رۋحانيات • 15 شىلدە، 2020

“استانا بالەت” تەاترى جەتىنشى تەاتر ماۋسىمىن اياقتادى

10 رەت كورسەتىلدى

"استانا بالەت" تەاترى، ەلوردالىق ۇجىم تاريحىنداعى ەڭ قىسقا، جەتىنشى تەاتر ماۋسىمىن اياقتادى، دەپ حابارلايدى Egemen.kz تەاتردىڭ PR قىزمەتىنە سىلتەمە جاساپ.

بيىل، ناۋرىز ايىندا كوروناۆيرۋس پاندەمياسىنىڭ سالدارىنان تەاتردىڭ ۇيرەنشىكتى تىرشىلىگى ۇزىلگەنىنە قاراماستان، مادەنيەت جانە سپورت مينيسترلىگىنىڭ قولداۋى ارقاسىندا، اينالدىرعان بەس ايدىڭ كولەمىندە ۇجىم ايتۋلى پرەمەرالارىن وتكىزىپ، قازاقستان قالالارى مەن الىس جانە جاقىن شەت ەلدەرگە گاسترولدىك ساپارلارىن ۇيىمداستىردى.

بيىلعى ماۋسىم تاشكەنت قالاسىنداعى وزبەكستان ۇلكەن تەاترىنىڭ ساحناسىندا وتكەن گاسترولدەن باستالدى. يۋري گريگوروۆيچتىڭ "ماحاببات تۋرالى اڭىز" ءۇش اكتىلى بالەتى، سونىمەن بىرگە، تەاتردىڭ ءداستۇرلى " ۇلى دالا مۇراسى" باعدارلاماسى مەن "A Fuego Lento" ءبىر اكتىلى بالەتىن وزبەك كورەرمەنى ەرەكشە ىقىلاسپەن قابىلدادى. تەاتر قويىلىمدارىن كورەرمەن قاۋىم عانا ەمەس، شەت ەلدىك ارىپتەستەر دە جوعارى باعالادى. "استانا بالەت" -قابىلداۋعا تۇرارلىق تاجىريبە"، - دەپ اتاپ ءوتتى رەسەي حالىق ءارتىسى اندريس ليەپا.

بۇدان كەيىن، تەاتر ۇلىبريتانياعا العاشقى ساپارىنا دايىندالا باستادى. "استانا بالەت" تەاترى تاۋەلسىز قازاقستان تاريحىندا اڭىزعا اينالعان كوۆەنت-گاردەن تەاترىنىڭ ساحناسىندا ونەر كورسەتكەن العاشقى ۇجىم ەدى.ءۇش كۇندىك كورسەتىلىمگە بيلەتتەر گاسترول باستالاردان بىرنەشە اي بۇرىن ساتىلىپ، بريتان ءباسپاسوزى مەن جەرگىلىكتى سىنشىلار قازاقستاندىق ترۋپپانىڭ ونەرىن جوعارى باعالادى. ايتالىق، بريتاندىق "تايمس" ارتىستەردىڭ كەلبەتى مەن وجەت سىمباتىن، سونىمەن بىرگە، " ۇلى دالا مۇراسى" ۇلتتىق باعدارلاماسىنىڭ اسەمدىگىن ەرەكشە اتاپ ءوتتى. "Broadway World" باسىلىمى "سولومەيا" ءبىر اكتىلى بالەتىنىڭ بايانداۋ ءتاسىلىن كولەمدى وپەرامەن سالىستىرىپ، حورەوگراف مۋكارام ءاۆاحريدىڭ پلاستيكالىق تىلىنە ءتانتى بولدى.

ماۋسىمنىڭ العاشقى پرەمەراسى – حورەوگراف دجوردج ءبالانچيننىڭ "كونچەرتو باروككو" قويىلىمىن ماەسترونىڭ شاكىرتى – نانەتت گلۋشاك ساحنالادى. قىسقا عانا ءبىر اكتىلى بالەت، قانشا دەگەنمەن، ۇزاق دايىندىق پەن ارتىستەردىڭ شەبەرلىگىن تالاپ ەتتى. امەريكالىق نەوكلاسسيكتىڭ حورەوگرافياسى ورىنداۋشىلىقتىڭ ءمىنسىز دالدىگى مەن تازالىعىن قاجەت ەتەدى.

سول كەزدە، حالىقارالىق بالەت كۇنىنە وراي، "اشىق ەسىك كۇندەرى" ۇيىمداستىرىلىپ، كەز-كەلگەن ادام تەاترعا تەگىن كىرىپ، ساحنا شىمىلدىعىنىڭ سىرتىنداعى سىرعا قانىعىپ، "ەۋرازيانىڭ جەتى شىمىلدىعى" كورمەسىمەن تانىسىپ، سونىمەن بىرگە، بالەت پەن ونىڭ تاريحى جايلى قىزىقتى ءدارىستى تىڭداي الدى.

سونىمەن بىرگە، ۇجىمىمىز پاۆلودار قالاسى مەن اقش-تىڭ ءتورت قالاسىنا گاسترولدىك ساپارىن وتكىزدى: سان-فرانتسيسكو، لوس-اندجەلەس، سان-ديەگو جانە ەسكانديدو. مۇنىمەن قوسا، تەاتر ارتىستەرى ديماش قۇدايبەرگەنوۆتىڭ نيۋ-يوركتەگى (اقش) "BarclaysCenter" ارەناسى مەن ماسكەۋلىك كرەملدەگى جەكە كونتسەرتى مەن ماسكەۋدەگى قازاقستان مادەنيەتىنىڭ كۇندەرى اياسىنداعى فەستيۆالگە قاتىستى.

"استانا بالەت" تەاترىنىڭ شەت ەلدىك كونتسەرتتەرىن ۇزىن-سانى 30000 ادام تاماشالادى.

تەاتردىڭ شىعارماشىلىق ۇجىم مۇشەلەرى مەملەكەتتىك ناگرادالارمەن ماراپاتتالدى: جەتەكشى سوليست تاتيانا تەن "ەڭبەك سىڭىرگەن مادەنيەت قىزمەتكەرى" اتاعىنا، گريم تسەحىنىڭ مەڭگەرۋشىسى ياكوۆەنكو ۆالەنتينا - "ەرەن ەڭبەگى ءۇشىن" مەدالىنە يە بولدى.

جەلتوقسان ايىندا، قازاقستاندىق بالەت تاريحىندا العاش رەت، سەرگەي پروكوفەۆتىڭ مۋزىكاسىنا "كۇلشە قىز" بالەتىنىڭ پرەمەراسى ءوتتى. پرەمەرالىق كورسەتىلىمدەرگە بيلەتتەر ءبىر اي بۇرىن ساتىلىپ كەتتى.

بيىل، جىل باسىندا تەاتر ۇجىمى الماتى، ودان كەيىناتىراۋ قالالارىنا اۋقىمدى گاسترولىن ۇيىمداستىرىپ ەدى. دەگەنمەن، تج رەجيمى ەنگىزىلگەندىكتەن، اتىراۋدا تەك ءبىر-اقكۇن ونەر كورسەتكەن بولاتىن. الماتى جانە اتىراۋ قالالارىنداعى تەاتر كورسەتىلىمىن تاماشالاعان كورەرمەننىڭ جالپى سانى 4000 ادامعا جۋىق.

تەاتردىڭ بيىلعى ماۋسىمىندا 10 باعدارلاما، سونىڭ ىشىندە، ەكى پرەمەرا كورسەتىلىپ، ونى، شامامەن، 12 000 ادام تاماشالادى. "ساحنا سىرى" تانىمدىق ەكسكۋرسيا جوباسىنا 250-دەن ارتىق ادام قاتىستى.

كارانتين ءتارتىبى ەنگىزىلگەندىكتەن، تەاتر قاشىقتان جۇمىس ىستەۋ ادىسىنە اۋىسىپ، مادەنيەت جانە سپورت مينيسترلىگىنىڭ قولداۋىمەن 6 بىرەگەي ونلاين-جوبانى جۇزەگە اسىردى.

ۇجىم "Eurasian Dance Festival" اياسىندا وتكەن سپەكتاكلءدى كورسەتىپ، سونىمەن بىرگە، ۇلى جەڭىستىڭ 75جىلدىعىنا وراي، " ۇلى دالا مۇراسى" ونلاين-كونتسەرتءىن وتكىزدى.  

"ونلاين تەاتر" ارنايى جوباسى ىسكە قوسىلىپ، سونىڭ اياسىندا الەمدىك بالەت جۇلدىزدارىمەن بەس تىكەلەي ەفير وتكىزىلدى: ءاليا تانىقپاەۆا، يانا سالەنكو، ايدوس زاقان، تاتيانا تەن. قولدانۋشىلاردىڭ ۇزىن-سانى 163 000ادامنان استى.

تەاتر مەن ونىڭ تاريحىنا بايلانىستى "On Stage/Online" اتتى بىرقاتار ونلاين-ەكسكۋرسييالار وتكىزىلدى. بۇل جوبا ونەردىڭ وسى بيىك ۇلگىسىنىڭ قالىپتاسۋى، ونىڭ ەتيكاسى، ونى جاراتقان جاندار مەن كورەرمەندەر جايلى باياندايدى. ەفيردە بولعان ەكى شىعارىلىمدى 98 000 قولدانۋشى تاماشالادى. ەلىمىزدەگى ەپيدەميولوگيالىق جاعداي كۇرت ۋشىققاندىقتان، كەلەسى سەريالاردىڭ ءتۇسىرىلىمى كەيىنگە شەگەرىلدى.

سونىمەن بىرگە، تەاتر ۇجىمى قر مادەنيەت جانە سپورت مينيسترلىگى مەن "قازاقتەلەكوم" اق بىرلەسىپ جۇزەگە اسىرعان "كارانتيندەگى جۇلدىز" ونلاين-جوباسىنا دا قاتىستى. "استانا بالەت" تەاترىنىڭ ارتىستەرىمەن وتكەن شىعارىلىم ەرەكشە ىلتيپاتقا بولەنىپ، 30 000 مارتە قارالدى.

تىگىن تسەحىنىڭ قىزمەتكەرلەرى 2000 استام مەديتسينالىق بەتپەردە تىگىپ، №4 بالالار ەمحاناسىنا تابىستادى.

وكىنىشكە قاراي، كوروناۆيرۋس پاندەمياسى تەاتردىڭ كوپتەگەن جوباسىنا اسەر ەتپەي قويمادى. سەمەي قالاسىنا گاسترول وتپەي، "بەيبارىس سۇلتان" بالەتىنىڭ پرەمەراسى كەيىنگە شەگەرىلىپ، دجوردج بالانچينءنىڭ "لاعىل" پرەمەراسىنا دايىندىق بەلگىسىز مەرزىمگە شەگەرىلدى.

"استانا بالەت" تەاترى باسشىلىعىنىڭ ايتۋىنشا، جوسپارلانعان پرەمەرالار مەن كورسەتىلىمدەردىڭ ءبارى، ەلىمىزدەگى ەپيدەميولوگيالىق جاعدايعا قاراي، جاڭا، سەگىزىنشى تەاتر ماۋسىمىندا جۇزەگە اسىرىلماقشى.

سوڭعى جاڭالىقتار

ۇقساس جاڭالىقتار