التى ايلىقتىڭ قورىتىندىسىنا ارنالعان كەڭەيتىلگەن ماجىلىستە وبلىس اكىمى گۇلشارا ابدىقالىقوۆا وسى ماسەلەنى باسا ايتىپ, ايماقتا كوروناۆيرۋس ىندەتىمەن كۇرەسۋ باعىتىنداعى اتقارىلىپ وتىرعان جۇمىستارعا, «جۇمىسپەن قامتۋ جول كارتاسى» مەملەكەتتىك باعدارلاماسى اياسىندا جاڭا جۇمىس ورىندارىن اشۋ ماسەلەسىنە توقتالدى.
جيىندا باعانى تۇراقتاندىرۋ باعىتىندا جىبەرىلگەن كەمشىلىكتەرى ءۇشىن جاڭاقورعان مەن ارال اۋدانى اكىمدەرىنە قاتاڭ ەسكەرتۋ جاريالاندى. قىزىلوردا قالاسى مەن اۋدان باسشىلارىنا كوكونىس جانە باسقا دا الەۋمەتتىك ازىق-ت ۇلىك باعالارىن وسىرمەي, بايقالعان فاكتىلەر بويىنشا شارالار قابىلداۋدى تاپسىردى. اكىمدەر ۋاقىت وزدىرماي كورشىلەس وبلىستارعا شىعىپ, حالىقتى ارزان ونىمدەرمەن قامتاماسىز ەتۋدىڭ قامىن جاساۋى كەرەك.
– كارتوپ 63, ال ءسابىز بەن پياز 50 پايىزعا قىمباتتاعان. قىس پەن كوكتەم بولسا ءبىرسارى, ال كوكونىس پىسە باستايتىن ءدال قازىرگى كەزەڭدەگى بۇل كورسەتكىش ءتىپتى اقىلعا سىيمايدى. بارلىق اۋدانداردا باعالاردىڭ نەگىزسىز وسۋىنە جول بەرىلگەن, سونىڭ ىشىندە جاڭاقورعاندا 7, ارال مەن قىزىلوردا قالاسىندا 6 ءتۇرلى ازىق-ت ۇلىكتىڭ باعاسى كوتەرىلگەن, – دەدى گۇلشارا ابدىقالىقوۆا.
بيىل كوكتەمگى ەگىس ناۋقانى كەزىندە اكىمدىكتەرگە سۋ تاپشىلىعىنا بايلانىستى كۇرىش كولەمىن شەكتەۋ تاپسىرىلعان ەدى. بىراق سول ەسكەرتۋدى ەلەمەگەندەردىڭ ارتىق ەككەن ەگىنى سۋدان قالىپ, ديقانداردىڭ ەڭبەگى ەش بولىپ وتىر. مىسالى, ستاتيستيكالىق ەسەپ بويىنشا وبلىستا 89 623 گەكتارعا كۇرىش ەگىلگەن. ونىڭ 8 492 گەكتارى ارتىق. شيەلى اۋدانى 12 200 گەكتار القاپقا كۇرىش ەككەندىگى تۋرالى ەسەپ بەرگەنىمەن, ناقتى 14 353 گەكتارعا ءدان سەبىلىپتى. قازىر وسى اۋدانداعى 3 شارۋاشىلىقتىڭ 720 گەكتاردان استام كۇرىشىنە سۋ جەتپەي, كۇيىپ كەتىپ وتىر. ءوڭىر باسشىسى بەرىلگەن تاپسىرمانى مەرزىمىندە ورىنداماي, كۇرىش كولەمىن قولدان ۇلعايتىپ, سۋ تاپشىلىعىنا اكەپ سوقتىرعانى ءۇشىن شيەلى اۋدانىنىڭ اكىمىنە سوگىس جاريالادى.
«قاراپايىم زاتتار ەكونوميكاسى» باعدارلاماسى بويىنشا دا جوبا ۇسىنباعان اۋداندار بار. سوڭعى 6 ايدا باعدارلاما اياسىندا قۇنى 788,6 ملن تەڭگە بولاتىن 37 جوبا ماقۇلدانسا, ونىڭ باسىم بولىگى جاڭاقورعان اۋدانىنا تيەسىلى بولىپ وتىر.
– ال ارال اۋدانىندا بىردە-ءبىر جوبا جوق. بۇل مەملەكەتتىك باعدارلامانىڭ ورىندالماعانىن بىلدىرەدى. جاعداي بۇلاي جالعاسا بەرسە, اۋدان باسشىسىنىڭ تارتىپتىك جاۋاپكەرشىلىگىن قارايمىز. بۇل بارلىق باسقارما باسشىلارى مەن قالا, اۋدان اكىمدەرىنە قاتىستى. باعدارلاما شەڭبەرىندە قىزىلوردا قالاسى 10 ملرد, ال بارلىق اۋدان اكىمدىكتەرى 2 ملرد تەڭگەگە جۋىق مەجەنى يگەرۋ بويىنشا جۇمىستاردى جالعاستىرۋى ءتيىس, – دەدى ءوڭىر باسشىسى.
«جۇمىسپەن قامتۋدىڭ جول كارتاسى» اياسىندا وبلىستا 276 جوبانى جۇزەگە اسىرۋعا 37 ملرد تەڭگەگە جۋىق قارجى بولىنگەن. بۇل قاراجات پاندەميا ۋاقىتىندا 9300 جاڭا جۇمىس ورنىن اشىپ, حالىقتىڭ الەۋمەتتىك جاعدايىن جاقسارتۋعا باعىتتالۋى كەرەك. قازىر 276 جوبانىڭ 270-ءسى بويىنشا جۇمىستار باستالعان. جۇمىس ورنىن قۇرۋ كورسەتكىشكەرى قىزىلوردا قالاسىندا 39,4 جانە ارال اۋدانىنا 46,1 پايىز. ءوڭىر باسشىسى قالا مەن اۋدان اكىمدەرىنە اي سوڭىنا دەيىن جاڭا جۇمىس ورىندارى كورسەتكىشىن 50 پايىزدان اسىرۋدى جۇكتەدى.
ايماق باسشىسى بيۋدجەت شىعىستارىن وڭتايلاندىرۋ ماسەلەسىن دە ەسكە سالدى. سونىمەن قاتار «تسيفرلى قازاقستان» باعدارلاماسىنداعى بارلىق كەمشىلىكتەر تۇزەلىپ, جىل سوڭىنا دەيىن وڭىردەگى 250-دەن استام تۇرعىنى بار ەلدى مەكەندەر ساپالى ينتەرنەتپەن قامتىلۋى قاجەت.
جيىندا جاقىندا عانا تاعايىندالعان وبلىستىق دەنساۋلىق ساقتاۋ باسقارماسىنىڭ باسشىسى ءسابيت پازىلوۆتىڭ بايانداماسىن تىڭداعان ايماق باسشىسى تەز ارادا ىندەتپەن كۇرەسۋ باعىتىندا ارنايى جوسپار جاساپ, بەكىتۋگە ۇسىنۋدى تاپسىردى.
قىزىلوردا وبلىسى
