندى. ماماندىعىنا ادالدىعىنان اينىمادى. دەرتىنە شيپا ىزدەپ كەلگەن ناۋقاستاردىڭ ۇلكەنىن تۋىسىنداي, كىشىسىن بالاسىنداي كوردى. 1998 جىلى №2 وبلىستىق ينفەكتسيالىق اۋرۋحاناعا اۋىستى.
– جۇمابەك باعىت ۇلى بۇل اۋرۋحانادا العاشقىدا رەانيموتولوگ, كەيىن ومىردەن وتكەنگە دەيىن ينفەكتسيونيست بولىپ ەڭبەك ەتتى. ايماققا ەسىمى كەڭىنەن تاراعان دارىگەردىڭ ۋاقىتپەن ساناسقانىن كورمەدىك. ءوز ىسىنە ۇلكەن جاۋاپكەرشىلىكپەن قاراۋشى ەدى, – دەيدى №2 وبلىستىق ينفەكتسيالىق اۋرۋحانا ديرەكتورىنىڭ كەڭەسشىسى اسلان جەڭىس ۇلى.
ونىمەن ارىپتەس بولعانداردىڭ ءبارى ادامي بولمىسى ەرەكشە ەكەنىن العا تارتادى. ويتكەنى جۇمابەك داۋلەتوۆ 40 جىلعا جۋىق دارىگەرلىك ەڭبەك جولىندا وبا, حولەرا, ءسىبىر جاراسى سەكىلدى ۆيرۋستى ىندەتپەن اۋىرعان جاندارعا ەمىمەن دە, جىلى سوزىمەن دە شيپا دارىتتى. اۋرۋحانادا جەتىسپەيتىن دارىگەرلەردىڭ مىندەتىن قوسا اتقارۋدان ەشقاشان تارتىنبادى. ءتىپتى, تالاي رەت قان قىسىمى كوتەرىلىپ وتىرسا دا, جۇمىس ورنىن تاستاپ كەتپەگەنىنەن كاسىبىنە ادالدىقتىڭ ۇلگىسى بايقالادى.
– ول دارىگەرلىك انتىنا ادال, اق حالاتى سەكىلدى جۇرەگى مەيىرىمگە تولى, پەيىلى كەڭ, تازا جان, جاس بۋىنعا اقىلىن ايتىپ, ءجون سىلتەر تالىمگەر بولدى. ۇدايى اق حالاتىمىزداي ارىمىز دا تازا بولۋى كەرەك دەگەندى ايتىپ وتىراتىن, – دەپ قيماستىقپەن ەسكە الادى ارىپتەستەرى.
وبلىستىق مەديتسينالىق جەدەل جاردەم ستانساسىنىڭ فەلدشەرى الماگۇل دەمەسىنوۆانىڭ جاسى ەلۋگە دە تولماعان ەكەن. بىراق ەڭبەكسۇيگىشتىگىمەن, اقكوڭىلدىگىمەن ارىپتەستەرىنىڭ ەسىندە قالدى. ويتكەنى ول دا قاۋىپتى ىندەتكە قارسى كۇرەستىڭ العى شەبىندە ءجۇردى. ءسويتىپ, ءوز ءومىرىن قۇربان ەتتى.
ارىپتەستەرىنىڭ پىكىرىنە سۇيەنسەك, الماگۇل دەمەسىنوۆا 1991 جىلى گۋرەۆ مەديتسينا ۋچيليششەسىنە «فەلدشەر» بىلىكتىلىگى بويىنشا وقۋعا ءتۇستى. ۋچيليششە قابىرعاسىنداعى العاشقى كۇننەن زەرەكتىگىمەن, تاپقىرلىعىمەن قاتارلاستارىنان ەرەكشەلەنىپتى. وقۋىن بىتىرگەن سوڭ بىردەن وبلىستىق جەدەل جاردەم ستانساسىنا جۇمىسقا ورنالاسقان.
– الماگۇل ەشقاشان تارتىنشاقتامايتىن. جۇمىس دەسە جانىپ تۇسەتىن ەدى. ءبىز ونى ارقاشان ماقتان تۇتۋشى ەدىك. ءبارىمىز دە ايەلمىز عوي. ال ول بارىمىزدەن وزگەشە بولاتىن. ۋاقىتپەن ساناسۋدى بىلگەن جوق. كەيدە جەدەل جاردەمگە باراتىن بريگادادا فەلدشەر جەتىسپەي جاتادى. سوندايدا اۋىسىمى اياقتالعانىنا قاراماستان, شاقىرتۋعا كەتە بەرەتىن. جاستارعا ومىرلىك تاجىريبەسىن ۇيرەتۋدەن دە جالىققان جوق, – دەيدى وبلىستىق جەدەل جاردەم ستانساسى ديرەكتورىنىڭ ورىنباسارى گۇلنافيس راحمەتوۆا. – ونىڭ اتىنا پاتسيەنتتەردەن ۇدايى العىس حات ءجيى كەلەتىن. بۇل دا الماگۇلدىڭ ءوز ءىسىن ابىرويمەن اتقارعانىنا كۋا بولارلىق دەرەك. ناۋرىزدان بەرى قاۋىپتى ىندەتكە قارسى كۇرەس بريگاداسىندا ەڭبەك ەتكەن ەدى.
ءبىر وكىنىشتىسى, تاجالعا قارسى تۇرعان اق حالاتتى جاندار كوپ جىلعى ەڭبەگىنىڭ ەلەنگەنىن كورە المادى. دەگەنمەن پرەزيدەنت جارلىعىمەن جۇمابەك داۋلەتوۆ «قۇرمەت», ال فەلدشەر الماگۇل دەمەسىنوۆا ءىىى دارەجەلى «بارىس» وردەنىمەن ماراپاتتالدى. ارينە, ومىردەن وتكەن سوڭ...
اتىراۋ
