الاش ازا تۇتقان كۇن

ساياسات • 14 شىلدە، 2020

الاش ازا تۇتقان كۇن

21 رەت كورسەتىلدى

الاش جۇرتى ازالى. رەسمي مالىمەتكە سەنسەك، بۇگىندە قازاقستاننىڭ 59 899 ازاماتى كوروناۆيرۋس ينفەكتسياسىنا شالدىعىپ، سونىڭ 34 190-ى دەرتتەن ايىعىپتى.

راۋان قابيدولدين

وكىنىشتىسى سول، 375 وتانداسىمىز ىندەت قۇرىعىنان قۇتىلىپ كەتە العان جوق. قازاق ەلى قارا جامىلعاندا ەل پرەزيدەنتى قاسىم-جومارت توقاەۆ 13 شىلدەنى – ۇلتتىق ازا تۇتۋ كۇنى دەپ جاريالادى. مەملەكەتتىك تۋدى تومەن ءتۇسىرىپ، حالقىمىز پاندەميا قۇرباندارىن ءبىر مينۋت ۇنسىزدىكپەن ەسكە الدى...

ءيا، الاپات ىندەت القىمنان العان سايىن اسىل ازاماتتاردان ايىرىلىپ جاتىرمىز.

ەت جاقىنىن جەر قوينىنا تابىستاعان ءار شاڭىراقتىڭ شەمەن-شەرى – وتانداستارىمىزعا ورتاق قايعى. مۇندايدا «تاس – تۇسكەن جەرىنە اۋىر» دەۋشى ەدى دانا حالقىمىز.

وزەكتى وكىنىشتىڭ ءورتى قارىعان سايىن قابىرعامىز قايىسىپ، بۇعانامىز مايىسادى. كۇندىز كۇلكىدەن، تۇندە ۇيقىدان ايىرىلدىق. اپات ايتىپ كەلمەيدى ەكەن. توبەمىزدەن وق ۇشىپ، جاۋ جاعادان الماي-اق ايدىڭ، كۇننىڭ امانىندا قىناداي قىرىلامىز دەپ كىم ويلاعان؟! ويلامادىق قوي سول. بويىمىزدا بەيقامدىق، ويىمىزدا سەنبەستىك بولدى. دۇنيە ءجۇزى دۇرلىگىپ جاتقاندا اپات قازاق ەلىن اينالىپ وتەدى دەپ سەندىك. تىعىلىپ توي جاساپ، قىدىرىپ قوناققا باردىق.

قازاق حالقىنىڭ باسىنا تونگەن العاشقى قاسىرەت پە ەدى بۇل؟ جوق. اسپانىمىزدى بۇلت تورلاعان زۇلمات جىلداردى بۇعان دەيىن دە كوپ كوردىك. اشارشىلىق پەن ساياسي قۋعىن-سۇرگىننىڭ، نەبىر سۇراپىل سوعىستىڭ كوزى ءتىرى كۋاگەرلەرى بار ارامىزدا. ول ول ما، ەلىمىز ەگەمەندىك العاننان بەرى دە سەگىز رەت ازا تۇتىپ ۇلگەرگەن ەكەنبىز. توعىزىنشىسى – توپان سۋ ەمەس، كوزگە كورىنبەيتىن ۆيرۋستىڭ كەسىرىنەن جاريالاندى. مەملەكەتتىك تۋدى توعىز مارتە تومەن تۇسىردىك! وڭگە ەمەس، ەلدىڭ ىنتىماعى، ىرىسى مەن بەرەكەسى جەڭدى سول قاسىرەتتەردى. بۇل جولى دا سولاي بولماق.

ء«بىز – تالاي زوبالاڭ مەن سىناقتى باستان وتكەرگەن، تاريحتىڭ تالاي داۋىلىنا بوي بەرمەگەن حالىقپىز. باتىر بابالاردىڭ جولىن جالعاعان بۇگىنگى ۇرپاق تا قازىرگى قيىندىققا توتەپ بەرەدى دەپ سەنەمىن. بالكىم، بۇل ءبىزدىڭ بىرلىگىمىزدى بايقاۋ ءۇشىن بەرىلگەن سىناق شىعار. ءبىر جەڭنەن قول، ءبىر جاعادان باس شىعارىپ ۇيىمداسا بىلسەك، بۇل سىننان دا وتەرمىز»، دەپ مەملەكەت باسشىسى دا سىن ساعاتتا حالقىنىڭ قاسىنان تابىلىپ، ۇلتتى ۇيىستىرا ءبىلدى. «سالماقتى، سابىرلى بولايىق!» دەدى.

ۇلتتىق ازا تۇتۋ كۇنى ىندەت قۇرباندارىن ەسكە الۋ ءىس-شارالارى قازاقستاننىڭ تۇكپىر-تۇكپىرىندە قولعا الىندى. رەسپۋبليكالىق جانە جەرگىلىكتى راديوستانتسيالار مەن تەلەارنالار ويىن-ساۋىق باعدارلامالارى مەن جارنامالاردى تاراتۋدى توقتاتتى. قۇربانداردى ءۇنسىز ەسكە الۋ ءراسىمى رەسپۋبليكانىڭ بارلىق ايماعىندا ءوتتى. باس ءمۇفتي ناۋرىزباي قاجى تاعان ۇلىنىڭ باستاماسىمەن ەلىمىزدەگى رەسپۋبليكالىق، وبلىستىق ءىرى-ءىرى مەشىتتەر مەن مەدرەسەلەردە، قاريلاردى دايارلاۋ ورتالىقتارىندا قۇران قاتىم وقىلدى.

شىعىس قازاقستان وبلىسىندا ىندەت سالدارىنان جيىرمادان استام ادام كوز جۇمعان ەدى. سونىڭ اراسىندا مەديتسينا سالاسىنىڭ قىزمەتكەرلەرى دە بار. قارالى كۇندە وبلىس تۇرعىندارى قازا تاپقانداردىڭ وتباسىلارىنا كوڭىل ايتىپ، قايعىلارىنا ورتاقتاستى.

اقتوبە وبلىسىنىڭ بارلىق مەملەكەتتىك مەكەمەلەرىندەگى، ۇيىمدار مەن كاسىپورىندارداعى مەملەكەتتىك تۋ تومەن ءتۇسىرىلىپ، وبلىس اكىمى وڭداسىن ورازالين، وبلىستىق ءماسليحاتتىڭ دەپۋتاتتارى، قوعامدىق كەڭەستىڭ مۇشەلەرى باستاعان وبلىس تۇرعىندارى پاندەميا قۇرباندارىن ءبىر مينۋت ۇنسىزدىكپەن ەسكە الدى.

پاۆلودار وبلىسىنىڭ اكىمى ابىلقايىر سقاقوۆ پەن ونىڭ ورىنباسارلارى، قۇقىق قورعاۋ ورگاندارىنىڭ باسشىلارى، Nur Otan پارتياسىنىڭ وكىلدەرى وبلىستىق اكىمدىكتىڭ الدىنداعى الاڭدا جينالىپ، ىندەت قۇرباندارىن ءبىر مينۋت ۇنسىزدىكپەن ەسكە الدى.

ۇلتتىق ازا تۇتۋ كۇنى باتىس قازاقستان وبلىسىندا دا بىرنەشە شارامەن اتالىپ ءوتىپتى. ياعني تۇڭعىش پرەزيدەنت الاڭىنداعى مەملەكەتتىك تۋ تۇعىرىندا، وبلىستىق پەريناتالدىق ورتالىق جانە وبلىستىق اكىمدىك عيماراتى الدىندا وتكەن شارادا جينالعان ءوڭىر باسشىلارى، تۇرعىندار مەن دارىگەرلەر covid-19 قۇرباندارىن، وسى ىندەتپەن كۇرەستە قازا تاپقان ارىپتەستەرىن ءبىر مينۋت ءۇنسىز تۇرىپ ەسكە الدى. وسىنداي ءىس-شارالار بارلىق وبلىستا وتكەنىن تاعى دا قايتالاپ ايتامىز.

«سابىر ءتۇبى – سارى التىن!» «ۇرەي – دەرتتىڭ جارىمى، سابىر – ەمنىڭ جارىمى، ءتوزىم – ساۋىعۋدىڭ باسى» دەمەپ پە ەدى مەديتسينا عىلىمىنىڭ اتاسى اتانعان يبن-سينا. بىزگە دە سول تولاعاي ءتوزىم مەن سارابدال سابىر قاجەت. ء«جىپ بىرىكسە – ارقان بولار، ەر بىرىكسە – قالقان بولار». ارقانىمىز ۇزىلمەسە، بىرلىگىمىز مۇجىلمەسە، ءبىز جەڭبەيتىن دەرت تە، ءبىز سوندىرە المايتىن ءورت تە بولمايدى.