ايماقتار • 13 شىلدە، 2020

رەسەيدەن 6 دارىگەر اتىراۋ وبلىسىنا كومەككە كەلدى

149 رەت كورسەتىلدى

بۇگىن نۇر-سۇلتان قالاسىنان كەلگەن رەسەيلىك دارىگەرلەردى اتىراۋ وبلىسىنىڭ اكىمى ماحامبەت دوسمۇحامبەتوۆ قابىلداپ، قالىپتاسقان احۋالدى ءتۇسىندىرىپ، جۇمىسىنا تابىس تىلەدى، دەپ جازادى Egemen.kz وڭىرلىك كوممۋنيكاتسيالار قىزمەتىنە سىلتەمە جاساپ.

"جاعدايدى كورىپ وتىرسىزدار. ەلىمىزدە قازىر كوروناۆيرۋسپەن بىرگە پنەۆمونيا دەرتى دە ۋشىعىپ تۇر. وسى ايدا وبلىستىق اۋرۋحانا جانىنان 400 ورىندىق ينفەكتسيالىق ستاتسيونار اشىلادى، سونىمەن بىرگە قۇرمانعازى اۋدانىنان دا قوسىمشا ورىندار جاساقتالىپ جاتىر. ءبىز قاجەتتى ستاتسيونارلىق ورىنمەن، ءدارى-دارمەكپەن، قۇرال-جابدىقپەن تولىقتاي قامتاماسىز ەتەمىز. باستىسى، سول جاساقتالىپ، اشىلىپ جاتقان ورىنداردا ناۋقاستاردى ەمدەيتىن دارىگەرلەر كەرەك. جىلدار بويى كەلە جاتقان مەديتسينالىق ماماندار تاپشىلىعى قيىن كەزدە انىق بايقالدى"، - دەپ اتاپ ءوتتى اتىراۋ وبلىسىنىڭ اكىمى ماحامبەت دوسمۇحامبەتوۆ.

سونداي-اق ايماق باسشىسى جاقىن ارادا رەسەيدىڭ استراحان وبلىسىنان تاعى بەس دارىگەر مامان كەلەتىنىن دە ايتتى.

"پاندەميامەن كۇرەسكە جۇمىلدىرىلعان بارلىق دارىگەرلەرگە جاعدايى جاسالعان ءارى جان-جاقتى قولداۋ جالعاسا بەرەدى"،- دەدى ول. ۋاقىتشا ساپارمەن كەلگەن رەسەيلىك دارىگەرلەر اتىراۋدا ءۇشىنشى تامىزعا دەيىن جۇمىس ىستەيدى.

ەسكە سالا كەتەلىك، بۇعان دەيىن اتىراۋ وبلىسىندا مەديتسينا سالاسىندا 278 مامان جەتىسپەيتىنىن حابارلاعان بولاتىنبىز.

 

سوڭعى جاڭالىقتار

ۇقساس جاڭالىقتار