ۇكىمەت • 13 شىلدە، 2020

ءبىر رەت قولدانىلاتىن ماسكانىڭ باعاسى 118 تەڭگەدەن 85 تەڭگەگە دەيىن ارزاندادى

81 رەت كورسەتىلدى

پرەمەر-ءمينيستردىڭ ورىنباسارى ە. توعجانوۆتىڭ توراعالىعىمەن وتكەن ۆەدومستۆوارالىق كوميسسيانىڭ وتىرىسىندا ەلىمىزدەگى سانيتارلىق-ەپيدەميولوگيالىق جاعدايدى تۇراقتاندىرۋ بويىنشا بىرقاتار ماڭىزدى شەشىمدەر قابىلداندى، - دەپ جازادى Egemen.kz.

مەملەكەت باسشىسىنىڭ تاپسىرماسىن ورىنداۋ ءۇشىن اتىراۋ وبلىسىنىڭ كادرلىق الەۋەتىن نىعايتۋ ماقساتىندا وڭىرگە 102 جوعارى بىلىكتى مامان، ماڭعىستاۋ وبلىسىنا 56 مامان جىبەرىلەتىن بولدى;

ءبىر رەت قولدانىلاتىن ءۇش قاباتتى مەديتسينالىق ماسكانىڭ بولشەك ساۋداداعى شەكتى باعاسى 118 تەڭگەدەن 85 تەڭگەگە دەيىن، ياعني 28%-عا ارزانداتىلدى;

وتاندىق ءوندىرىستىڭ كولەمىن ەسكەرە وتىرىپ، بۇگىنگى كۇنى وڭىرلەردە دەنە قىزۋىن تۇسىرەتىن جانە باكتەرياعا قارسى پرەپاراتتاردىڭ ايلىق قورى قالىپتاستىرىلدى. قازاقستان رەسپۋبليكاسىنا دارىلىك زاتتاردىڭ 3،5 ملن وراماسى جەتكىزىلدى، ولار وڭىرلەر اراسىندا ءبولىنىپ، تاراتىلادى. وسى اپتادا قاجەتتى قوسىمشا دارىلىك زاتتاردى جەتكىزۋ ۇيىمداستىرىلادى;

بەلگىلەنگەن سانيتارلىق-ەپيدەميولوگيالىق نورمالاردىڭ ساقتالماۋىنا بايلانىستى، دەنساۋلىق ساقتاۋ، ىشكى ىستەر مينيسترلىكتەرىنە، وڭىرلەردىڭ اكىمدىكتەرىنە كارانتين رەجيمىنىڭ انىقتالعان بۇزۋشىلىقتارىن جويۋعا باعىتتالعان بارلىق شارالاردى قابىلداي وتىرىپ، ءموبيلدى توپتاردىڭ جۇمىسىن كۇشەيتۋ تاپسىرىلدى (جەكە تۇلعالارعا - 30 اەك، زاڭدى تۇلعالارعا - 230 اەك كولەمىندە اكىمشىلىك ايىپپۇل سالۋ كوزدەلگەن);

سونىمەن قوسا، ستاتسيونارلارداعى پاتسيەنتتەردى وتتەگىمەن قولداۋدى قامتاماسىز ەتۋ ماقساتىندا وڭىرلەردىڭ اكىمدىكتەرى شۇعىل تۇردە 2600-دەن استام وتتەگى كونتسەنتراتى مەن مەديتسينالىق گازداردى ساتىپ الۋدا.

"ەلدە بارلىق قاتاڭ شەكتەۋ شارالارى قابىلداندى. ەندى بارلىق قوعامدىق قوزعالىستاردىڭ الەۋەتىن تارتا وتىرىپ، ەلىمىزدىڭ ءار اۋدانىنىڭ، اۋىلى مەن اۋلاسىنىڭ ءاربىر تۇرعىنىنا كارانتين رەجيمىن ساقتاۋ قاجەتتىگى تۋرالى اقپاراتتى ساپالى جەتكىزۋ قاجەت"، - دەپ تۇيىندەدى ە. توعجانوۆ.

سوڭعى جاڭالىقتار

ۇقساس جاڭالىقتار